Uba Ya Hukunta Taya

Taya tana cin riba daga lalacewar Urushalima, tana sa ran ƙarin ciniki yanzu da aka karya ƙofar. Ubanmu ya ce al'ummai za su taso mata kamar raƙuman ruwa. Nebukadnezzar zai huda katangarta, za a zubar da duwatsunta cikin teku, wurin kuma ya zama dutse tsirara inda ake shanya tarun kamun kifi.

Babi na 26.

A shekara ta sha ɗaya, a rana ta farko ga wata, sai maganar Ubanmu ta zo mini,

Ɗan mutum, domin Taya ta yi magana a kan Urushalima, ta ce, ‘Ahaa! An farfashe ƙofar al'ummai, an buɗe ta a gare ni. Ta zama kango; zan wadata.’ Saboda haka ga abin da Uba Mai Iko Dukka ya ce, Ga shi, ina gāba da ke, Taya. Zan kawo al'ummai masu yawa su yāke ki, kamar yadda teku yake tunkuɗa raƙuman ruwansa. Za su rushe katangun Taya su rurrushe hasumiyoyinta; zan kakkaɓe ƙasarta in bar ta dutse wofi. Za ta zama wurin shanya taru a cikin teku, gama na yi magana, in ji Uba Mai Iko Dukka. Za ta zama ganima ga al'ummai, za a kuma karkashe ƙauyukanta da suke cikin ƙasa da takobi. Sa'an nan za su sani ni ne Uba.

Ga abin da Uba Mai Iko Dukka ya ce, Ga shi, zan kawo wa Taya Nebukadnezzar sarkin Babila, sarkin sarakuna, daga arewa, tare da dawakai, da karusai, da mahaya dawakai, da runduna mai girma ta mayaƙa masu yawa. Zai karkashe ƙauyukanki da suke cikin ƙasa da takobi, yă kafa shingen yāƙi ya kewaye ki, yă tara tudun hawa a kan ki, yă kuma ɗaga garkuwoyi a kan ki. Zai farfashe katangunki da gungumen yāƙinsa, yă kuma rurrushe hasumiyoyinki da gatarorinsa. Dawakansa suna da yawa har ƙurarsu za ta rufe ki. Katangunki za su yi rawa saboda ƙarar mahaya dawakai, da kekuna, da karusai, sa'ad da ya shiga ƙofofinki kamar mutanen da suke shiga birnin da aka farfashe katangarsa. Kofaton dawakansa za su tattake dukan titunanki. Zai karkashe mutanenki da takobi, ginshiƙanki masu ƙarfi kuma za su fāɗi ƙasa. Za su washe dukiyarki, su kwashe kayanki, su rushe katangunki, su kuma rurrushe gidajenki masu kyau, suna jefa duwatsunki, da itatuwanki, da tarkacenki a cikin teku. Zan dakatar da ƙarar waƙoƙinki; ba za a ƙara jin molunanki ba. Zan mai da ke dutse wofi, wurin shanya taru. Ba za a ƙara gina ki ba, gama ni, Uba, na yi magana, in ji Uba Mai Iko Dukka.

Ga abin da Uba Mai Iko Dukka ya ce wa Taya, Ashe, bakin tekuna ba za su yi rawa saboda ƙarar fāɗuwarki ba, sa'ad da waɗanda aka ji musu ciwo suke nishi, sa'ad da kisan kai ya cika cikinki? Sa'an nan dukan sarakunan teku za su sauka daga kursiyoyinsu, su tuɓe rigunansu, su kuma cire tufafinsu masu adon ɗinki. Da suka yafa tsoro kamar riga, za su zauna a ƙasa, suna ta rawar jiki kullum, suna ta firgita saboda ke. Za su yi makoki a kanki, suna cewa, ‘Kaito, yadda kika hallaka, ke birni mashahuri, ke da mutane suka cika ki daga tekuna—mai iko a kan teku, ke da mazaunanki, waɗanda kuka razana dukan waɗanda suke zama a wurin!’ ^a Yanzu bakin tekuna suna rawar jiki a ranar fāɗuwarki; tsibirai da suke cikin teku sun firgita saboda shuɗewarki.

Ga abin da Uba Mai Iko Dukka ya ce, Sa'ad da na mai da ke birni kango, kamar biranen da aka daɗe ba a zaune ba, sa'ad da na kawo zurfin teku a kanki, manyan ruwaye kuma suka rufe ki, sa'an nan zan saukar da ke tare da waɗanda suke gangarawa zuwa rami, zuwa wurin mutanen zamanin dā. Zan zaunar da ke a ƙasa can ƙarƙashi, cikin kufai na dā, tare da waɗanda suke gangarawa zuwa rami, saboda haka ba za ki komo ba, ba kuwa za ki sami wuri a ƙasar masu rai ba. Zan kawo miki ƙarshe mai ban tsoro, ba kuwa za ki ƙara kasancewa ba. Za a neme ki amma ba za a ƙara samunki ba, in ji Uba Mai Iko Dukka.