ସୋର ବିଷୟରେ ବିଳାପ

ସୋର ପାଇଁ ଏକ ଶୋକଗୀତ, ଯେଉଁଥିରେ ସେ ଏକ ଚମତ୍କାର ଜାହାଜ। ତାହାର ଦେବଦାରୁ କାଠର ପଟା, ଏରସ କାଠର ମାସ୍ତୁଲ ଓ ମିସରୀୟ ମସିନା ଲୁଗାର ପାଲ ଅଛି। ସବୁଆଡ଼ୁ ଆସିଥିବା ନାମିତ ବାଣିଜ୍ୟ ସହଯୋଗୀମାନେ ତାହାର ନାବିକ ଓ ମାଲ ଯୋଗାନ୍ତି। ପୂର୍ବୀୟ ବାୟୁ ତାକୁ ମଝି ସମୁଦ୍ରରେ ଭାଙ୍ଗିଦିଏ। କୂଳରେ ନାବିକମାନେ ମୁଣ୍ଡରେ ଧୂଳି ପକାଇ ଏହି ଗୀତ ଗାଆନ୍ତି।

ଅଧ୍ୟାୟ 27।

ଆମ୍ଭମାନଙ୍କ ପିତାଙ୍କ ବାକ୍ୟ ମୋʼ ନିକଟରେ ଉପସ୍ଥିତ ହୋଇ କହିଲା,

“ହେ ମନୁଷ୍ୟପୁତ୍ର, ଏବେ ତୁମ୍ଭେ ସୋର ବିଷୟରେ ବିଳାପ କର, ପୁଣି ସମୁଦ୍ରର ପ୍ରବେଶଦ୍ଵାରରେ ବାସ କରୁଥିବା, ଅନେକ ଉପକୂଳ ପର୍ଯ୍ୟନ୍ତ ଗୋଷ୍ଠୀସମୂହର ବ୍ୟବସାୟୀ ସୋରକୁ କୁହ, ପ୍ରଭୁ ପରମେଶ୍ଵର ଏହି କଥା କହନ୍ତି, ‘ହେ ସୋର, ତୁମ୍ଭେ କହିଅଛ, “ମୁଁ ସୌନ୍ଦର୍ଯ୍ୟରେ ସିଦ୍ଧ।” ତୁମ୍ଭର ସୀମା ସମୁଦ୍ରସମୂହର ମଧ୍ୟସ୍ଥଳରେ ଅଛି; ତୁମ୍ଭର ନିର୍ମାଣକାରୀମାନେ ତୁମ୍ଭ ସୌନ୍ଦର୍ଯ୍ୟ ସିଦ୍ଧ କଲେ। ସେମାନେ ସନୀରର ଦେବଦାରୁ କାଷ୍ଠରେ ତୁମ୍ଭର ସମସ୍ତ ପଟା ନିର୍ମାଣ କଲେ; ତୁମ୍ଭ ନିମନ୍ତେ ମାସ୍ତୁଲ ତିଆରି କରିବାକୁ ଲିବାନୋନରୁ ଏକ ଏରସ କାଷ୍ଠ ଆଣିଲେ। ସେମାନେ ବାଶନର ଅଲୋନ କାଷ୍ଠରେ ତୁମ୍ଭର ବଠା ତିଆରି କଲେ; କୁପ୍ରର ଉପକୂଳସମୂହରୁ ଆଣିଥିବା ତାଶୂର କାଷ୍ଠରେ ହସ୍ତୀଦନ୍ତ ଖଞ୍ଜି ତୁମ୍ଭର ଚଟାଣ ତିଆରି କଲେ। ମିସରର ବିଚିତ୍ର କ୍ଷୌମବସ୍ତ୍ର ତୁମ୍ଭର ପାଲ ଥିଲା, ତାହା ତୁମ୍ଭର ନିଶାନ ସ୍ୱରୂପ ହେଲା; ଏଲୀଶାର ଉପକୂଳସମୂହରୁ ଆଣିଥିବା ନୀଳ ଓ ଧୂମ୍ରବର୍ଣ୍ଣ ବସ୍ତ୍ର ତୁମ୍ଭର ଛାତ ଥିଲା। ସୀଦୋନ ଓ ଅର୍ବଦର ଲୋକମାନେ ତୁମ୍ଭର ଆହୁଲାମାରୁ ଥିଲେ; ହେ ସୋର, ତୁମ୍ଭର ନିପୁଣ ଲୋକମାନେ ତୁମ୍ଭ ମଧ୍ୟରେ ତୁମ୍ଭର କର୍ଣ୍ଣଧାର ଥିଲେ। ଗବଲର ପ୍ରାଚୀନବର୍ଗ ଓ ତାହାର ନିପୁଣ ଲୋକମାନେ ତୁମ୍ଭ ମଧ୍ୟରେ ଥାଇ ତୁମ୍ଭର ଛିଦ୍ର ବୁଜୁଥିଲେ; ତୁମ୍ଭର ବାଣିଜ୍ୟଦ୍ରବ୍ୟ କିଣାବିକା କରିବା ନିମନ୍ତେ ସମୁଦ୍ରର ସମସ୍ତ ଜାହାଜ ଓ ସେଗୁଡ଼ିକର ନାବିକମାନେ ତୁମ୍ଭ ନିକଟକୁ ଆସିଲେ। ପାରସ୍ୟ, ଲୂଦ ଓ ପୂଟ ତୁମ୍ଭର ସୈନ୍ୟଦଳରେ ତୁମ୍ଭର ଯୋଦ୍ଧା ଥିଲେ। ସେମାନେ ତୁମ୍ଭ ପ୍ରାଚୀରରେ ଆପଣାମାନଙ୍କ ଢାଲ ଓ ଟୋପର ଟଙ୍ଗାଇଲେ, ତୁମ୍ଭକୁ ଶୋଭାନ୍ଵିତ କଲେ। ଅର୍ବଦର ଲୋକମାନେ ଓ ତୁମ୍ଭର ନିଜ ସୈନ୍ୟଦଳ ଚତୁର୍ଦ୍ଦିଗରେ ତୁମ୍ଭ ପ୍ରାଚୀର ଉପରେ ଥିଲେ, ପୁଣି ଗମ୍ମାଦୀୟ ଲୋକମାନେ ତୁମ୍ଭର ଦୁର୍ଗରେ ଥିଲେ। ସେମାନେ ଚତୁର୍ଦ୍ଦିଗରେ ତୁମ୍ଭ ପ୍ରାଚୀରରେ ଆପଣାମାନଙ୍କ ଢାଲ ଟଙ୍ଗାଇଲେ; ସେମାନେ ତୁମ୍ଭ ସୌନ୍ଦର୍ଯ୍ୟ ସିଦ୍ଧ କଲେ।

“ତୁମ୍ଭର ସର୍ବପ୍ରକାର ପ୍ରଚୁର ସମ୍ପତ୍ତି ହେତୁ ତର୍ଶୀଶ ତୁମ୍ଭ ସହିତ ବାଣିଜ୍ୟ କଲା, ତୁମ୍ଭର ଦ୍ରବ୍ୟ ବଦଳରେ ରୂପା, ଲୁହା, ଟିଣ ଓ ସୀସା ଦେଲା।

“ଯାବନ, ତୂବଲ ଓ ମେଶକ ତୁମ୍ଭ ସହିତ ବାଣିଜ୍ୟ କଲେ, ମନୁଷ୍ୟର ପ୍ରାଣ ଓ ପିତ୍ତଳର ପାତ୍ର ଦେଇ ବ୍ୟବସାୟ କଲେ।

“ବେଥ-ତୋଗର୍ମାର ଲୋକମାନେ ତୁମ୍ଭର ଦ୍ରବ୍ୟ ବଦଳରେ ଅଶ୍ୱ, ଯୁଦ୍ଧାଶ୍ୱ ଓ ଖଚର ଦେଲେ।

“ଦଦାନର ଲୋକମାନେ ତୁମ୍ଭ ସହିତ ବାଣିଜ୍ୟ କଲେ; ଅନେକ ଉପକୂଳ ତୁମ୍ଭର ବଜାର ଥିଲା, ସେମାନେ ତୁମ୍ଭକୁ ମୂଲ୍ୟ ସ୍ୱରୂପେ ହସ୍ତୀଦନ୍ତ ଓ ଆବନୂସ କାଷ୍ଠ ଦେଲେ।

“ତୁମ୍ଭର ପ୍ରଚୁର ଦ୍ରବ୍ୟ ହେତୁ ଅରାମ ତୁମ୍ଭ ସହିତ ବାଣିଜ୍ୟ କଲା, ତୁମ୍ଭର ଦ୍ରବ୍ୟ ବଦଳରେ ମରକତ, ଧୂମ୍ରବର୍ଣ୍ଣ ବସ୍ତ୍ର, ବିଚିତ୍ର କର୍ମ, କ୍ଷୌମବସ୍ତ୍ର, ପ୍ରବାଳ ଓ ପଦ୍ମରାଗ ଦେଲା।

“ଯିହୂଦା ଓ ଇସ୍ରାଏଲ ଦେଶ ତୁମ୍ଭ ସହିତ ବାଣିଜ୍ୟ କଲେ, ମିନ୍ନୀତର ଗହମ, ସୂଜି, ମଧୁ, ତୈଳ ଓ ଗୁଗ୍ଗୁଳ ଦେଲେ।

“ତୁମ୍ଭର ଅନେକ ଦ୍ରବ୍ୟ ଓ ସର୍ବପ୍ରକାର ପ୍ରଚୁର ସମ୍ପତ୍ତି ହେତୁ ଦମ୍ମେଶକ ତୁମ୍ଭ ସହିତ ବାଣିଜ୍ୟ କଲା, ହିଲ୍ବୋନର ଦ୍ରାକ୍ଷାରସ ଓ ସହରର ମେଷଲୋମ ଦେଲା। ବଦାନ ଓ ଉଷଲରୁ ଆସିଥିବା ଯାବନ ତୁମ୍ଭର ଦ୍ରବ୍ୟ ବଦଳରେ ବ୍ୟବସାୟ କଲେ; ଗଢ଼ା ଲୁହା, ଡାଲଚିନି ଓ ବଚ ତୁମ୍ଭର ଦ୍ରବ୍ୟ ମଧ୍ୟରେ ଥିଲା।

“ଦଦାନ ଅଶ୍ୱାରୋହଣ ନିମନ୍ତେ ବହୁମୂଲ୍ୟ ଆସ୍ତରଣ ଦେଇ ତୁମ୍ଭ ସହିତ ବାଣିଜ୍ୟ କଲା।

“ଆରବ ଓ କେଦରର ସମସ୍ତ ଅଧିପତି ତୁମ୍ଭର ଗ୍ରାହକ ଥିଲେ, ସେମାନେ ମେଷଶାବକ, ମେଷ ଓ ଛେଳିର ବ୍ୟବସାୟ କଲେ।

“ଶିବା ଓ ରୟମାର ବ୍ୟବସାୟୀମାନେ ତୁମ୍ଭ ସହିତ ବାଣିଜ୍ୟ କଲେ, ତୁମ୍ଭର ଦ୍ରବ୍ୟ ବଦଳରେ ସର୍ବୋତ୍ତମ ସୁଗନ୍ଧି ଦ୍ରବ୍ୟ, ସର୍ବପ୍ରକାର ବହୁମୂଲ୍ୟ ପ୍ରସ୍ତର ଓ ସୁବର୍ଣ୍ଣ ଦେଲେ।

“ହାରଣ, କନ୍ନି ଓ ଏଦନ, ଶିବାର ବ୍ୟବସାୟୀମାନେ, ଅଶୂର ଓ କିଲମଦ ତୁମ୍ଭ ସହିତ ବାଣିଜ୍ୟ କଲେ। ଏମାନେ ତୁମ୍ଭର ବଜାରରେ ଉତ୍ତମ ବସ୍ତ୍ର, ନୀଳ ଓ ବିଚିତ୍ର ବସ୍ତ୍ର, ପୁଣି ରଜ୍ଜୁରେ ବନ୍ଧା ଓ ସୁଦୃଢ଼ କରାଯାଇଥିବା ବର୍ଣ୍ଣବିଚିତ୍ର ବସ୍ତ୍ରର ଗାଲିଚା ଦେଇ ତୁମ୍ଭ ସହିତ ବାଣିଜ୍ୟ କଲେ। ତର୍ଶୀଶର ଜାହାଜସମୂହ ଯାତ୍ରୀଦଳ ସ୍ୱରୂପେ ତୁମ୍ଭର ବାଣିଜ୍ୟଦ୍ରବ୍ୟ ବୋହିଲେ। ଏଣୁ ତୁମ୍ଭେ ସମୁଦ୍ରସମୂହର ମଧ୍ୟସ୍ଥଳରେ ପରିପୂର୍ଣ୍ଣ ଓ ଅତିଶୟ ଭାରଯୁକ୍ତ ହେଲ। ତୁମ୍ଭର ଆହୁଲାମାରୁମାନେ ତୁମ୍ଭକୁ ମହାଜଳରାଶି ମଧ୍ୟକୁ ବାହାର କରି ଆଣିଲେ; ପୂର୍ବୀୟ ପବନ ତୁମ୍ଭକୁ ସମୁଦ୍ରସମୂହର ମଧ୍ୟସ୍ଥଳରେ ଭାଙ୍ଗି ପକାଇଲା। ତୁମ୍ଭର ସମ୍ପତ୍ତି, ତୁମ୍ଭର ଦ୍ରବ୍ୟ, ତୁମ୍ଭର ବାଣିଜ୍ୟଦ୍ରବ୍ୟ, ତୁମ୍ଭର ନାବିକ ଓ ତୁମ୍ଭର କର୍ଣ୍ଣଧାର, ତୁମ୍ଭର ଛିଦ୍ର ବୁଜିବା ଲୋକ, ତୁମ୍ଭର ବ୍ୟବସାୟୀ ଓ ତୁମ୍ଭ ମଧ୍ୟରେ ଥିବା ତୁମ୍ଭର ସମସ୍ତ ଯୋଦ୍ଧା, ତୁମ୍ଭ ଉପରେ ଥିବା ସମସ୍ତ ଲୋକ ସହିତ, ତୁମ୍ଭର ପତନ ଦିନରେ ସମୁଦ୍ରସମୂହର ମଧ୍ୟସ୍ଥଳରେ ବୁଡ଼ି ଯାଆନ୍ତି। ତୁମ୍ଭର କର୍ଣ୍ଣଧାରମାନଙ୍କ କ୍ରନ୍ଦନର ଶବ୍ଦରେ ଉନ୍ମୁକ୍ତ ପ୍ରାନ୍ତର କମ୍ପିତ ହୁଏ। ଆହୁଲା ଧରୁଥିବା ସମସ୍ତେ, ନାବିକମାନେ ଓ ସମୁଦ୍ରର ସମସ୍ତ କର୍ଣ୍ଣଧାର, ଆପଣାମାନଙ୍କ ଜାହାଜରୁ ଓହ୍ଲାଇ ଆସନ୍ତି; ସେମାନେ ସ୍ଥଳରେ ଠିଆ ହୁଅନ୍ତି, ପୁଣି ତୁମ୍ଭ ବିଷୟରେ ଉଚ୍ଚସ୍ୱର କରି ତୀବ୍ର ରୋଦନ କରନ୍ତି। ସେମାନେ ଆପଣାମାନଙ୍କ ମସ୍ତକରେ ଧୂଳି ପକାନ୍ତି ଓ ଭସ୍ମରେ ଗଡ଼ନ୍ତି; ସେମାନେ ତୁମ୍ଭ ନିମନ୍ତେ ଆପଣାମାନଙ୍କ ମସ୍ତକ ମୁଣ୍ଡନ କରନ୍ତି ଓ ଶୋକବସ୍ତ୍ର ପରିଧାନ କରନ୍ତି, ପୁଣି ପ୍ରାଣର ତିକ୍ତତାରେ, ତୀବ୍ର ଶୋକ ସହିତ, ତୁମ୍ଭ ବିଷୟରେ ରୋଦନ କରନ୍ତି। ସେମାନେ ଆପଣାମାନଙ୍କ ବିଳାପରେ ତୁମ୍ଭ ନିମନ୍ତେ ବିଳାପଗାନ କରନ୍ତି ଓ ତୁମ୍ଭ ବିଷୟରେ ଶୋକ କରନ୍ତି, “ସମୁଦ୍ର ମଧ୍ୟରେ ନୀରବୀକୃତ ଜନ ପରି, ସୋର ତୁଲ୍ୟ କିଏ କେବେ ଥିଲା?” ଯେତେବେଳେ ତୁମ୍ଭର ଦ୍ରବ୍ୟ ସମୁଦ୍ରସମୂହରୁ ବାହାରିଲା, ସେତେବେଳେ ତୁମ୍ଭେ ଅନେକ ଗୋଷ୍ଠୀକୁ ତୃପ୍ତ କଲ; ତୁମ୍ଭର ପ୍ରଚୁର ସମ୍ପତ୍ତି ଓ ବାଣିଜ୍ୟଦ୍ରବ୍ୟ ଦ୍ଵାରା ତୁମ୍ଭେ ପୃଥିବୀର ରାଜାମାନଙ୍କୁ ଧନବାନ କଲ। ଏବେ ତୁମ୍ଭେ ଜଳର ଗଭୀର ସ୍ଥଳରେ ସମୁଦ୍ରସମୂହ ଦ୍ଵାରା ଭଗ୍ନ ହୋଇଅଛ; ତୁମ୍ଭର ବାଣିଜ୍ୟଦ୍ରବ୍ୟ ଓ ତୁମ୍ଭର ସମସ୍ତ ଲୋକ ତୁମ୍ଭ ସହିତ ବୁଡ଼ି ଯାଇଅଛନ୍ତି। ଉପକୂଳସମୂହର ସମସ୍ତ ନିବାସୀ ତୁମ୍ଭ ବିଷୟରେ ଚମତ୍କୃତ ହୁଅନ୍ତି, ପୁଣି ସେମାନଙ୍କ ରାଜାମାନେ ଭୟରେ ଥରହର ହୁଅନ୍ତି; ସେମାନଙ୍କ ମୁଖ ବିକୃତ ହୋଇଅଛି। ଗୋଷ୍ଠୀସମୂହ ମଧ୍ୟରେ ବ୍ୟବସାୟୀମାନେ ତୁମ୍ଭକୁ ଦେଖି ଶୀସ୍ ଶବ୍ଦ କରନ୍ତି; ତୁମ୍ଭେ ଭୟର ବିଷୟ ହୋଇଅଛ ଓ ଅନନ୍ତକାଳ ପର୍ଯ୍ୟନ୍ତ ଆଉ ରହିବ ନାହିଁ।’”