Isaia 32 FHB Father's Heart Bible™

32 ¹Ta rorai, mũthamaki nĩagaathamaka na ũthingu, nao anene nĩmagaatongoria na kĩhooto. ²O mũndũ agaatuĩka ta kĩĩhitho kĩa rũhuho, na rĩũrĩro rĩa kũũrĩra kĩhuhũkanio, ta tũrũũĩ twa maaĩ kũndũ kũũmũ, ta kĩĩruru kĩa ihiga inene bũrũriinĩ mũnogu. ³Hĩndĩ ĩyo maitho ma arĩa monaga matigaahingwo, namo matũ ma arĩa maiguaga nĩmagaathikĩrĩria. ⁴Meciiria ma ihenya nĩmagaataũkĩrwo nĩ ũũgĩ, naruo rũrĩmĩ rũrĩa rũgegetaga nĩrũkaaria wega na hũthũ. ⁵Mũndũ mũkĩĩgu ndagacooka gwĩtwo mũndũ mũtĩĩku, o naguo mũndũ mwaganu ndakoigwo nĩ wa gĩtĩĩo. ⁶Amu mũndũ mũkĩĩgu aaragia ũrimũ, nayo ngoro yake ĩthugundaga ũũru: gwĩka maũndũ ma kwaga gwĩtĩkia Ngai, kwaria maheeni igũrũ rĩa Ithe witũ, gũtiga arĩa mahũũtiĩ matarĩ na kĩndũ na kũima arĩa manyootiĩ kĩa kũnyua. ⁷Indo cia mũndũ mwaganu nĩ njũru; athugundaga mĩbango mĩũru ya kũniina arĩa athĩĩni na ciugo cia maheeni, o na rĩrĩa mũthĩĩni aaciirĩra ũhoro wake na kĩhooto. ⁸No mũndũ mũtĩĩku athugundaga maũndũ marĩa matĩĩku, na nĩ ũndũ wa maũndũ marĩa matĩĩku nĩarũgamaga.

Ũkĩrai, Inyuĩ Airĩĩtu arĩa Mwĩiguĩte Wega

⁹Inyuĩ atumia mwĩiguĩte wega, ũkĩrai, mũigue mũgambo wakwa; inyuĩ airĩĩtu mũtarĩ na thĩĩna, thikĩrĩriai ũrĩa nguuga.

¹⁰“Thutha wa mwaka ũmwe na matukũ manini nĩmũkainaina, inyuĩ atumia mũtarĩ na thĩĩna, nĩgũkorwo magetha ma thabibũ nĩmakaaga, na gũtigakorwo na ũgethi. ¹¹Inainai, inyuĩ mwĩiguĩte wega; kĩinainai, inyuĩ mũtarĩ na thĩĩna! Rutai nguo mũikare njaga na mwĩohe nguo cia macakaya njohero cianyu. ¹²Mwĩhũũrage ithũri nĩ ũndũ wa mĩgũnda mĩega, na nĩ ũndũ wa mũthabibũ ũrĩa ũciaraga mũno, ¹³nĩ ũndũ wa bũrũri wa andũ akwa, kũrĩa mĩigua na mahiũ ma mĩigua ikũraga; ĩĩ nĩguo, nĩ ũndũ wa nyũmba ciothe cia gĩkeno thĩinĩ wa itũũra rĩrĩa inene rĩa gĩkeno. ¹⁴Nĩgũkorwo nyũmba ya ũthamaki nĩĩgaatiganĩrio, narĩo itũũra rĩrĩa inene rĩiyũrĩte andũ rĩgaatiganĩrio; karĩma na mũthiringo wa kũrangĩra igaatuĩka kũndũ gũtheri nginya tene, handũ ha gũkenia ndigiri cia gĩthaka, na ũrĩithio wa ndũũru, ¹⁵nginya rĩrĩa Roho wa Ithe witũ akaaitwo igũrũ riitũ kuuma igũrũ, naguo werũ ũtuĩke mũgũnda mũnoru, naguo mũgũnda mũnoru ũtuĩke ta mũtĩtũ. ¹⁶Hĩndĩ ĩyo kĩhooto nĩgĩgaatũũra werũinĩ, naguo ũthingu ũtũũre mũgũndainĩ mũnoru. ¹⁷Wĩra wa ũthingu ũgaatuĩka thaayũ, namo maciaro ma ũthingu matuĩke hooreri na ũgitĩri nginya tene na tene. ¹⁸Andũ akwa magaatũũra mũciĩ wa thaayũ, maikaroinĩ marĩ na ũgitĩri, kũndũ gwa kũhurũka gũtarĩ na thĩĩna. ¹⁹O na gũtuĩka mbura ya mbembe ĩkaagwĩthia mũtĩtũ, narĩo itũũra rĩrĩa inene rĩmomorwo biũ, ²⁰Kũraathimwo nĩ inyuĩ mũhaandaga hũgũrũrũinĩ cia maaĩ mothe, arĩa mũrekagĩrĩria ndegwa na ndigiri ithiĩ o harĩa ciendaga.”