Aịzaya 31 FHB Father's Heart Bible™

31 ¹Ahụhụ dịịrị ndị na-arịda gaa Ijipt maka enyemaka, ndị na-adabere nʼịnyịnya, ndị na-atụkwasị obi nʼụgbọ agha nʼihi na ha dị ọtụtụ, na nʼndị na-agba ịnyịnya nʼihi na ha dị ike nke ukwuu—ma ha adịghị ele anya nʼebe Onye Nsọ nke Izrel nọ, bụ Nna anyị, ha adịghịkwa achọ ya. ²Ma ya onwe ya makwa ihe, na-ewetakwa ọdachi; ọ dịghị eweghachi okwu ya azụ. Ọ ga-ebili megide ụlọ ndị na-eme ihe ọjọọ na megide enyemaka nke ndị na-eme ajọ ihe. ³Ndị Ijipt bụ mmadụ, ha abụghị Chineke; ịnyịnya ha bụ anụ arụ, ha abụghị mmụọ. Mgbe Nna anyị setịpụrụ aka ya, onye na-enye aka ga-asụ ngọngọ, onye a na-enyere aka ga-adakwa, ha niile ga-alakọkwa nʼiyi ọnụ.

⁴Nʼihi na nke a bụ ihe Nna anyị gwara m: Dịka ọdụm maọbụ nwa ọdụm si agbọ ụja nʼelu anụ o gburu—ọ bụ ezie na a kpọkọtara igwe ndị ọzụzụ atụrụ imegide ya, egwu adịghị atụ ya nʼihi mkpu ha, obi adịghịkwa ama ya jijiji nʼihi mkpọtụ ha—otú a ka Nna nke usuu ndị agha eluigwe ga-esi rịdata ibu agha nʼelu Ugwu Zayọn na nʼelu ebe ya dị elu. ⁵Dịka nnụnụ si efegharị nʼelu, otú a ka Nna nke usuu ndị agha eluigwe ga-echebe Jerusalem; ọ ga-echebe ma napụta ya, ọ ga-agafe ya ma zọpụta ya.

⁶Laghachikwutenụ onye ahụ ụmụ Izrel nupụụrụ nke miri emi. ⁷Nʼihi na nʼụbọchị ahụ, onye ọbụla ga-ajụ arụsị ọlaọcha ya na arụsị ọlaedo ya, nke aka unu kpụụrụ onwe unu na mmehie.

⁸Mgbe ahụ, Asịrịa ga-ada site na mma agha nke na-abụghị nke mmadụ, mma agha nke na-esiteghị nʼaka mmadụ ga-erichapụkwa ya. Ọ ga-agbapụ nʼihu mma agha, a ga-emekwa ka ụmụ okorobịa ya rụọ ọrụ mmanye. ⁹Ebe ya e wusiri ike ga-ada nʼihi oke egwu, ndị isi ya ga-agbapụ nʼoke ụjọ site nʼọkọlọtọ agha, ka Nna anyị kwupụtara, bụ onye ọkụ ya dị na Zayọn, onye ekwuru ọkụ ya dịkwa na Jerusalem.