ኢሳይያስ 31

31 ¹እርዳታ ለማግኘት ወደ ግብፅ ለሚወርዱ፣ በፈረሶች ለሚመኩ፣ ስለ በዙ በሰረገሎች ለሚታመኑ፣ እጅግ ስለ በረቱም በፈረሰኞች ለሚመኩ ወዮላቸው፤ ነገር ግን ወደ እስራኤል ቅዱስ፣ ወደ አባታችን አያዩም፣ እርሱንም አይፈልጉም። ²ነገር ግን እርሱ ደግሞ ጥበበኛ ነው፣ መዓትንም ያመጣል፤ ቃሉንም አይመልስም። በክፉ አድራጊዎች ቤት ላይ፣ ዐመፅ በሚያደርጉትም እርዳታ ላይ ይነሣል። ³ግብፃውያን ሰዎች እንጂ አምላክ አይደሉም፤ ፈረሶቻቸውም ሥጋ እንጂ መንፈስ አይደሉም። አባታችን እጁን በሚዘረጋበት ጊዜ፣ ረዳቱ ይሰናከላል፣ የሚረዳውም ይወድቃል፣ ሁሉም በአንድነት ያልቃሉ።

⁴አባታችን እንዲህ ብሎ ነግሮኛልና፦ አንበሳ ወይም የአንበሳ ደቦል በያዘው እንስሳ ላይ እንደሚያገሣ፣ የእረኞችም ጭፍራ ቢጠራበትም በጩኸታቸው እንደማይደነግጥ፣ በግርግራቸውም እንደማይሸበር፣ እንዲሁ የሰማይ ሠራዊት አባት በጽዮን ተራራና በኮረብታው ላይ ሊዋጋ ይወርዳል። ⁵ወፎች ከላይ እንደሚያንዣብቡ፣ እንዲሁ የሰማይ ሠራዊት አባት ኢየሩሳሌምን ይጋርዳታል፤ ይጋርዳታል ያድናታልም፣ ያልፍላታል ይታደጋታልም።

⁶የእስራኤል ልጆች ሆይ፣ እጅግ ከራቃችሁት ወደ እርሱ ተመለሱ። ⁷በዚያ ቀን ሰው ሁሉ እጆቻችሁ ለኀጢአት የሠሩላችሁን የብሩን ጣዖታትና የወርቁን ጣዖታት ይጥላል።

⁸ያን ጊዜ አሦር የሰው ባልሆነ ሰይፍ ይወድቃል፣ የሰው ልጅ ባልሆነም ሰይፍ ይበላዋል። ከሰይፍ ፊት ይሸሻል፣ ጎበዞቹም ለግዳጅ ሥራ ይዳረጋሉ። ⁹ምሽጉ በፍርሃት ይፈርሳል፣ አለቆቹም ከጦር ሰንደቅ ዓላማ በድንጋጤ ይሸሻሉ፤ እሳቱ በጽዮን፣ እቶኑም በኢየሩሳሌም ያለው አባታችን እንዲህ ይላል።