Isaya 31

31 ¹Ole wao washukao Misri kutafuta msaada, wategemeao farasi, wanaotumainia magari ya vita kwa sababu ni mengi, na wapanda farasi kwa sababu wana nguvu nyingi sana—lakini hawamwelekei yeye Mtakatifu wa Israeli, Baba yetu, wala hawamtafuti. ²Lakini yeye naye ana hekima, naye huleta maafa; hayarudishi maneno yake. Atainuka juu ya nyumba ya watendao mabaya, na juu ya msaada wa watendao uovu. ³Wamisri ni wanadamu wala si Mungu; farasi zao ni nyama wala si roho. Baba yetu atakaponyoosha mkono wake, yeye asaidiaye atajikwaa, na yeye asaidiwaye ataanguka, nao wote pamoja watakwisha.

⁴Kwa maana Baba yetu aliniambia hivi: Kama simba au mwana-simba angurumavyo juu ya mawindo yake—na ijapokuwa kundi la wachungaji laitwa kupigana naye, hatishwi na kelele zao wala hafadhaishwi na makelele yao—ndivyo Baba wa majeshi ya mbinguni atakavyoshuka kupigana juu ya Mlima Sayuni na juu ya kilele chake. ⁵Kama ndege warukao juu, ndivyo Baba wa majeshi ya mbinguni atakavyoulinda Yerusalemu; atauhifadhi na kuuokoa, atapita juu yake na kuuponya.

⁶Mrudieni yeye ambaye wana wa Israeli wamemwacha kwa kiasi kikubwa hivyo. ⁷Kwa maana katika siku ile kila mtu atavikataa vinyago vyake vya fedha na vinyago vyake vya dhahabu, ambavyo mikono yenu wenyewe imevitengeneza kwa dhambi.

⁸Ndipo Ashuru atakapoanguka kwa upanga usio wa mwanadamu, na upanga usio wa binadamu utammeza. Atakimbia mbele ya upanga, na vijana wake watatiwa katika kazi ya utumwa. ⁹Ngome yake itaporomoka kwa hofu, na wakuu wake watakimbia kwa kufadhaika mbele ya bendera ya vita, asema Baba yetu, ambaye moto wake u katika Sayuni, na tanuru yake i katika Yerusalemu.