Ọba Kan Tí Ń Jọba Ní Òdodo
Àwọn olórí tí ń dáàbò bo ènìyàn bí òjìji àpáta ní ilẹ̀ tí ó rẹ̀wẹ̀sì dúró lòdì sí òmùgọ̀ tí ń purọ́ nípa Baba, tí ó sì ń sọ àwo ẹni tí ebi ń pa di òfo. Àwọn obìnrin tí ara rọ̀ gbọ́ pé ìkórè yóò kùnà. Ààfin yóò wà ní ahoro títí a ó fi tú Ẹ̀mí jáde, tí aṣálẹ̀ yóò sì so èso.
32 1Wò ó, ọba kan yóò jọba ní òdodo, àwọn alákòóso yóò sì ṣàkóso pẹ̀lú ìdájọ́ òtítọ́. 2Olúkúlùkù wọn yóò dàbí ibùgbé ààbò kúrò lọ́wọ́ afẹ́fẹ́, ibi ìsádi kúrò lọ́wọ́ ìjì, bí odò omi ní ibi gbígbẹ, bí òjìji àpáta ńlá ní ilẹ̀ tí ó ti rẹ̀wẹ̀sì. 3Nígbà náà, ojú àwọn tí ń ríran kì yóò padé mọ́, etí àwọn tí ń gbọ́ràn yóò sì fetísílẹ̀. 4Ọkàn tí ń kánjú yóò ní òye ìmọ̀, ahọ́n tí ń kólòlò yóò sì sọ̀rọ̀ dáradára kedere. 5A kì yóò pe aṣiwèrè ní ọlọ́lá mọ́, bẹ́ẹ̀ ni a kì yóò sọ pé ẹni ìkà ni ẹni ọ̀wọ̀. 6Nítorí aṣiwèrè ń sọ ọ̀rọ̀ òmùgọ̀, ọkàn rẹ̀ sì ń gbìmọ̀ ibi: láti ṣe àìwà-bí-Ọlọ́run, láti parọ́ nípa Baba wa, láti fi àwọn tí ebi ń pa sílẹ̀ ní òfo àti láti fi ohun mímu dù àwọn tí òǹgbẹ ń gbẹ. 7Ohun ìjà ẹni ìkà burú; ó ń gbìmọ̀ ète ìwà búburú láti fi ọ̀rọ̀ irọ́ pa àwọn tálákà run, àní nígbà tí aláìní bá ń fi òdodo rọ̀ ẹjọ́ rẹ̀. 8Ṣùgbọ́n ẹni ọlọ́lá ń gbèrò ohun ọ̀làwọ́, nípa ohun ọ̀làwọ́ ni ó sì dúró.
Ẹ Dìde, Ẹ̀yin Ọmọbìnrin Aláìbìkítà
9Ẹ̀yin obìnrin aláìbìkítà, ẹ dìde kí ẹ sì gbọ́ ohùn mi; ẹ̀yin ọmọbìnrin aláìnáàní, ẹ fetísílẹ̀ sí ohun tí mo wí.
10“Láàrín ọdún kan ó lé díẹ̀ ni ẹ ó wárìrì, ẹ̀yin obìnrin aláìnáàní, nítorí ìkórè àjàrà yóò kùnà, ìkójọ kì yóò sì sí. 11Ẹ wárìrì, ẹ̀yin aláìbìkítà; ẹ gbọ̀n, ẹ̀yin aláìnáàní! Ẹ bọ́ ara yín sí ìhòòhò kí ẹ sì fi aṣọ ọ̀fọ̀ wé ẹ̀gbẹ́ yín. 12Ẹ lu àyà yín nítorí oko dídára, nítorí àjàrà eléso, 13nítorí ilẹ̀ àwọn ènìyàn mi, níbi tí ẹ̀gún àti òṣùṣú ti ń hù; nítòótọ́, nítorí gbogbo ilé ayọ̀ ní ìlú ariwo-ayọ̀. 14Nítorí a ó kọ ààfin sílẹ̀, ìlú rúdurùdu náà yóò dahoro; òkè àti ilé-ìṣọ́ yóò di ibi òfìfo títí láé, ìdùnnú fún àwọn kẹ́tẹ́kẹ́tẹ́ igbó, pápá oko fún àwọn agbo ẹran, 15títí a ó fi tú Ẹ̀mí Baba wa jáde sórí wa láti òkè ọ̀run wá, aginjù yóò sì di oko eléso, a ó sì ka oko eléso sí igbó. 16Nígbà náà, ìdájọ́ òtítọ́ yóò máa gbé inú aginjù, òdodo yóò sì wà nínú oko eléso. 17Iṣẹ́ òdodo yóò jẹ́ àlàáfíà, àbájáde òdodo yóò sì jẹ́ ìdákẹ́rọ́rọ́ àti ìfọkànbalẹ̀ títí láé. 18Àwọn ènìyàn mi yóò máa gbé ní ibùgbé àlàáfíà, nínú ilé ààbò, ní ibi ìsinmi tí kò ní ìyọnu. 19Bí ó tilẹ̀ jẹ́ pé yìnyín fọ́ igbó lulẹ̀, tí a sì wó ìlú palẹ̀ pátápátá, 20ìbùkún ni fún yín tí ẹ ń fúnrúgbìn lẹ́bàá gbogbo omi, tí ẹ ń jẹ́ kí màlúù àti kẹ́tẹ́kẹ́tẹ́ máa rìn káàkiri lómìnira.”
