Korwook Kwanda Tyro
Kanyoorunee Tyro mienda agobo yootetap Jerusalem, kigeni kotes landa amu kagiyaatwo kurgeet. Mwaei Kwandanyo kole konyonji pororyosyek che chaang' ko uu nyanjet peekyik che mildogei. Kobar Nebukadnesar koriitokyik, ak kewirtoi koikyik nyanjet, ak koek olooto koito ne labat ole kibarare regereiywek.
Ng'alaali Kwandanyo eng' mustarisyek 2–21
26 1Eng' kenyiit ne po taman ak agenge, eng' peetuut ne tai ne po arawet, konyoonwaan ng'olyootap Kwandanyo, kole:
2Weeriitap chii, amu kole Tyro agobo Jerusalem, ‘Haa! Kagobchak kurgeetap pororyosyek, kagiyaatwo. Kagoegu karotwek; atese tuguuk.’ 3Mwaei anyun Kiptaiyat Kwanda kole: Keer, atoorchigei ak inyee, Tyro. Aibu pororyosyek che chaang' konam ak inyee, ko uu ye ibei nyanjet peekyik che mildogei. 4Koyaach irimoigap Tyro ak kobar toweennyi; ang'oing'oi ng'ung'unyekyik aiyeste, ak ayai koek koito ne labat. 5Koegu olooto ole kibarare regereiywek eng' nyanjet, amu kaang'alaal anee, mwaei Kiptaiyat Kwanda. Koek nyabeet ne po pororyosyek, 6ak kebar nganasanikyik che mi emet eng' rotweet. Yeityo konai kole anee Kwanda.
7Mwaei anyun Kiptaiyat Kwanda kole: Keer, aibu Nebukadnesar laitoryatap Babilon, laitoryatap laitorinik, konam ak Tyro, kobunu murot kaataam, kobooto paraisisyek, charunee, piik che tuiyoni paraisisyek, ak lugeet ne oo ne po piik che chaang'. 8Kobar nganasanikuk che mi emet eng' rotweet, ak koteech irimeet ne po koyomeet konam ak inyee, ak koyum ng'ung'unyek koek tulwo konam ak inyee, ak koeet long'onik konam ak inyee. 9Kobir irimoiguk eng' tuguuk che ryepei irimeet, ak kowech toweeng'ung' eng' aonikyik. 10Chang' paraisisyekyik kot kotuch temburyekwak inyee. Ipotandos irimoiguk eng' polatetap piik che tuiyoni paraisisyek, kariisyek, ak charunee, ye chut kurgotiguk ko uu piik che chutei nganaseet ne kagobchak irimoik. 11Kotyech keelyegap paraisisyekyik ortinweguk tugul. Kobar piiguk eng' rotweet, ak kobutyo ng'wony tolochiguk che kiimeen. 12Korebe tuguuguk, konyaban mageetuguk, koluul irimoiguk, ak koyaach kaarogukuk che miach, kowiirchi nyanjet koik, keetiik, ak ng'ung'unyek. 13Asisyei songolyekuk che cheeitos; ma kegas kibugandinik agine. 14Ayai inyee koek koito ne labat, olooto ole kibarare regereiywek. Ma iteeche agine, amu anee, Kwanda, kaang'alaal, mwaei Kiptaiyat Kwanda.
15Mwaei anyun Kiptaiyat Kwanda Tyro kole: Tos ma potandos ngeguusyek eng' kutitap ibutyoneng'ung', ye tigendos che kiguoten, ye yiema parisyet inyee? 16Yeityo kochoor laitorinik tugul che po nyanjet eng' ng'echerokwak, kobagakta ngoroikwak, ak konem ngoroikwak che ki kinap lelesta. Kagolaakgei botaneet, kotebee ng'wony, kibotanso sait age tugul, kokwong'u inyee. 17Koeet riirek agobo inyee, koleenji: ‘Kibetyo ano, nganaseet ne karaaran, inyee ne ki itesage piik kobunu nyanjosyek—ne kiimeen eng' nyanjet, inyee ak piiguk, inyee che ki koono arageneet eng' tugul che ki menyei olooto!’ a a v17 Ki Tyro nganaseet ne po ngeguet ne tinye tuguuk che chaang', ne ki kiteech kimnateennyi ak piikyik eng' oldonutap nyanjet. 18Ara potandos ngeguusyek eng' peetuutap ibutyoneng'ung'; kotang'anenso ngeguusyek che mi nyanjet eng' kobetoneng'ung'.
19Mwaei anyun Kiptaiyat Kwanda kole: Ye ayai inyee koek nganaseet ne kagoguber, ko uu nganasook che ki kagobakakta koigeny, ye aeet araraita ne oo parak ing'ung', ak kotuch peek che eecheen inyee, 20ko achorun inyee kobooto che choorotin keriinget, kap piik che po keny. Amenyji inyee emet ne mi ng'wony, among karotwek che po keny, kobooto che choortoi keriinget, si ma iweek, ak ma inyoor ole itononi eng' emetap che sobei. 21Aibu inyee let ne nyigiis, ak ma imiitei agine. Kicheengin ago ma kinyooru agine koigeny, mwaei Kiptaiyat Kwanda.