Eng' Eung'ung' Ndeeni
Agobo kandoindetap tyendo. Tyentap Daudi.
Kisupei ak kisussei agoi koany kokwekyik eng' ooreet, kaasanee Daudi ko uu tereet ne kagitui. Ago mwaei kole sogoikyik ko mi eung'ap Kwandanyi ak ndoi kabuusennyi oriit, ebenge kingo kigas ineendet eng' nganaseet ne ki kiyieme.
31 1Aruiyoni eng' inyee, Kwandanyo; amegoono alilan agoi koigeny; isarwo eng' imandang'ung'. 2Iweekyini iiting'ung'; isarwo eng' kagirgiret. Iegu rwandennyu ne aruiyoni, irimennyu si isarwo. 3Amu inyee rwandennyu ak irimennyu; amu kaineng'ung' indochi anee ak ikondochina. 4Iweche eng' regereiywot ne kaigenjana, amu inyee aruiyoni.
5Ndeeni eng' eung'ung' kabuusennyu; kagityachana, Kwandanyo, ne iywei ak ne po iman. a a v5 Ki saaei Jeso ng'aleechu ye kimeei — “Abba, andee eng' eunguk kabuusennyu” (Luka 23:46) — konamnugei ineegei Kwanda ne mang'une tyentani. 6Aweche icheek che namgei ak atebosyek che ma nyolu che po lembech; ago amang'u Kwandanyo. 7Abaibaitu ak akasegei eng' chamyeng'ung' ne tala, amu kigeer nyalildanyu; king'en nyalilwogik che po saboondanyu, 8ak ma kiindochana eung'ap puunyoot; kigonde keelyekyuk eng' olooto ne paraa. 9Rirena, Kwandanyo, amu ami nyalilda; kagong'etyo konyekyuk eng' arageneet, ak saboondanyu ak poortanyu agine. 10Amu kagibeet saboondanyu eng' arageneet, ak kenyiisyekyuk eng' choteet; kagong'etyo kimnateennyu amu tengektonyu, ak chootei kawekyuk. 11Amu puunikyuk tugul kaegu teweernat, miising' ko eng' piigap kokwennyu, ak kaegu kamuiset eng' che ingengei; icheek che keera anee eng' ooreet ko biiruge eng' anee. 12Kagautyeka ko uu chiito ne kagome, ne ma kibwaate; kaegu ko uu tereet ne kagitui.
13Amu agase chaamjineetap che chaang'—kamuiset eng' tabuut tugul—ye yumgei agaigai anee, ak chopei kirwoogutik si konam saboondanyu. 14Ago amang'une inyee, Kwandanyo; ale, “Inyee Kwandanyo.” 15Mii eung'ung' saiisyekyuk; isarwo eng' eunegap puunikyuk ak eng' usiikyuk. 16Ikweng'e kiboityondeng'ung' togeng'ung'; isarwo eng' chamyeng'ung' ne tala. 17Kwandanyo, amegoono alilan, amu aguurin; ingolilaldos kiptengeginik ak kolusyo eng' keeldo.
18Ingolusyo kutit che leelachen, che ng'alaalei eng' menoteet agobo che po imanda, eng' poroindo ak sasisyet. 19Nee abunu myeeindong'ung', ne kigonor agobo che iywei inyee, ne kiboor icheek che aruiyoni eng' inyee, si kogeer piik tugul.
20Eng' shelahtap taing'ung' iunye icheek eng' kirwoogutigap piik; iriibe icheek eng' kaalyeet eng' shelahng'ung' eng' tongoanik che leelachen. 21Ingoberuur Kwandanyo, amu kaboorwo rireenennyi ne kikwong'ee, yoo ki ami nganaseet ne ki kiyiem.
22Ki amwa eng' waagaandanyu, “King'etoi anee eng' taitap konyekuk.” Ago ki igas riireganyu po rireenet yoo ki aguurin si itoreta. 23Ocham Kwandanyo, okweek tugul che iywei ineendet. Riibei Kwandanyo che iywei, ago repaim komugul chiito ne yae kiy eng' menoteet. 24Ogimegitu, ak oegu che nyigoonen, okweek tugul che rwaei Kwandanyo.