Isaiah 31

31 ¹Ngachonmi khavai Egyptli tungabing, siguili chihānabing, kachungkha jiwui vang siguigarili, kala tandi kapanga jiwui vang sigui katongbingli shitkasangabing kakhanang ngasāranu; kha athumna Israelwui Katharapā, ithumwui Avāli mayangla, lah ali maphāmana. ²Chithālala anala thangmei kala kalākashi khuirāra; awui tui makhuithuimana. Ana makaphā kasābingwui shimkhurli kala khangui ot kasābingwui ngachonmi ngasoda ngakarthuira. ³Egyptnaobing hi mikumona, Vare maningmana; athumwui sigui hi asāna, manglā maningmana. Ithumwui Avāna awui pāng katingvai tharan, ngachonkhame ngaphokra, kala ngachonmi kahaia kongluihaora, kala athum saikora ngarumlaga shimānserhaora.

⁴Kaja ithumwui Avāna ili hithāda hānga: Kazingkha̱ lah kazingkha̱naona awui sāshaiwuitungli khangangra tharan, kala yaokahomabingwui khumkha akha chiwui ngasoda hokakhui tharānlila, chi athumwui vaokhon eina mangacheemara, lah athumwui akhon eina matātungmara; chitākam eina saikorawui Avāna Zion Kaphungli kala awui kajuili ngarar khavai tāra. ⁵Kazingramli yongkazata vānaobing thāda, saikorawui Avāna Jerusalemli chāngvei sāra; ana chāngvei sāda kanshokmira; ana chili kānthuida huimira.

⁶Israelnaobingwui kachungkha tāda ma̱thuichaohai chipali latunglu. ⁷Kaja chithanghon mi saikorana awui lupā meoma̱ kala awui sinā meoma̱, nathumwui pāng eina morei sāda nathumwui vang sākahai chi horhaora.

⁸Chieina Assyria mikumowui maningla raighai eina pitāra, kala miwui maningla raighaina ali tukshaira. Ana raighaiwui eina yāmra, kala awui yaronnaobing tandi ot sāngasakra. ⁹Awui raipan khangachee eina acho ngasāra, kala awui wungnaobing rai philānwui eina khangacheena yāmra, da Zionli awui mei khalei, kala Jerusalemli awui sharkha̱ khalei ithumwui Avāna hānga.