Mfumu Yolamulira mu Chilungamo
Atsogoleri amene amatetezera anthu ngati mthunzi wa thanthwe m'dziko lotopetsa akuima motsutsana ndi chitsiru chimene chimanamizira Atate ndi kukhuthula mbale ya munthu wanjala. Akazi okhala momasuka akumva kuti zokolola zidzalephera. Nyumba yaufumu ikhalabe yopanda anthu mpaka Mzimu atatsanulidwa ndipo chipululu chisanduka chobala zipatso.
32 1Taonani, mfumu idzalamulira mu chilungamo, ndipo atsogoleri adzalamulira ndi chiweruzo. 2Aliyense adzakhala ngati pothawira ku mphepo, pobisalira ku namondwe, ngati mitsinje ya madzi m'malo owuma, ngati mthunzi wa thanthwe lalikulu m'dziko lotopa. 3Pamenepo maso a iwo amene akuona sadzatsekedwa, ndipo makutu a iwo amene akumva adzamvetsera. 4Mtima wofulumira udzamvetsa chidziwitso, ndipo lilime logagada lidzayankhula mosavuta ndi momveka bwino. 5Chitsiru sichidzatchedwanso wolemekezeka, ndipo wachinyengo sadzanenedwa kuti ndi waulemu. 6Pakuti chitsiru chimayankhula zopusa, ndipo mtima wake umakonza zoyipa: kuchita zosapembedza, kunena zabodza za Atate wathu, kusiya wanjala wopanda kanthu ndi kumana wa ludzu chakumwa. 7Zida za wachinyengo ndi zoyipa; amakonza machenjerero oyipa kuti awononge osauka ndi mawu abodza, ngakhale pamene wosowa akunena mlandu wake mwachilungamo. 8Koma munthu wolemekezeka amakonza zinthu zolemekezeka, ndipo mwa zolemekezeka iye adzaima.
Dzukani, Inu Ana Aakazi Odekha
9Inu akazi osasamala, dzukani ndi kumva mau anga; inu ana aakazi odekha, mverani zimene ndikunena.
10“Patatha chaka ndi masiku ochepa mudzanjenjemera, inu akazi odekha, pakuti kukolola mphesa kudzalephera, ndipo sikudzakhala kututa kwake. 11Njenjemerani, inu osasamala; nthunthumirani, inu odekha! Vulani muvule maliseche ndipo muvale ziguduli m'chiuno mwanu. 12Dzigugudeni pachifuwa chifukwa cha minda yokoma, chifukwa cha mpesa wa zipatso, 13chifukwa cha dziko la anthu anga, kumene minga ndi mikandankhuku zikumera; inde, chifukwa cha nyumba zonse zachisangalalo mu mzinda wokondwa. 14Pakuti nyumba yaufumu idzasiyidwa, mzinda wa phokoso udzasiyidwa; phiri ndi nsanja yolondera zidzasanduka malo opanda kanthu kwamuyaya, chokondweretsa abulu akutchire, msipu wa ziweto, 15kufikira Mzimu wa Atate wathu utatsanulidwa pa ife kuchokera kumwamba, ndipo chipululu chidzasanduka munda wachonde, ndipo munda wachonde udzawonedwa ngati nkhalango. 16Pamenepo chiweruzo chidzakhala m'chipululu, ndipo chilungamo chidzakhala m'munda wachonde. 17Ntchito ya chilungamo idzakhala mtendere, ndipo zotsatira za chilungamo zidzakhala bata ndi chitetezo kwamuyaya. 18Anthu anga adzakhala m'nyumba ya mtendere, m'malo okhala otetezeka, m'malo opumulira osavutitsidwa. 19Ngakhale matalala agwetsa nkhalango ndipo mzinda udzagwetsedwa kotheratu, 20odala ndinu amene mufesa m'mbali mwa madzi onse, amene mumalola ng'ombe ndi bulu kudya momasuka.”
