Khamashung Khangarong Eina Kamunga Awunga
Ra̱kachanga ramli lunghār kahak akhawui khaya̱ thāda mibingli ngayinmi khamungabingna, Avāwui maramli kakapik tui hāngda ra̱changhaobingwui mang ngareithui ngasak mangkhama̱wui ngasoda ngarāra. Nganongrei kahai sha̱naobingna chāmrā maleira da nganāra. Manglā kajuipam eina heirormi vāshungda lamhāng athei matheira lui ngasāhaoki tangda awungawui shim chi kasaikha pamra.
32 1Yanglu, khamashung khangarong eina awunga akhana mungra, kala khamungabingna mashun eina mungra. 2Athum kachikathāna masiwui eina ngayin khavai, siphan zingrotwui eina ngayin khavai, tākok kahai apamli tara̱ khalong, kala ra̱kachanga ramli lunghār kahak akhawui khaya̱ thāra. 3Chiwui thili katheibingwui mik chi mashungmimara, kala nganābingwui khanāna nganāra. 4Teikakatā ningna theikakhuili bhap tāra, kala hāngkakatota malena tharlak eina totot hāngshapra. 5Mangkhama̱ chi ara wungnaona maholuimara, kala makhayā mi chi khayākakā da mahāngluimara. 6Kaja mangkhama̱na mangkhama̱ tui hānga, kala vare makatheiwui ot sākhavai, ithumwui Avāwui maramli kakapik tui hāngkhavai, thaihaobingli khikha maleila haimi khavai, kala ra̱changhaobingli mang chi ngareithui ngasak khavai awui ningna makaphā ngarānkhui. 7Makhayā miwui raighai chi makaphāna; khavātana mashun eina awui tuingaphun phayatmira tharanla, kakapik tui eina kachāmabingli sāshimān khavai ana makhayā khangarān ngarānkhui. 8Kha khayākakā mina khayākakā ot khangarān sai, kala khayākakā ot eina ana nganingra.
Ngakarthuilu, Lekngasaisor Naongalāva̱bing
9Nathum lekngasaisor sha̱naobing, ngakarthuida iwui akhon nganālu; nathum nganongrei kahai naongalāva̱bing, ina matui chi nganākhuilu.
10"Zingkum akha kala kasha̱ leilaga nathum nganukra, nathum nganongrei kahai sha̱naobing, kaja drakhāthei māhā chi kānhaira, kala phākakhui khikha maleimara. 11Nganuklu, nathum lekngasaisorbing; ngacheelu, nathum nganongrei kahaibing! Nathum khalatta kashankachon raimihaida khamahong sāda, kala nathumwui kashānli bora neilu. 12Leishiri kahai luibingwui vang, athei matheira drakhārongwui vang nathumwui sungthei shaolu; 13Iwui mibingwui ramwui vang, chili phānāng eina ka̱shāt kharshokra; mha, ringkaphā keinungli khalei khamathān shim saikorawui vangla shaolu. 14Kaja konung chi horhaira, mi kahupa keinung chi ngahuihaora; kaphung eina tārong chi katang makhavai rampho ngasāra, ram gadhāwui ringphā, yaobingwui seihomphung ngasāra, 15Ithumwui Avāwui Manglā chi kajuipam eina ithumwuitungli maheirormiranglakha, lamhāng chi athei matheira lui mangasāranglakha, kala athei matheira lui chi ngahong da makhuiranglakha eina tangda. 16Chiwui thili mashunna lamhāngli pamra, kala khamashung khangaronga athei matheira luili leichingra. 17Khamashung khangarongwui ot chi chingri kahai ngasāra, kala khamashung khangarongwui athei chi va̱ri kahai kala ning tāphup katang makhavai ngasāra. 18Iwui mibingna chingri kahai shimli, tāphup kahai pamkhavaibingli, makhangatha̱ ngasāmkhui khavaipambingli pamra. 19Theihna ngahongli tākkazammilala, kala keinung chi peichaoda ngachammilala, 20Tara̱ saikorawui ngalemli athā yaowa, sei eina gadhāli chipen ngasaka nathum sokhami ngasāra."
