యెషయా 31

31 ¹సహాయము కొరకు ఐగుప్తుకు దిగిపోయి, గుఱ్ఱములను ఆధారము చేసుకొని, రథములు అనేకమైనవని వాటిని, రౌతులు మిక్కిలి బలవంతులని వారిని నమ్ముకొనువారికి శ్రమ— అయితే వారు ఇశ్రాయేలు పరిశుద్ధుడైన మన తండ్రి వైపు చూడరు, ఆయనను వెదకరు. ²అయినను ఆయనయు జ్ఞానవంతుడు, ఆయన విపత్తు రప్పించును; ఆయన తన మాటలను ఉపసంహరించుకొనడు. దుష్క్రియలు చేయువారి ఇంటికి విరోధముగాను, అపరాధులకు సహాయము చేయువారికి విరోధముగాను ఆయన లేచును. ³ఐగుప్తీయులు మనుష్యులే, దేవుడు కారు; వారి గుఱ్ఱములు మాంసమే, ఆత్మ కావు. మన తండ్రి తన చేయి చాపినప్పుడు, సహాయము చేయువాడు తొట్రిల్లును, సహాయము పొందినవాడు పడిపోవును, వారందరు కూడి నశించిపోవుదురు.

⁴మన తండ్రి నాతో చెప్పినదేమనగా: సింహము గాని కొదమసింహము గాని తన వేటపై గర్జించునప్పుడు—దానికి విరోధముగా గొల్లల గుంపు పిలువబడినను, అది వారి కేకలకు భయపడదు, వారి కలకలమునకు జడియదు—ఆలాగే పరలోకపు సైన్యాల తండ్రి సీయోను కొండపైన, దాని శిఖరముపైన యుద్ధము చేయుటకు దిగివచ్చును. ⁵ఎగురుచు కాపాడు పక్షులవలె, పరలోకపు సైన్యాల తండ్రి యెరూషలేమును కాపాడును; ఆయన దానిని కాపాడి విడిపించును, దానిపై దాటిపోయి రక్షించును.

⁶ఇశ్రాయేలీయులు ఎవరిని విడిచి అంత లోతుగా తొలగిపోయిరో ఆయన వైపునకు తిరిగిరండి. ⁷ఆ దినమున ప్రతివాడు తన వెండి విగ్రహములను, తన బంగారు విగ్రహములను, అనగా మీ చేతులే పాపముగా మీకొరకు చేసినవాటిని విసర్జించును.

⁸అప్పుడు అష్షూరు మనుష్యునిదికాని ఖడ్గముచేత కూలిపోవును, మనుష్యజాతిదికాని ఖడ్గము వానిని మ్రింగివేయును. వాడు ఖడ్గము ఎదుటనుండి పారిపోవును, వాని ¯యువకులు వెట్టిపనికి లోబరచబడుదురు. ⁹వాని దుర్గము భయముచేత కూలిపోవును, వాని అధిపతులు యుద్ధపతాకమును చూచి భీతిచెంది పారిపోవుదురు; సీయోనులో తన అగ్నియు, యెరూషలేములో తన కొలిమియు గల మన తండ్రి వాక్కు ఇదే.