Shongzā 33

33 ¹Ithumwui Avāna Mosesli hānga, "Na kala Egyptwui eina na thānkhavā mibing chi, Abraham, Isaac, kala Jacobli, ‘Chi ina nawui ara̱-azāli mira,’ da ina ngashitmi kahai ngalei chishong apam hiwui eina zatphoklu. ²Ina nawui mangāli kazingrao akha chihovāra, kala Canaannaobing, Amornaobing, Hitnaobing, Periznaobing, Hivnaobing, kala Jebusnaobingli kashamshokra. ³Seina̱ eina khuira̱ khalonga ngalei chishong kālu, kha ina nathumwui ngachaili makāmara, kaja nathum marākkapaiya mimānga, kala ina shongfali nathumli sāshimānhaopaira."

⁴Mibingna khangachā chānpao hi shālaga, athumna chapngachāda, khipānakha awui sāri-khongnāng masangthuwa.

⁵Kaja ithumwui Avāna Mosesli hānga, "Israelwui mibingli hānglu: Nathum marākkapaiya mimānga. Ina hunkha akhamāng nathumwui ngachaili kālakha, ina nathumli sāshimānhaora. Ina nathumli khi sārakhala da bicharwo sā khavai, ara nathumwui sāri-khongnāng chi thahaimilu."

⁶Chiwui vang Israelwui mibingna Horeb Kaphungwui eina thuilaga athumwui sāri-khongnāng raimihaowa.

Kazip Khavai Kachonshim

⁷Mosesna kachonshim chi khuilaga rāmrahwui ayarli, rāmrahwui eina katāda sākāra, chili kazip khavai kachonshim da hoi. Ithumwui Avāli phākazat mi saikorana rāmrahwui ayarli khalei kazip khavai kachonshimli shokra. ⁸Mosesna kachonshimshong shok tharan, mi saikora ngakarthuida, mi kachiva̱ awui kachonshim khāmongpheili nganingda, Moses kachonshimli mazangranglakha eina tangda ali yangchinga. ⁹Mosesna kachonshimli azang tharan, muiyā pakra̱ chi tāda, khāmongpheili nganinga, kala ithumwui Avāna Mosesli ngazeka. ¹⁰Mi saikorana muiyā pakra̱ chi kachonshim khāmongpheili nganinga chi theilaga, athumna mi kachiva̱ awui kachonshim khāmongpheili ngakarthuida khoruma. ¹¹Chithāda mi akhana ngasotnaoli ngazek thada ithumwui Avāna Mosesli mashā eina ngazeka. Mosesna rāmrahli unghaowa, kha awui yaronnao rao Nunwui naomayara Joshuana kachonshimwui eina mashokthuwa. ^a a v11 "Mashā eina" ngazek jiawui khalat chiya, ithumwui Avāna Mosesla, ngasotnaobingna sā thada, tharlak eina kala ninglem eina ngazekna — Mosesna awui fakharor makhalei mangā theida da maningmana, chi theilaga khipānakha maringshaprarmana da vaks 20na hānga.

Ithumwui Avāwui Mangā Ithumla Ngasovā

¹²Mosesna ithumwui Avāli hānga, "Yanglu, nana ili, ‘Mibing hi khuirālu,’ da hānga, kha khipāli nana ili ngasovā ngasakrakhala kaji chi ili mahānglakmana. Chithālala nana, ‘Ina nali namei eina thei, kala nana iwui mangāli ngahānkhangaia samphanga,’ da hānga. ¹³Ara, ina nawui mikli ngahānkhangai samphangakha, iwui vang nawui apong ili theingasakmilu, chithākha ina nali theida nawui mikli ngahānkhangai samphangchingra. Hi phaningunglu, yur hi nawui mibingna."

¹⁴Chieina ana hānga, "Iwui mangā nala ngasovāra, kala ina nali ngasāmkakhui mira."

¹⁵Mosesna ali hānga, "Nawui mangā ithumla mangasovaakha, ithumli hiwui eina makhuikharāmilu. ¹⁶Chithākha kathada, ina kala nawui mibingna, nawui mangāli ngahānkhangai samphanga kaji chi theira? Nana ithumla ngasovā chieina maningmalā, chithākha ithum, ina kala nawui mibingna, okathuiwui mangāchangli khalei mi kachikathā yur saikorawui eina ngateihaira?"

¹⁷Chieina ithumwui Avāna Mosesli hānga, "Nana kapo kahai hi ina sāra, kaja nana iwui mangāli ngahānkhangai samphanga, kala ina nali namei eina thei."

¹⁸Chieina Mosesna hānga, "Ina nali kapona, nawui tekhamatei ili theingasakmilu."

¹⁹Ana hānga, "Iwui kaphā saikora nawui mangāli kān ngasakra, kala nawui mangāli iwui ming ngayaovāra. Ina lumashanmi khavai mi chili lumashanmira, kala ina lukhamashan pemtinghai khavai mi chili lukhamashan pemtinghaira." ²⁰Kha ana hānga, "Nana imai matheirarmara, kaja ili theiakha mi khipākha maringrarmara." ²¹Kala ithumwui Avāna hānga, "Iwui ngalemli apam akha lei; na lunghārtungli nganingra, ²²iwui tekhamatei kānda leilakha, ina nali lunghārkhur akhali sangra kala ina makānthuiranglakha eina tangda ipāng eina nali farormira. ²³Chieina ina ipāng khuithuihaira, kala nana iwui khumkhor theira; imai chi matheirarmara."