ኢሳይያስ 32 FHB Father's Heart Bible™

32 ¹እንሆ፥ ሓደ ንጉስ ብፅድቂ ኽነግስ እዩ፥ መኳንንቲውን ብቕንዕና ኽገዝኡ እዮም። ²ነፍሲ ወከፍ ከም መጽለሊ ካብ ንፋስ፥ ካብ ህቦብላ ኸም መዕቘቢ፥ ከም ወሓዝቲ ማያት ኣብ ደረቕ ቦታ፥ ከም ፅላሎት ዓብዪ ኸውሒ ኣብ ዝደኸመት ምድሪ ክኸውን እዩ። ³ሽዑ ኣዒንቲ እቶም ዝርእዩ ኣይክዕፀዋን እየን፥ ኣእዛን እቶም ዝሰምዑ ድማ ክሰምዓ እየን። ⁴እቲ ህዉኽ ልቢ ፍልጠት ከስተውዕል እዩ፥ እቲ ልኽልኽ ዝብል ልሳን ድማ ቀልጢፉ ግሉፅ ጌሩ ክዛረብ እዩ። ⁵ደጊም እቲ ዓሻ ለጋስ ኣይክብሃልን እዩ፥ እቲ ጠባሪውን ክቡር ኣይክብሃልን እዩ። ⁶እቲ ዓሻ ዕሽነት ይዛረብ እዩ፥ ልቡ ድማ ክፍኣት ይሓስብ፦ ርኽሰት ንምግባር፥ ብዛዕባ ኣቦና ሓሶት ንምዝራብ፥ ነቲ ጥሙይ ጥራሕ ኢዱ ንምግዳፍ፥ ነቲ ፅሙእ ድማ መስተ ንምኽልካል። ⁷ናይ እቲ ጠባሪ ኣፅዋሩ እኩይ እዩ፤ ነቶም ድኻታት ብሓሰት ቃላት ኬጥፍእ እኩይ ውዲት ይምህዝ፥ እቲ ፅጉም ነገሩ ብቕንዕና እናተዛረበ እኳ። ⁸እቲ ለጋስ ሰብ ግና ለጋስ ነገራት ይሓስብ፥ ብለጋስ ነገራት ድማ ይቐውም።

ተንስኣ፥ ኣትን ሃዲአን ኣዋልድ

⁹ኣትን ሃዲአን ኣንስቲ፥ ተንስኣ እሞ ድምፀይ ስምዓ፤ ኣትን ሸለል ዝበልክን ኣዋልድ፥ ነቲ ዝብሎ ኣቕልባ።

¹⁰“ድሕሪ ሓደ ዓመትን ቑሩብ መዓልትን ክትንቀጥቀጣ ኢኽን፥ ኣትን ሸለል ዝበልክን ኣንስቲ፤ ምህርቲ ወይኒ ክጠፍእ እዩ እሞ፥ ምእካብ ድማ ኣይህሉን እዩ። ¹¹ተንቀጥቀጣ፥ ኣትን ሃዲአን፤ ራዕራዕ በላ፥ ኣትን ሸለል ዝበልክን! ተገፊፍክን ተራቑሓ፥ ኣብ ሕቘኽን ከዓ ወጮ ተዓጠቓ። ¹²ብዛዕባ እቲ ባህ ዘብል ግራውቲ፥ ብዛዕባ እታ ፈራይት ወይኒ ደረትክን ውቕዓ። ¹³ብዛዕባ ምድሪ ህዝበይ፥ ኣብኣ እሾዅን ኣሜከላን ዝበቍለላ፤ እወ፥ ብዛዕባ ኵሉ እቲ ኣብ ሕጉስቲ ኸተማ ዘሎ ኣባይቲ ሓጐስ። ¹⁴እቲ ቤተ መንግስቲ ክሕደግ እዩ እሞ፥ እታ ጫውጫው እትብል ከተማ ፅምዊ ክትከውን እያ፤ እቲ ኰረብታን እቲ ግምብን ንዘለኣለም በራሕ ቦታ ክኾኑ እዮም፥ ንኣእዱግ በረኻ መሐጐሲ፥ ንኣባጊዕ መውፈሪ። ¹⁵ክሳዕ መንፈስ ኣቦና ካብ ላዕሊ ኣብ ልዕሌና ዝፍሰስ፥ በረኻ ፈራይ ግራት ክሳዕ ዝኸውን፥ እቲ ፈራይ ግራት ድማ ከም ዱር ክሳዕ ዝቑፀር። ¹⁶ሽዑ ፍትሒ ኣብ በረኻ ክሐድር እዩ፥ ፅድቂ ድማ ኣብ ፈራይ ግራት ክነብር እዩ። ¹⁷ግብሪ ፅድቂ ሰላም ክኸውን እዩ፥ ፍረ ፅድቂ ድማ ህድኣትን ውሕስነትን ንዘለኣለም ይኸውን። ¹⁸ህዝበይ ኣብ ሰላማዊ ቤት፥ ኣብ ፅኑዕ ማሕደር፥ ኣብ ዘይርበሽ መዕረፊ ቦታ ክነብር እዩ። ¹⁹ኣብ ልዕሊ እቲ ዱር በረድ እኳ እንተ ወረደ፥ እታ ኸተማ ድማ ፈፂማ እኳ እንተ ተደምሰሰት፥ ²⁰ኣብ ጥቓ ኵሉ ማያት እትዘርኡ፥ ነቲ ብዕራይን ኣድግን ብናፅነት እትሰዱ፥ ብፁኣት ኢኹም።”