Sirba Eebbisuu
Faarfannaa. Sirba mana eebbisuuf kan ta'e. Kan Daawit.
Ayyaana mana qulqullummaa addaan baasuuf, erga fayyee booda barreeffame. Daawit yeroo wanti gaarii ta'e gonkumaa hin raafamu jedhee yaaduu amana, achiis fuulli Abbaa isaa dhokate. Biyyoon galateeffachuu hin danda'u jedhee falma, uffanni gaddaa gammachuudhaan jijjiiramuun xumura.
30 1Yaa Abbaa koo, ani si ol-aasa, sababii ati na ol kaastee, diinonni koo na irratti akka hin gammanne gooteef.
2Yaa Abbaa koo, ani gargaarsaaf sitti iyyadhe, ati immoo na fayyifte. 3Yaa Abbaa koo, ati lubbuu koo awwaala keessaa ol baafte; na jiraachiftee akka ani boolla hin gad bu'ne goote.
4Isin warri amanamtoonni isaa, Abbaa keenyaaf faarfadhaa, maqaa isaa qulqulluufis galata galchaa. 5Aariin isaa yeroo xinnoo qofaaf in turaatii, tolli isaa garuu umrii guutuu in tura; booyichi halkan tokko turuu in danda'a, gammachuun garuu ganama in dhufa.
6Yeroo ani mirkanaa'e, akkana jedhe, «Gonkumaa hin raafamu.» 7Yaa Abbaa koo, tola keetiin tulluu koo jabeessite; yeroo fuula kee dhoksite garuu ani rifadhe.
8Yaa Abbaa koo, ani sitti waamee; Abbaa Gooftaatti araara kadhadhe: 9«Yoo ani calisfame, yoo ani boolla seene, bu'aan isaa maali? Biyyoon si in galateeffataa? Amanamummaa kee in labsaa? 10Yaa Abbaa koo, na dhaga'i, naaf araarami; yaa Abbaa koo, gargaaraa koo ta'i.»
11Gadda koo gara shubbisaatti jijjirte; uffata gaddaa koo of irraa baasteetii gammachuudhaan na uffifte, 12akka onneen koo galata kee faarfattee hin callifneef. Yaa Abbaa koo, ani bara baraan sin galateeffadha.
