Ijep to mailembü shuong shanga ügütü
Ijepbü koli kho phe ki hoba soushou aying; haoen to maanglemlaje thuibou si thui hapbou liko tuonglabü. Seneibü Bou kho sanlombü shuongeibü ngühlang la ahatbü molosaonyu che ki, hoba Jerusalem khulimbo müha shongeibü au shuong tegü ki. Assiria kho müteibü aying inei tuonglabü, hoba mütshuongei jembü heangsho shuong leijung thetlabü.
31 1Thuibü shanga Ijep to yanbü shuong, koli to maanglembü shuong, kailong juong kibü shanga kho to mailembü shuong, hoba kolia setbü shuong aeibou hau kibü shanga haoen to mailembü shuong shanga ügütü; lausikei haoenei Israel Saopobou, seneibü Bou to amaangshikko, ayingsi hao alam. 2Lausikei hao lolokei songsido ki hoba thushed lambuda; haoei jembü ngüh asepeiti. Haoei amaibü shuongeibü chem khulimbo hoba shedbü kümbü shuong thuibü khulimbo loenlabü. 3Ijepbü kho müt ki hoba Mühghaü aying; haoeneibü koli kho phe ki hoba soushou aying. Ladang seneibü Bouei haoeibü ik shinglaje, thuibou phaiyetlabü hoba ao thuilabü kho tuonglabü, hoba haoen pendou liko thonlabü.
4Aishanga seneibü Bouei kü to hai laukei: Molosaonyu ayingsi molosaonyu heshouei jembü mei thüka ngühkuda—hoba sanlombü tan che kho khulimbo ngaalonga, hao kho haoeneibü uihin ka amokti, ayingsi haoeneibü ngühlang ka alühti—kheijinei Lakjaibü dan Bou Zion shongh hoba khoeibü suokbü thükto wapyola louyenlabü. 5Au shuong müha shongeiko kibü tegü, kheijinei Lakjaibü dan Bouei Jerusalem shieikoelabü; haoei shieikoelabü hoba delilabü, kho püetan khümenlabü.
6Israel shousi shuong aeibou maang weejung apbü hao jungto kan maangpon sepeiashi. 7Aishanga ho chalou müt pendouei, aoyou kaneibü ik lolei shedko kan shanga kümbü, jembü chandinam heangsho hoba jembü hon heangsho wailetlabü.
8Kheijinei Assiria müteibü aying kibü inei tuonglabü, hoba müt mangeibü aying kibü inei hao shaulabü. Haoei in thedanga satlabü, hoba haoeibü heshou shuong aaoeibü kümsilei jangan phokulabü. 9Haoeibü lapheishon hatbü ka phinnyinlabü, hoba haoeibü jaishou shuong wapyobü nisan ka panglangko satlabü, dogo seneibü Bouei lauda, haoeibü wan Ziona ki hoba haoeibü wanyaüshang Jerusalema ki.
