هغو ته افسوس چې په مصر باندې اعتماد کوى
د مصر آسونه غوښه دي، نه روح؛ په هغوی تکیه کول مرستندوی او مرسته شوی دواړه یوځای غورځوي. پلار هغه زمری دی چې د شپنو چیغې یې نشي تښتولی، او د هغو مرغانو په څېر دی چې د یروشلم پر سر وزرونه رپوي. اشور په داسې توره غورځي چې هیڅ سړي په لاس کې نه ده نیولې، او خلک خپل بتان لرې غورځوي.
31 1افسوس هغو کسانو ته چې د مدد دپاره مصر ته ښکته ځى، چې په آسونو تکيه کوى، چې په رتهونو اعتماد کوى ځکه چې هغه ډېر دى او په سوارانو ځکه چې هغوئ ډېر زورور دى — خو هغوئ د اِسرائيل پاک ذات، زمونږ پلار ته نۀ ګورى، او نۀ هغه لټوى. 2خو هغه هم عقلمند دے او آفت راولى؛ هغه خپل خبرې بيرته نۀ اخلى. هغه به د بدکارانو د کور په خلاف او د بدى کوونکو د مدد په خلاف راپاڅى. 3مصريان انسانان دى، نۀ خُدائ پاک؛ د هغوئ آسونه غوښه دى، نۀ روح. کله چې زمونږ پلار خپل لاس اوږد کړى، نو مدد کوونکے به وښوئيږى او هغه چې مدد ورته کيږى هغه به راپرزيږى، او دا ټول به يو ځائ ختم شى.
4ځکه چې زمونږ پلار ما ته داسې وفرمائيل: لکه څنګه چې زمرے يا د زمرى بچے په خپل ښکار باندې غُريږى — او که څۀ هم د شپنو يوه ډله د هغۀ په خلاف راوبللے شى، نو هغه د هغوئ په چغو نۀ وېريږى او نۀ د هغوئ په شور ګډوډ کيږى — هم هغه شان به د آسمان د لښکرو پلار د کوه صيون او د هغۀ د لوړو دپاره جنګ کولو له راکوز شى. 5لکه څنګه چې مرغان په سر باندې الوزى، هم هغه شان به د آسمان د لښکرو پلار د يروشلم حفاظت وکړى؛ هغه به يې حفاظت او خلاصى وکړى، هغه به پرې تېر شى او بچ به يې کړى.
6هغۀ ته راوګرځئ، چې د اِسرائيل قوم ترې دومره ژور مخ اړولے دے. 7ځکه چې په هغه ورځ به هر څوک د خپلو د سپينو زرو بتان او د سرو زرو بتان رد کړى، کوم چې ستاسو خپلو لاسونو په ګناه سره ستاسو دپاره جوړ کړى دى.
8بيا به اسوريه د داسې تُوره په وسيله راپرزى چې د انسان نۀ ده، او داسې تُوره چې د بنى آدم نۀ ده هغه به تباه کړى. هغه به د تُوره نه مخکښې وتښتى، او د هغۀ ځوانان به په جبرى مزدورۍ ونيولے شى. 9د هغۀ قلعه به د وېرې نه راوپرزى، او د هغۀ سردران به د جنګ د جهنډا نه په ګډوډۍ سره وتښتى، زمونږ پلار فرمائى، چې د هغۀ اور په صيون کښې دے او د هغۀ تنور په يروشلم کښې دے.
