ዘፀአት 33

33 ¹አባታችን ሙሴን እንዲህ አለው፤ “አንተና ከግብፅ ያወጣኸው ሕዝብ ከዚህ ተነሥታችሁ፣ ለአብርሃም፣ ለይስሐቅና ለያዕቆብ ‘ለዘርህ እሰጣታለሁ’ ብዬ ወደ ማልሁላት ምድር ውጡ። ²በፊትህም መልአክ እልካለሁ፤ ከነዓናውያንን፣ አሞራውያንን፣ ኬጢያውያንን፣ ፌርዛውያንን፣ ኄዋውያንንና ኢያቡሳውያንን አባርራለሁ። ³ወተትና ማር ወደምታፈስ ምድር ውጡ፤ ነገር ግን እናንተ አንገተ ደንዳና ሕዝብ ናችሁና በመንገድ እንዳላጠፋችሁ እኔ በመካከላችሁ አልወጣም።”

⁴ሕዝቡም ይህን የሚያሳዝን ወሬ በሰሙ ጊዜ አዘኑ፤ ማንም ጌጡን አላጠለቀም።

⁵አባታችን ሙሴን እንዲህ ብሎት ነበርና፤ “ለእስራኤል ሕዝብ እንዲህ በላቸው፤ ‘እናንተ አንገተ ደንዳና ሕዝብ ናችሁ፤ ለአንዲት ቅጽበት እንኳ በመካከላችሁ ብወጣ ኖሮ ባጠፋኋችሁ ነበር። አሁንም በእናንተ ላይ ምን እንደማደርግ እወስን ዘንድ ጌጣችሁን አውልቁ።’”

⁶ስለዚህ የእስራኤል ሕዝብ ከኮሬብ ተራራ ጀምሮ ጌጣቸውን አወለቁ።

የመገናኛው ድንኳን

⁷ሙሴም ድንኳኑን ወስዶ ከሰፈሩ ውጭ፣ ከሰፈሩ ርቆ ይተክለው ነበር፤ የመገናኛውም ድንኳን ብሎ ጠራው። አባታችንን የሚሻ ሁሉ ከሰፈሩ ውጭ ወዳለው የመገናኛ ድንኳን ይወጣ ነበር። ⁸ሙሴም ወደ ድንኳኑ በወጣ ጊዜ ሁሉ ሕዝቡ ሁሉ ተነሥተው እያንዳንዳቸው በየድንኳናቸው ደጃፍ ይቆሙ፣ ሙሴም እስኪገባ ድረስ ይከታተሉት ነበር። ⁹ሙሴም ወደ ድንኳኑ በገባ ጊዜ ሁሉ የደመናው ዐምድ ወርዶ በደጃፉ ይቆም፣ አባታችንም ከሙሴ ጋራ ይነጋገር ነበር። ¹⁰ሕዝቡም ሁሉ የደመናውን ዐምድ በድንኳኑ ደጃፍ ቆሞ ባዩ ጊዜ ተነሥተው እያንዳንዳቸው በየድንኳናቸው ደጃፍ ይሰግዱ ነበር። ¹¹አባታችንም ሰው ከወዳጁ ጋራ እንደሚነጋገር ከሙሴ ጋራ ፊት ለፊት ይነጋገር ነበር። ሙሴም ወደ ሰፈሩ ይመለስ ነበር፤ ነገር ግን ብላቴናው አገልጋዩ የነዌ ልጅ ኢያሱ ከድንኳኑ አይለይም ነበር። ^a a v11 “ፊት ለፊት” መነጋገር ማለት አባታችን እንደ ወዳጆች ከሙሴ ጋራ በቀጥታና በቅርበት ተነጋገረ ማለት ነው፤ ቍጥር 20 ማንም ሊያየው በሕይወት ሊተርፍ እንደማይችል የሚናገረውን የተገለጠ ፊቱን ሙሴ አየ ማለት አይደለም።

የአባታችን ፊት ከእኛ ጋራ

¹²ሙሴም አባታችንን እንዲህ አለው፤ “እነሆ፣ ‘ይህን ሕዝብ አውጣ’ ትለኛለህ፤ ነገር ግን ከእኔ ጋራ የምትልከውን አላሳወቅኸኝም። ሆኖም ‘በስምህ ዐውቅሃለሁ፤ በፊቴም ሞገስ አግኝተሃል’ ብለሃል። ¹³አሁንም በፊትህ ሞገስ አግኝቼ እንደ ሆነ፣ አንተን ዐውቅ ዘንድና በፊትህ ሞገስ ማግኘቴን እቀጥል ዘንድ መንገድህን እባክህ አሳየኝ። ይህም ሕዝብ ወገንህ መሆኑን ዐስብ።”

¹⁴እርሱም፣ “ፊቴ ከአንተ ጋራ ይሄዳል፤ ዕረፍትም እሰጥሃለሁ” አለ።

¹⁵ሙሴም፣ “ፊትህ ከእኛ ጋራ የማይሄድ ከሆነ ከዚህ አታውጣን። ¹⁶እኔና ሕዝብህ በፊትህ ሞገስ ማግኘታችን በሌላ በምን ይታወቃል? እኔና ሕዝብህ በምድር ፊት ካሉ ሕዝቦች ሁሉ ተለይተን እንድንሆን አንተ ከእኛ ጋራ በመሄድህ አይደለምን?” አለው።

¹⁷አባታችንም ሙሴን እንዲህ አለው፤ “በፊቴ ሞገስ አግኝተሃልና፣ በስምህም ዐውቅሃለሁና የጠየቅኸውን ይህን ነገር አደርጋለሁ።”

¹⁸ከዚያም ሙሴ፣ “እባክህ ክብርህን አሳየኝ” አለ።

¹⁹እርሱም እንዲህ አለ፤ “በጎነቴን ሁሉ በፊትህ አሳልፋለሁ፤ ስሜንም በፊትህ አውጃለሁ። ለምምረው እምረዋለሁ፤ ለምራራውም እራራለታለሁ።” ²⁰ነገር ግን፣ “ማንም አይቶኝ በሕይወት ሊኖር አይችልምና ፊቴን ልታይ አትችልም” አለ። ²¹አባታችንም እንዲህ አለ፤ “በእኔ አጠገብ ስፍራ አለ፤ አንተም በዐለቱ ላይ ትቆማለህ፤ ²²ክብሬ ሲያልፍ በዐለቱ ንቃቃት ውስጥ አኖርሃለሁ፤ እስካልፍም ድረስ በእጄ እሸፍንሃለሁ። ²³ከዚያም እጄን አነሣለሁ፤ አንተም ጀርባዬን ታያለህ፤ ፊቴ ግን አይታይም።”