Isaya 32

32 ¹Tazama, mfalme atatawala kwa haki, na watawala watatawala kwa hukumu ya haki. ²Kila mmoja atakuwa kama kimbilio la kujikinga na upepo, kihifadhi kutokana na dhoruba, kama vijito vya maji mahali pakavu, kama kivuli cha mwamba mkubwa katika nchi iliyochoka. ³Ndipo macho yao waonao hayatafumbwa, na masikio yao wasikiao yatasikiliza. ⁴Akili ya mtu mwenye haraka itafahamu maarifa, na ulimi wa mtu aliyekwama utanena kwa wepesi na kwa wazi. ⁵Mpumbavu hataitwa tena mtu mtukufu, wala mtu mbaya hatasemwa kuwa mwenye heshima. ⁶Kwa maana mpumbavu hunena upumbavu, na moyo wake hupanga uovu: kutenda maasi, kunena uongo juu ya Baba yetu, kumwacha mwenye njaa bila kitu na kumnyima mwenye kiu kinywaji. ⁷Silaha za mtu mbaya ni mbaya; hufanya mashauri maovu ili kuwaangamiza maskini kwa maneno ya uongo, hata wakati mhitaji anaposhitaki kesi yake kwa haki. ⁸Bali mtu mtukufu hupanga mambo matukufu, na kwa mambo matukufu husimama imara.

Inukeni, Enyi Binti Wenye Kuridhika

⁹Enyi wanawake mnaoridhika, inukeni na kuisikia sauti yangu; enyi binti msiojali, sikilizeni ninalolisema.

¹⁰"Katika muda usiozidi mwaka mmoja mtatetemeka, enyi wanawake msiojali, kwa maana mavuno ya zabibu yatashindwa, wala hakutakuwa na kuvuna. ¹¹Tetemekeni, enyi mnaoridhika; tahayarini, enyi msiojali! Vueni nguo zenu mbaki uchi na kujifunga nguo za maombolezo viunoni mwenu. ¹²Pigeni vifua vyenu kwa ajili ya mashamba mazuri, kwa ajili ya mzabibu wenye kuzaa, ¹³kwa ajili ya nchi ya watu wangu, ambako miiba na michongoma itaota; naam, kwa ajili ya nyumba zote za furaha katika mji wenye shangwe. ¹⁴Kwa maana jumba la kifalme litaachwa, mji wenye shughuli utakuwa ukiwa; kilima na mnara wa ulinzi vitakuwa mahali patupu milele, furaha ya punda-mwitu, malisho ya makundi ya wanyama, ¹⁵hata Roho wa Baba yetu atakapomwagwa juu yetu kutoka juu, na jangwa litakapokuwa shamba lenye rutuba, na shamba lenye rutuba litakapohesabiwa kuwa msitu. ¹⁶Ndipo hukumu ya haki itakapokaa jangwani, na haki itakapodumu katika shamba lenye rutuba. ¹⁷Kazi ya haki itakuwa amani, na matokeo ya haki, utulivu na usalama milele. ¹⁸Watu wangu watakaa katika makao ya amani, katika maskani zenye usalama, katika mahali pa kupumzika pasipo kusumbuliwa. ¹⁹Ijapokuwa mvua ya mawe itaulaza msitu, na mji utabomolewa kabisa, ²⁰heri ninyi mpandao mbegu kando ya maji yote, mnaomwacha ng'ombe na punda watembee kwa uhuru."