Esekiẹli 26

26 ¹Ní ọdún kọkànlá, ní ọjọ́ kìíní oṣù náà, ọ̀rọ̀ Baba wa tọ̀ mí wá wí pé:

²Ọmọ ènìyàn, nítorí tí Tirusi sọ lòdì sí Jerusalemu pé, “Àhà! Ẹnu ọ̀nà àwọn ènìyàn ti wó, ó ti ṣí sílẹ̀ sí mi. Ó ti dahoro; èmi yóò di ọlọ́rọ̀.” ³Nítorí náà, báyìí ni Baba Olódùmarè wí: Kíyèsí i, èmi lòdì sí ọ, ìwọ Tirusi. Èmi yóò mú ọ̀pọ̀lọpọ̀ orílẹ̀-èdè gòkè wá lòdì sí ọ, bí omi òkun ti ń gbé ìgbì rẹ̀ sókè. ⁴Wọn yóò pa ògiri Tirusi run, wọn yóò sì wó ilé ìṣọ́ rẹ̀ lulẹ̀; èmi yóò ha erùpẹ̀ rẹ̀ dànù, èmi yóò sì fi sílẹ̀ ní àpáta pàlàngà. ⁵Yóò di ibi ìtẹ́ àwọ̀n sí nínú òkun, nítorí èmi ti sọ ọ́, ni Baba Olódùmarè wí. Yóò sì di ìkógun fún àwọn orílẹ̀-èdè, ⁶a ó sì fi idà pa àwọn abúlé rẹ̀ tí ń bẹ ní ilẹ̀ orílẹ̀. Nígbà náà ni wọn yóò mọ̀ pé Èmi ni Baba.

⁷Báyìí ni Baba Olódùmarè wí: Kíyèsí i, èmi yóò mú Nebukadnessari ọba Babeli, ọba àwọn ọba, wá láti àríwá lòdì sí Tirusi, pẹ̀lú ẹṣin, kẹ̀kẹ́ ogun, àwọn ẹlẹ́ṣin, àti ọ̀pọ̀lọpọ̀ ogun ńlá. ⁸Òun yóò fi idà pa àwọn abúlé rẹ tí ń bẹ ní ilẹ̀ orílẹ̀, yóò kọ́ odi ìhámọ́ ti ogun sí ọ, yóò mọ ebè sí ọ, yóò sì gbé asà sókè sí ọ. ⁹Yóò fi ọ̀pá ìwólù rẹ̀ lu ògiri rẹ, yóò sì fi àáké rẹ̀ wó ilé ìṣọ́ rẹ lulẹ̀. ¹⁰Ẹṣin rẹ̀ yóò pọ̀ tó bẹ́ẹ̀ tí erùpẹ̀ wọn yóò fi bò ọ́. Ògiri rẹ yóò mì nítorí ariwo àwọn ẹlẹ́ṣin, kẹ̀kẹ́, àti kẹ̀kẹ́ ogun, nígbà tí yóò wọ ẹnu ọ̀nà rẹ bí àwọn ọkùnrin ti ń wọ ìlú tí a ti fọ́ ògiri rẹ̀ sílẹ̀. ¹¹Pátákò ẹṣin rẹ̀ yóò tẹ gbogbo ìgboro rẹ mọ́lẹ̀. Yóò fi idà pa àwọn ènìyàn rẹ, àwọn ọ̀wọ́n alágbára rẹ yóò sì wó lulẹ̀. ¹²Wọn yóò kó ọrọ̀ rẹ, wọn yóò ja ẹrù rẹ, wọn yóò wó ògiri rẹ palẹ̀, wọn yóò sì pa àwọn ilé rẹ tí ó dára run, wọn yóò ju òkúta rẹ, igi rẹ, àti ìdọ̀tì rẹ sínú omi òkun. ¹³Èmi yóò pa ariwo orin rẹ lẹ́nu mọ́; a kì yóò gbọ́ ohùn dùùrù rẹ mọ́. ¹⁴Èmi yóò sọ ọ́ di àpáta pàlàngà, ibi ìtẹ́ àwọ̀n sí. A kì yóò tún ọ kọ́ mọ́ láéláé, nítorí Èmi, Baba, ni ó ti sọ ọ́, ni Baba Olódùmarè wí.

¹⁵Báyìí ni Baba Olódùmarè wí fún Tirusi: Àwọn erékùṣù kì yóò ha mì nítorí ariwo ìṣubú rẹ, nígbà tí àwọn tí a ṣá lọ́gbẹ́ bá ń kérora, nígbà tí ìpakúpa bá kún inú rẹ bí? ¹⁶Nígbà náà ni gbogbo àwọn aládé òkun yóò sọ̀kalẹ̀ kúrò lórí ìtẹ́ wọn, wọn yóò bọ́ aṣọ ìgúnwà wọn sílẹ̀, wọn yóò sì bọ́ aṣọ oníṣẹ́ ọnà wọn. Wọn yóò fi ìwárìrì wọ ara wọn láṣọ, wọn yóò jókòó lórí ilẹ̀, wọn yóò máa wárìrì nígbà gbogbo, ẹnu yóò sì yà wọ́n sí ọ. ¹⁷Wọn yóò sì gbé ìpohùnréré ẹkún sókè nítorí rẹ pé: “Báwo ni ìwọ ṣe parun, ìlú olókìkí, ìwọ tí àwọn ènìyàn rẹ ti inú òkun wá—alágbára lórí òkun, ìwọ àti àwọn olùgbé inú rẹ, tí ẹ fi ẹ̀rù ba gbogbo àwọn tí ń gbé níbẹ̀!” ^a a v17 Tirusi jẹ́ ìlú-ìjọba erékùṣù ọlọ́rọ̀ kan tí agbára àti iye ènìyàn rẹ̀ dúró lórí òwò òkun. ¹⁸Nísinsìnyí àwọn erékùṣù wárìrì ní ọjọ́ ìṣubú rẹ; ọkàn àwọn erékùṣù tí ń bẹ nínú òkun dàrú nítorí ìlọ rẹ.

¹⁹Báyìí ni Baba Olódùmarè wí: Nígbà tí èmi bá sọ ọ́ di ìlú ahoro, bí àwọn ìlú tí a ti kọ̀ sílẹ̀ pẹ́, nígbà tí èmi bá mú ibú gòkè wá sórí rẹ, tí omi ńlá sì bò ọ́, ²⁰nígbà náà ni èmi yóò mú ọ sọ̀kalẹ̀ pẹ̀lú àwọn tí ń sọ̀kalẹ̀ lọ sínú kòtò, sọ́dọ̀ àwọn ènìyàn ìgbàanì. Èmi yóò mú ọ gbé inú ilẹ̀ ìsàlẹ̀, láàrin àwọn ahoro àtijọ́, pẹ̀lú àwọn tí ń sọ̀kalẹ̀ lọ sínú kòtò, kí ìwọ má baà padà wá tàbí kí o rí ipò gbà ní ilẹ̀ alààyè. ²¹Èmi yóò sọ ọ́ di ohun ìpanilẹ́rù, ìwọ kì yóò sì sí mọ́. A ó máa wá ọ ṣùgbọ́n a kì yóò rí ọ mọ́ láéláé, ni Baba Olódùmarè wí.