ኣቦ ንጢሮስ ይፈርዳ

ጢሮስ ካብ ዕንወት ኢየሩሳሌም ትጥቀም፥ ደገ ስለ ዝተሰብረ ድማ ዝበዝሐ ንግዲ ትፅበ። ኣቦና ኣህዛብ ከም ማዕበል ከም ዝመፅዋ ይዛረብ። ናቡከደነፆር ንቕፅራ ኽፈርስ፥ ኣእማና ናብ ባሕሪ ክድርበ፥ እቲ ቦታ ድማ መንፀፊ መርበብ ዝኸውን ጥራሕ ከውሒ ኮይኑ ክተርፍ እዩ።

ምዕራፍ 26።

በታ ዓሰርተ ሓደ ዓመት፥ በታ ቐዳመይቲ መዓልቲ እታ ወርሒ፥ ቃል ኣቦና ናባይ መፀ፦

ኦ ወዲ ሰብ፥ ጢሮስ ብዛዕባ ኢየሩሳሌም ‘ኣሰይ! እታ ደገ ህዝብታት ተሰቢራ፥ ናባይ ተኸፊታ፤ ንሳ ዓኒያ ኣላ፤ ኣነ ሃብቲ ኽእክብ እየ’ ኢላ እያ እሞ፥ ስለዙይ ልዑል ኣቦ ከምዙይ ይብል ኣሎ፦ እንሆ፥ ኦ ጢሮስ፥ ኣነ ፀላኢኺ እየ። ከምቲ ባሕሪ ማዕበሉ ዘልዕል፥ ብዙሓት ኣህዛብ ናባኺ ኸልዕል እየ። ንሳቶም ድማ ንቕፅሪ ጢሮስ ከፍርስዎ፥ ንግምቢታታ ኸዓ ኼፍርስወን እዮም፤ ኣነውን ሓመዳ ካብኣ ሓኺኸ፥ ጥራሕ ከውሒ ክገብራ እየ። ኣብ ማእኸል ባሕሪ መንፀፊ መርበብ ክትከውን እያ፤ ኣነ ተዛሪበ ኣለኹ እሞ፥ ይብል ኣሎ ልዑል ኣቦ። ንሳ ድማ ንኣህዛብ ምርኮ ክትከውን እያ፤ እተን ኣብ መሮር ዘለዋ ቍሸታታ ኸዓ ብሰይፊ ክቕተላ እየን። ሽዑ ኣነ ኣቦ ምዃነይ ክፈልጡ እዮም።

ልዑል ኣቦ ከምዙይ ይብል ኣሎ፦ እንሆ፥ ነቲ ንጉስ ነገስታት ዝኾነ ናቡከደነፆር ንጉስ ባቢሎን፥ ምስ ኣፍራስን ሰረገላታትን ፈረሰኛታትን ብዙሕ ጭፍራ ዓብዪ ሰራዊትን፥ ካብ ሰሜን ናብ ጢሮስ ከምፅኦ እየ። ነተን ኣብ መሮር ዘለዋ ቍሸታትኺ ብሰይፊ ኽቐትለን እዩ፤ ኣባኺ ድማ መካበቢ ኽሰርሕ፥ ኣባኺ ድልድል ሓመድ ክገብር፥ ኣባኺ ኸዓ ዋልታ ኼልዕለልኪ እዩ። ነቲ ቕፅርኺ በቲ መህረሚኡ ኽሃርሞ፥ ንግምቢታትኪ ኸዓ ብምሳራቱ ኼፍርሰን እዩ። ኣፍራሱ ብዙሓት ብምዃኖም፥ ተጎጎኦም ክኽድነኪ እዩ። ከምቲ ናብ ዝተሰብረ ቕፅሪ ዘለዋ ኸተማ ዝኣትዉ ሰባት፥ ንሱ ናብ ደገኺ ኽኣቱ እንተሎ፥ ካብ ድምፂ ፈረሰኛታትን ዓረብያታትን ሰረገላታትን ዝተልዓለ፥ ቕፅርኺ ኽርዕድ እዩ። ብሸኰና ኣፍራሱ ንዅለን ኣደባባያትኪ ኽረግፀን እዩ፤ ንህዝብኺ ብሰይፊ ኽቐትሎም፥ ሓያላት ኣዕማድኪ ኸዓ ናብ ምድሪ ኽወድቃ እየን። ሃብትኺ ኽዘምቱ፥ ኣቑሕኺ ኽመዝብሩ፥ ቕፅርኺ ኸፍርሱ፥ ፅቡቓት ኣባይትኺ ኸዓ ኼፍርሱ እዮም፤ ኣእማንኪ ኣእዋምኪ ሓመድኪ ድማ ናብ ማእኸል ባሕሪ ኽድርብይዎ እዮም። ጫውጫውታ መዛሙርኪ ኸህድእ እየ፤ ድምፂ መሰንቆታትኪ ደጊም ኣይስማዕን እዩ። ጥራሕ ከውሒ ኽገብረኪ እየ፤ መንፀፊ መርበብ ድማ ክትኮኒ ኢኺ። ኣነ ኣቦ ተዛሪበ ኣለኹ እሞ፥ ደጊም ኣይትህነፅን ኢኺ፤ ይብል ኣሎ ልዑል ኣቦ።

ልዑል ኣቦ ንጢሮስ ከምዙይ ይብላ ኣሎ፦ እቶም ቍሱላት እንትግዕሩ፥ ኣብ ማእኸልኪ ቅትለት እንትፍፀም፥ እተን ደሴታት ካብ ድምፂ ውድቀትኪ ዝተልዓለ ኣይርዕዳንዶ? ሽዑ ኵሎም መሳፍንቲ ባሕሪ ኻብ ዙፋናቶም ክወርዱ፥ ልብሶም ከውርዱ፥ ዝተጠልፈ ኽዳውንቶም ድማ ከውፅኡ እዮም። ራዕዲ ተኸዲኖም ኣብ ምድሪ ክቕመጡ፥ ኵሉ ጊዜ እናርዓዱ ብዛዕባኺ ኽስደምሙ እዮም። ብዛዕባኺ መልቀስ ኣልዒሎም ከምዙይ ክብሉ እዮም፦ ‘ኦ እታ ስምኺ ዝተፈለጠ ኸተማ፥ ካብ ባሕሪ ብህዝቢ እተመላእኺ፥ ከመይ ጌርኪ ጠፋእኪ! ንስኽን ምስ ተቐማጦኽን ኣብ ባሕሪ ሓያላት ኔርክን፥ ንዅሎም ኣብኣ ዝነበሩ ኸዓ ራዕድኽን ኣውዲቕክንሎም ኔርክን!’ ^a ሕዚ እተን ደሴታት በታ መዓልቲ ውድቀትኪ ይርዕዳ፤ እተን ኣብ ባሕሪ ዘለዋ ደሴታት ድማ ብምሕላፍኪ ይሽበራ።

ልዑል ኣቦ ከምዙይ ይብል ኣሎ፦ ከምተን ካብ ጥንቲ ዝተሓደጋ ኸተማታት፥ ኣነ ባዲማ ኸተማ ምስ ገበርኩኺ፥ ነቲ መዓሙቝ ኣብ ልዕሊኺ ምስ ኣልዓልኩ፥ እቲ ዓብዪ ማያትውን ምስ ከደነኪ፥ ሽዑ ምስቶም ናብ ጕድጓድ ዝወርዱ፥ ናብቶም ናይ ጥንቲ ህዝቢ ኸውርደኪ እየ። ምስቶም ናብ ጕድጓድ ዝወርዱ ኸዓ ኣብ ማእኸል ናይ ጥንቲ ዑናታት፥ ኣብታ ታሕተዋይ ምድሪ ኸቕምጠኪ እየ፤ ምእንቲ ኸይትምለሲ፥ ኣብ ምድሪ ህያዋን ድማ ስፍራ ኸይትሕዚ። ዜፍርሕ መወዳእታ ኸምፅኣልኪ እየ፥ ደጊምውን ኣይክትህልውን ኢኺ። ክትድለዪ ኢኺ፥ ግና ደጊም ከቶ ኣይክትርኸብን ኢኺ፤ ይብል ኣሎ ልዑል ኣቦ።