Ijip dak amangertem aiatai
Ijip kortem shi lir, tanela masü; parnok dang aluba yaridakba den yarina aliba kashi amanger. Tebuji sannüker telok kati pei o agia aridok makokba molusongzü ka lir, aser ozütem Yirusalem manung tempanga aliba ama lir. Asiriaji nisung teka maliba tashi nungi amang, aser nüburtemi pei süngyanglutem bendoktsü.
31 1Teyari asoshi Ijipi aluba aiatai, parnoki kortem nung imlar, talungtsü dak amanger, kechiaser item jenti, aser kor nung amenertem dak amanger, kechiaser item kanga tashi tait; saka parnoki Israel Temeshiba dang mereprang, asen Tebu, mesüra pa mebushi. 2Aji oda saka pa atema temeteter lir aser lendong yoktsü; pa pei o meyipa maben. Pai tamajung inyakertem kibong anema, aser memeshiba inyakertem teyari anema noktaktsü. 3Ijip nungertem nisung lir, Tsüngrem masü; par kortem shi lir, tanela masü. Kodang Tebui pa teka songtokdir, teyarir metsüdaktsü, aser yaridakba laotsü, aser parnok ajak külemi tempanga aotsü.
4Kechiaser Tebui kü dang ashi, Molusongzü mesüra molusongzü pungtu pei shi ngusadak madak arüloktsü ama, aser sannüker telok kati pa anema ajatsü saka, pai parnok asatepba ola agi tsübua mali, mesüra parnok ola agi aoksa-a mali, yamaji Temeranger Tebu Zion tenem aser pa talang madak raratsü asoshi lutsü. 5Kotak madak aliba ozütem ama, yamaji Temeranger Tebui Yirusalem tongdangtsü; pai tongdanga delilatsü, pa madak jajaa kümzüktsü.
6Israel chirtem kanga pila-a toktsüba, aji dang nenok meyipang. 7Kechiaser aji anogo nung nisung shiai pei taribi süngyanglu aser pei hon süngyanglu, nenok teka agi temenen agi nenok asoshi yangluba, magizüktsü.
8Anungji Asiria laotsü, nisung masüba nok agi, aser nisung masüba noki pa achitsü; pai nok madangi jenoktsü, aser pa asangurtem mapa nungloktsü. 9Pa mitsa tetsübu nungi tempanga aotsü, aser pa tongtipurtem tongbang temaitsü nungi aoksa-a jenoktsü, ta Tebui ashir, pa mi Zion nung lir, aser pa misem Yirusalem nung lir.