Esekiẹli 27

27 ¹Ọ̀rọ̀ Baba wa sì tọ̀ mí wá pé:

²“Ní báyìí, ìwọ ọmọ ènìyàn, gbé arò sókè lórí Tírè, ³kí o sì sọ fún Tírè, tí ń gbé ní ẹnu ọ̀nà òkun, oníṣòwò fún àwọn ènìyàn ní ọ̀pọ̀lọpọ̀ etíkun: Báyìí ni Baba Olódùmarè wí pé: ‘Tírè, ìwọ wí pé, “Èmi pé ní ẹwà.”’ ⁴Ààlà rẹ wà ní àárín òkun; àwọn akọ́lé rẹ mú ẹwà rẹ pé. ⁵Wọ́n fi igi firi láti Seniri ṣe gbogbo pákó rẹ; wọ́n mú igi kedari láti Lebanoni láti fi ṣe ọ̀pá-ọkọ̀ fún ọ. ⁶Wọ́n fi igi óákì ti Baṣani ṣe àwọn ọ̀pá-ìwàkọ̀ rẹ; wọ́n fi eyín erin tí a tò sínú igi kipírésì láti etíkun Saipurọ̀sì ṣe pátákó ọkọ̀ rẹ. ⁷Aṣọ afẹ́fẹ́ ọkọ̀ rẹ jẹ́ aṣọ ọ̀gbọ̀ dáradára tí a ṣe lọ́ṣọ̀ọ́ láti Ejibiti, tí ń ṣe àsíá rẹ; ìbòrí rẹ jẹ́ aláwọ̀ búlúù àti elése àlùkò láti etíkun Eliṣa. ⁸Àwọn ará Sidoni àti Arfadi ni àwọn awakọ̀ rẹ; àwọn ọlọ́gbọ́n rẹ, Tírè, ni ó wà nínú rẹ gẹ́gẹ́ bí atọ́nà ọkọ̀ rẹ. ⁹Àwọn àgbà Gebali àti àwọn akọ́ṣẹ́mọṣẹ́ rẹ̀ wà nínú rẹ, wọ́n ń dí àwọn àlàfo rẹ; gbogbo ọkọ̀ ojú-omi òkun pẹ̀lú àwọn atukọ̀ wọn wá sọ́dọ̀ rẹ láti ṣe ìpààrọ̀ ọjà rẹ. ¹⁰Persia àti Ludi àti Puti wà nínú ẹgbẹ́ ọmọ-ogun rẹ, àwọn jagunjagun rẹ. Wọ́n gbé asà àti àṣíborí wọn kọ́ sí ara odi rẹ, wọ́n fún ọ ní ògo. ¹¹Àwọn ọkùnrin Arfadi àti ẹgbẹ́ ọmọ-ogun tìrẹ wà lórí odi rẹ ní àyíká, àwọn ará Gamadi sì wà nínú àwọn ilé-ìṣọ́ rẹ. Wọ́n gbé asà wọn kọ́ sí ara odi rẹ ní àyíká; wọ́n mú ẹwà rẹ pé.

¹²“Tarṣiṣi bá ọ ṣòwò nítorí ọ̀pọ̀lọpọ̀ ọrọ̀ rẹ ti onírúurú, wọ́n fi fàdákà, irin, tìnì, àti òjé ṣe ìpààrọ̀ fún ọjà rẹ.

¹³“Jafani, Tubali, àti Meṣeki bá ọ ṣòwò ní ti ẹ̀mí ènìyàn àti ohun èlò idẹ.

¹⁴“Láti Beti-Togarma ni wọ́n ti fi ẹṣin, ẹṣin ogun, àti ìbáaka ṣe ìpààrọ̀ fún ọjà rẹ.

¹⁵“Àwọn ọkùnrin Dedani bá ọ ṣòwò; ọ̀pọ̀lọpọ̀ etíkun ni ó jẹ́ ọjà rẹ, wọ́n fi eyín erin àti igi èbónì san owó fún ọ.

¹⁶“Aramu bá ọ ṣòwò nítorí ọ̀pọ̀lọpọ̀ ọjà rẹ, wọ́n fi òkúta turikuoisi, aṣọ elése àlùkò, iṣẹ́ aránṣọ, aṣọ ọ̀gbọ̀ dáradára, iyùn, àti òkúta rubi ṣe ìpààrọ̀ fún ọjà rẹ.

¹⁷“Juda àti Israẹli bá ọ ṣòwò: ọkà wíìtì láti Minniti, ìyẹ̀fun, oyin, òróró, àti ìkunra.

¹⁸“Damasku bá ọ ṣòwò nítorí ọ̀pọ̀lọpọ̀ ọjà rẹ, àti ọ̀pọ̀ ọrọ̀ rẹ ti onírúurú, pẹ̀lú wáìnì Helboni àti irun àgùntàn Sahari. ¹⁹Fedani àti Jafani láti Usali ṣe ìpààrọ̀ fún ọjà rẹ; irin tí a rò, kasia, àti kalamu wà nínú ọjà rẹ.

²⁰“Dedani bá ọ ṣòwò ní ti aṣọ gàárì fún gígùn ẹṣin.

²¹“Arabia àti gbogbo àwọn ọmọ-aládé Kedari ni àwọn oníbàárà rẹ, wọ́n ń ṣòwò ọ̀dọ́-àgùntàn, àgbò, àti ewúrẹ́.

²²“Àwọn oníṣòwò Ṣeba àti Raama bá ọ ṣòwò, wọ́n fi àṣàyàn gbogbo tùràrí dáradára, gbogbo òkúta iyebíye, àti wúrà san owó fún ọjà rẹ.

²³“Harani, Kanne, àti Edeni, àwọn oníṣòwò Ṣeba, Aṣuri, àti Kilmadi bá ọ ṣòwò. ²⁴Àwọn wọ̀nyí bá ọ ṣòwò ní ti aṣọ dáradára, aṣọ aláwọ̀ búlúù àti aṣọ aránṣọ, àti ẹní aṣọ aláràbarà tí a fi okùn dì tí a sì so pọ̀, ní ibi ọjà rẹ. ²⁵Àwọn ọkọ̀ ojú-omi Tarṣiṣi ni ó kó ọjà rẹ ní ọ̀wọ̀ọ̀wọ́. Báyìí ni ìwọ ṣe kún, tí a sì dì ẹrù wíwúwo bò ọ́ ní àárín òkun. ²⁶Àwọn awakọ̀ rẹ mú ọ jáde sínú omi ńlá; afẹ́fẹ́ ìlà-oòrùn fọ́ ọ ní àárín òkun. ²⁷Ọrọ̀ rẹ, ọjà rẹ, ẹrù-ọjà rẹ, àwọn atukọ̀ rẹ àti àwọn atọ́nà ọkọ̀ rẹ, àwọn tí ń dí àlàfo rẹ, àwọn oníṣòwò ọjà rẹ, àti gbogbo àwọn jagunjagun rẹ tí ó wà nínú rẹ, pẹ̀lú gbogbo àwọn ìyókù tí ó wà nínú ọkọ̀, yóò rì sínú àárín òkun ní ọjọ́ ìṣubú rẹ. ²⁸Nígbà tí ìró igbe àwọn atọ́nà ọkọ̀ rẹ bá dún, ilẹ̀ pápá á mì tìtì. ²⁹Gbogbo àwọn tí ń mú ọ̀pá-ìwàkọ̀, àwọn atukọ̀ àti gbogbo àwọn atọ́nà ọkọ̀ ojú-omi òkun, yóò sọ̀kalẹ̀ kúrò nínú ọkọ̀ wọn; wọn yóò dúró sórí ilẹ̀, ³⁰wọn yóò sì gbé ohùn wọn sókè lórí rẹ, wọn yóò sì sọkún kíkorò. Wọn yóò ku erùpẹ̀ sí orí wọn, wọn yóò sì yí nínú eérú; ³¹wọn yóò fá orí wọn pálapàla nítorí rẹ, wọn yóò sì wọ aṣọ ọ̀fọ̀, wọn yóò sì sunkún lórí rẹ nínú ìkorò ọkàn, pẹ̀lú ọ̀fọ̀ kíkorò. ³²Nínú igbe ẹkún wọn, wọn yóò kọ orin arò fún ọ, wọn yóò sì ṣọ̀fọ̀ lórí rẹ pé: “Ta ni ó rí bí Tírè rí, bí ẹni tí a pa ẹnu rẹ̀ mọ́ ní àárín òkun?” ³³Nígbà tí ọjà rẹ jáde láti inú òkun, ìwọ tẹ́ ọ̀pọ̀ ènìyàn lọ́rùn; pẹ̀lú ọ̀pọ̀lọpọ̀ ọrọ̀ àti ẹrù-ọjà rẹ, ìwọ sọ àwọn ọba ayé di ọlọ́rọ̀. ³⁴Ní báyìí, òkun ti fọ́ ọ túútúú nínú ibú omi; ẹrù-ọjà rẹ àti gbogbo àwọn atukọ̀ rẹ ti bá ọ rì. ³⁵Gbogbo àwọn olùgbé etíkun ẹnu yà sí ọ, ẹ̀rù sì ń ba àwọn ọba wọn tìtì; ojú wọn sì dàrú. ³⁶Àwọn oníṣòwò láàrín àwọn ènìyàn fi ọ ṣẹ̀fẹ̀ pẹ̀lú súrúsúrú; ìwọ ti di ohun ẹ̀rù, ìwọ kì yóò sì sí mọ́ láéláé.’”