ሕዝቅኤል 26

26 ¹በዐሥራ አንደኛው ዓመት፣ በወሩ በመጀመሪያው ቀን፣ የአባታችን ቃል ወደ እኔ እንዲህ ሲል መጣ፦

²የሰው ልጅ ሆይ፣ ጢሮስ በኢየሩሳሌም ላይ፣ ‘አሀ! የሕዝቦች በር ተሰብሯል፤ ወደ እኔም በርግዶ ተከፍቷል። እርስዋ ፈርሳ ተኝታለች፤ እኔም እበለጽጋለሁ’ ስላለች፣ ³ስለዚህ ጌታ አባታችን እንዲህ ይላል፦ ጢሮስ ሆይ፣ እነሆ፣ እኔ በአንቺ ላይ ነኝ። ባሕር ማዕበሉን እንደሚያስነሣ፣ ብዙ ሕዝቦችን በአንቺ ላይ አስነሣለሁ። ⁴የጢሮስን ቅጥር ያፈርሳሉ፤ ግንቦችዋንም ይናዳሉ፤ እኔም ዐፈሯን ፍቄ አስወግዳለሁ፤ ራቁቷን ዐለት አደርጋታለሁ። ⁵እኔ ተናግሬአለሁና በባሕር መካከል መረብ የሚዘረጉባት ቦታ ትሆናለች፤ ይላል ጌታ አባታችን። ለሕዝቦችም ምርኮ ትሆናለች፤ ⁶በየብሱ ያሉ መንደሮቿም በሰይፍ ይገደላሉ። ከዚያም እኔ አብ እንደ ሆንሁ ያውቃሉ።

⁷ጌታ አባታችን እንዲህ ይላል፦ እነሆ፣ የነገሥታት ንጉሥ የሆነውን የባቢሎንን ንጉሥ ናቡከደነፆርን ከሰሜን በጢሮስ ላይ አመጣለሁ፤ ከፈረሶች፣ ከሠረገሎች፣ ከፈረሰኞችና ከብዙ ጭፍሮች ከተውጣጣ ታላቅ ሠራዊት ጋር። ⁸በየብሱ ያሉ መንደሮችሽን በሰይፍ ይገድላል፤ በአንቺ ላይ የከበባ ግንብ ይሠራል፤ በአንቺ ላይ የዐፈር ቁልቁል ይከምራል፤ በአንቺም ላይ ጋሻዎችን ያነሣል። ⁹በጦር መናጃዎቹ ቅጥርሽን ይመታል፤ በመጥረቢያዎቹም ግንቦችሽን ያፈርሳል። ¹⁰ፈረሶቹ እጅግ ብዙ ከመሆናቸው የተነሣ ትቢያቸው ይሸፍንሻል። ቅጥር የተሰበረባትን ከተማ ሰዎች እንደሚገቡባት በበሮችሽ ሲገባ፣ ከፈረሰኞች፣ ከጋሪዎችና ከሠረገሎች ድምፅ የተነሣ ቅጥሮችሽ ይናወጣሉ። ¹¹የፈረሶቹ ኰቴ ጎዳናዎችሽን ሁሉ ይረግጣል። ሕዝብሽን በሰይፍ ይገድላል፤ ብርቱ ዐምዶችሽም መሬት ላይ ይወድቃሉ። ¹²ሀብትሽን ይበዘብዛሉ፤ ንብረትሽንም ይዘርፋሉ፤ ቅጥሮችሽን ያፈርሳሉ፤ ያማሩ ቤቶችሽንም ያጠፋሉ፤ ድንጋዮችሽን፣ እንጨትሽንና ፍርስራሽሽን በባሕር ውስጥ ይጥላሉ። ¹³የዘፈኖችሽን ጫጫታ አስቀራለሁ፤ የበገናዎችሽም ድምፅ ከእንግዲህ አይሰማም። ¹⁴ራቁትሽን ዐለት አደርግሻለሁ፤ መረብ የሚዘረጉብሽ ቦታ ትሆኛለሽ። ከእንግዲህ ዳግመኛ አትሠሪም፤ እኔ አብ ተናግሬአለሁና፤ ይላል ጌታ አባታችን።

¹⁵ጌታ አባታችን ለጢሮስ እንዲህ ይላል፦ ቍስለኞች በሚያቃስቱበት፣ ዕልቂትም በመካከልሽ በሚፈጸምበት ጊዜ፣ ከመውደቅሽ ድምፅ የተነሣ የባሕር ዳርቻዎች አይናወጡምን? ¹⁶በዚያን ጊዜ የባሕር ገዦች ሁሉ ከዙፋኖቻቸው ይወርዳሉ፤ ልብሶቻቸውንም ያወልቃሉ፤ የጥልፍ ልብሶቻቸውንም ያስወግዳሉ። መንቀጥቀጥን ተጐናጽፈው መሬት ላይ ይቀመጣሉ፤ በየቅጽበቱ እየተንቀጠቀጡ በአንቺ ይደነግጣሉ። ¹⁷ስለ አንቺም ሙሾ አውርደው እንዲህ ይላሉ፦ ‘ታዋቂዋ ከተማ ሆይ፣ እንዴት ጠፋሽ! አንቺ ከባሕሮች በሰዎች የተሞላሽ፣ በባሕር ላይ ኀያል የነበርሽ፣ አንቺና ነዋሪዎችሽ፣ በዚያ በሚኖሩ ሁሉ ላይ ድንጋጤን የምትዘሩ ነበራችሁ!’ ^a a v17 ጢሮስ በባሕር ንግድ ላይ ኀይሏና ሕዝቧ የተመሠረተ ባለጸጋ የደሴት ከተማ-አገር ነበረች። ¹⁸አሁን የባሕር ዳርቻዎች በመውደቅሽ ቀን ይንቀጠቀጣሉ፤ በባሕር ውስጥ ያሉ ደሴቶችም በመጥፋትሽ ይደነግጣሉ።

¹⁹ጌታ አባታችን እንዲህ ይላል፦ ከጥንት ጀምሮ እንደ ተተዉ ከተሞች የተፈታሽ ከተማ ባደርግሽ ጊዜ፣ ቀላዩን በአንቺ ላይ ባስነሣና ብዙ ውሆች በሚሸፍኑሽ ጊዜ፣ ²⁰ከዚያም ወደ ጕድጓድ ከሚወርዱ ጋር፣ ወደ ጥንቱ ሕዝብ አወርድሻለሁ። ከጥንት ከፈረሱ ፍርስራሾች መካከል፣ ወደ ጕድጓድ ከሚወርዱ ጋር፣ ከታች ባለች ምድር አኖርሻለሁ፤ ስለዚህ አትመለሺም፤ በሕያዋን ምድርም ስፍራ አታገኚም። ²¹አስፈሪ ፍጻሜ አመጣብሻለሁ፤ ዳግመኛም አትኖሪም። ትፈለጊያለሽ፤ ነገር ግን ከእንግዲህ ዳግመኛ አትገኚም፤ ይላል ጌታ አባታችን።