عدالتله پادشاهلیق ادن بئر پادشاه
یورغون بئر اؤلکه‌ده قایا کؤلگه‌سی کئمی خالقا پناه وِرَن باشچیلار، آتامیز حاقّیندا یالان دانیشان و آجین بوشقابینی بوشالدان آخماغین ضئدّئنه دورورلار. قایغیسیز آروادلار اشئدئرلر کی، ییغیم باش توتمایاجاق. روح یوخاریدان تؤکولوب چؤل بارلی اولانا قدر، سارای وئرانه قالیر.
32 1باخ، بئر پادشاه عدالتله پادشاهلیق اده‌جک، و باشچیلار عدالتله حؤکمرانلیق اده‌جکلر. 2هر بئری یلدن بئر پناهگاه کئمی اولاجاق، طوفاندان بئر سیغیناجاق، قوراق یرده سو آرخلاری کئمی، یورغون بئر اؤلکه‌ده بؤیوک بئر قایانین کؤلگه‌سی کئمی. 3او واخت گؤرنلرئن گؤزلری باغلانمایاجاق، و اشئدنلرئن قولاقلاری قولاق آساجاق. 4تله‌سئک عاغیل معرئفتی آنلایاجاق، و کَکَله‌ین دئل روان و آیدین دانیشاجاق. 5آرتیق آخماغا نجئب دیئلمه‌یه‌جک، و رذئله حؤرمتلی دیئله‌جک دیئل. 6چونکی آخماق آخماقلیق دانیشیر، و اوره‌یی شر فئکئرلَشئر: تاریسیزلیق اتمک، آتامیز حاقّیندا یالان دانیشماق، آجی اَلی‌بوش قویماق و سوسوز اولانی ائچکئدن محروم اتمک. 7رذئلئن سئلاحلاری شردئر؛ کاسیبی یالان سؤزلرله محو اتمک اوچون شر نقشه‌لر قورور، حتّا مؤحتاج اؤز داعواسینی عدالتله دئین زامان دا. 8آمّا نجئب آدام نجئب شیلر فئکئرلَشئر، و نجئب شیلرله برقرار اولور.
قالخین، ای لاقید قیزلار
9ای لاقید آروادلار، قالخین و سَسئمی اشئدئن؛ ای قایغیسیز قیزلار، منئم ددئیئمه قولاق آسین.
10«بئر ائلدن بئر آز آرتیق واختدا سئز تئتره‌یه‌جکسئنئز، ای قایغیسیز آروادلار، چونکی اوزوم ییغیمی باش توتمایاجاق، و ییغیم اولمایاجاق. 11تئتره‌یئن، ای لاقیدلر؛ لرزه‌یه گلئن، ای قایغیسیزلار! اؤزونوزو چیلپاق ادئن و بِللرئنئزه چول باغلایین. 12گؤزل زَمئلر اوچون، بارلی اوزوم تَنه‌یی اوچون دؤشلرئنئزه دؤیون. 13خالقیمین تورپاغی اوچون کی، اورادا تئکان و گَوَن بئتئر؛ بلی، شن شهرده‌کی بوتون سوئنج اِولری اوچون. 14چونکی سارای ترک ادئله‌جک، قلابالیق شهر بوش قالاجاق؛ تپه و گؤزتچی قوله‌سی ابدی چیلپاق یرلره چوئرئله‌جک، وحشی اِششَکلر اوچون بئر سوئنج، سورولر اوچون بئر اوتلاق، 15تا آتامیزین روحو یوخاریدان بئزئم اوستوموزه تؤکولَنه قدر، و چؤل بارلی زمئیه چوئرئله، و بارلی زمی مِشه کئمی ساییلار. 16او واخت عدالت چؤلده ساکئن اولاجاق، و صالحلئک بارلی زمئده قالاجاق. 17صالحلئیئن عملی صولح اولاجاق، و صالحلئیئن نتئجه‌سی ابدی دئنجلئک و امئن-آمانلیقدیر. 18خالقیم دئنج اِوده، امئن مسکنلرده، آرخایین دئنجَلمک یرلرئنده ساکئن اولاجاق. 19گرچی دولو مِشه‌نی ییخار و شهر تامامن یرله یکسان اولار، 20نه خوشبختسئنئز، ای بوتون سولارین کناریندا توخوم سَپَنلر، اؤکوزو و اِششَکی سربست بوراخانلار.»
