Tyeni ne po Katabaanet
Saami. Tyeni ne po katabaanetap koot. Ne po Daudi.
Kisiir agobo tabutetap koot kiñ kagisaab. Mwae Daudi kole ye ki atebi eng' kaalyeet ka ale ma koi atumduma, yeityo kiuny togetap Kwandanyi. Alda ineendet kole ma muuchi temburyek kolasun, ak koletuut eng' ngoroigap kuniet che kagiwal koek poiboiyet.
30 1Atoroorin, Kwandanyu, amu ki ieeta anee, ak ma ki ibagach puunikyuk kopoiboiye agobo anee.
2Kwandanyu, ki aguurin si itoreta, ak ki isaaba. 3Kwandanyu, ki ieeta saboondanyu eng' ole mi che kobek; ki iriipa asap, ak ma ki ibagach alil keriinget.
4Otyenji Kwandanyo, okweek che iywei inyee, ak ogoochi kongoi kainennyi ne tiliil. 5Amu angeennyi ko po kitigin kityo, ago chamyennyi ko po saboondo komugul; imuuchi kotebi riirek eng' kemoi, ago nyonei poiboiyet eng' mornet.
6Ye ka atebi eng' kaalyeet, ka ale, “Ma koi atumduma.” 7Kwandanyu, eng' chamyeng'ung' ki igimit tulweennyu kotonon; ago ye ki iuny togeng'ung', ka atoptobeny.
8Inyee, Kwandanyu, ki aguurin; ki asoome rireenet eng' Kwanda ne Toroor: 9“Nee ne kisich ngo asilemdoi, ngo alil keriinget? Tos lasunin temburyek inyee? Tos imwae imandang'ung'? 10Igaso, Kwandanyu, ak irireena; Kwandanyu, iegu ne toreti.”
11Ki iwal kuniennyu koek ureryet; ki ireegune ngoroikyuk che po kuniet, ak ki ilaaka poiboiyet, 12si kotyen muguleldanyu kalasuneng'ung', ak ma kosilem. Kwandanyu, Aweegun kongoi koigeny.