Avāna Tyreli Bichar Sāna
Jerusalem ramcho kahaili Tyrena kalen sāmphanga, keinung wui kā tekhaira, leih kachungkha sāra da phaninga. Ithumwui Avāna, ngayi khangaphao thāda yurbingna ali ngarar khavai rāra da hānga. Nebuchadnezzarna awui kuiung tekra, awui ngalungbing ngayilungli horsangra, kala apam chi khailan hārkhavai ngalung khamuk ngasāra.
26 1Zingkum tharāda akhali, kachāngwui zimiksho khareli, ithumwui Avāwui tui ili rāhānga:
2Miwui naomayara, Tyrena Jerusalemli phenda, 'Aha! Mibingwui ngavei sākhaihaira, ili shohaira. Ana ja̱ta ngasāhaira; ina shāngngasakra' da kahāngwui vang, 3Chiwui vang eina Proho Avāna hithāda hānga: Yanglu, O Tyre, ina nali mamayāmana. Shamadruna awui khangaphao ngaphoka thāda, ina yur kachungkhali nawuitungli ngaphokra. 4Athumna Tyrewui phākho sāshimānra kala awui dolanbing sākhaira; ina awui lui serkhaida ali tāngpat kahai lunghār ngasakra. 5Ana shamadrulungli khailan hamkhavai pam sāra, kaja ina hānghaira, da Proho Avāna hānga. Ana yurbingwui vang ngaponkakhui sāra, 6kala maingātta khalei awui kha̱bing raighai eina shaothatra. Chieina athumna I Avāna da theira.
7Proho Avāna hithāda hānga: Yanglu, ina Babylonwui awunga, awungabingwui awunga Nebuchadnezzarli, sigui, charfa, sigui katongabing, kala raimi kachungkha eina ngasoda, atungshongwui eina Tyrewuitungli khuirāra. 8Ana raighai eina nawui maingātta khalei kha̱bing shaothatra, nawuitungli rākuikhanamwui raipan sāsangda, nawuitungli rampho sākāda, nawuitungli chāngvei phungra. 9Ana awui raikhotkhonna nawui phākho shaora, kala awui ngahāna nawui dolanbing sākhaira. 10Awui sigui kachungkha eina, awui chifana nali farora. Phākho sākhaihai keinungli mibing kazang thāda ana nawui ngaveili kazang tharan, sigui katongabing, seigari, kala charfawui khonna nawui phākho nganukra. 11Awui siguiwui pheikhon eina nawui chānrei saikora naikazamra. Ana raighai eina nawui mibing shaothatra, kala nawui pangshapa pākra̱bing ngaleitungli pitāra. 12Athumna nawui lan ngaponkhuira, nawui otbing sākazamra, nawui phākho sākhaira, kala nawui shim khamathābing sāshimānra, nawui lunggui, thing, kala thothap chi shamadrulungli horra. 13Ina nawui laakhon ngaunkakharop chi khuithuihaora; nawui tingteilā khon kalā mashāluimara. 14Ina nali tāngpat kahai lunghār, khailan hamkhavai pam ngasakra. Na kalā masākārarluimara, kaja ina, Avāna, hānghaira, da Proho Avāna hānga.
15Proho Avāna Tyreli hithāda hānga: Nawui kongluiwui khonna, khamā za̱bing ngahuida, sākathat nawui alungli chipem tharan, shamadrupheibing manganukmala? 16Chieina shamadruwui khamungabing saikora athumwui wungpamkhong eina nemthuira, athumwui sāri hortāda, aphor phorkasang kachon khuithuira. Kathira eina ngavailaga, ngaleitungli pamra, mikkhayip kachida chihuiran eina, nali matakhakhaira. 17Athumna nawuitungli chapngachāra: 'Na kathāda shimānhao, keinung mingkhamayāng, na shamadruwui eina mi chipem kahai, shamadrutungli kapangpanga, na kala nawui kapānbing, chili khalei saikorawuitungli khangachee sākhangasaka kahaibing!' a a v17 Tyre chi shamadrulungli khalei keinung kashānga akhana, awui pangshap kala mishing chi shamadru leihkhalonawui tungli sākā kahaina. 18Ara ngayipheibing nawui kongluiwui zimiksholi nganuka; shamadruli khalei yikuirambing na kashimānwui vang khakshingakhaira.
19Proho Avāna hithāda hānga: Ina nali ramcho keinung sāngasak tharan, achālakha eina horkahai keinungbing thāda, ina nawuitungli kathuka thuingasakta kala hakkhamahā tara̱na nali kheithui tharan, 20Chieina ina nali Chomli zangkahaibing, achālakhawui mibing chi ngasoda sheitāra. Ina nali achālakhawui ngayāng kahaibing ngachaili, Chomli zangkahaibing chi ngasoda azingshong okathuili pamngasakra; chieina nana malatungmara kala kharingabingwui ngaleili napam masamphangmara. 21Ina nali khangachee kahai shimān sangmira, kala na maleiluimara. Nali phāra, kha khipānakha matheithuluimara, da Proho Avāna hānga.
