Saüenbü shanga Chia
Chia che. Chem saüenbü shanga chia che. Dawideibü.
Chem natenbü shanga, maian aploubü thonga doanbü. Dawidei welauda, jembü maibü kijinei haoei ladangkei ashaknyintibü dogo damenkei, kheijinei haoeibü Boueibü thenyek huabü. Thamngueikei nyensang akula dogo haoei lauda, hoba senou nei to hangletan olinbüei yukbü yoa thonda.
30 1Ngei no yaangentilabü, kü Bou, aishanga nyi ngo tonenkei hoba kü dangbou shuong ngo thüka olinla nyi atütti.
2Kü Bou, ngei thuibü shanga ka to ngekkei, hoba nyi ngo maitikukei. 3Kü Bou, nyi ngeibü soushou Sheol ka sungenkei; nyi ngo lang phokei hoba ngo püngkhün to atütti.
4Seneibü Bou to chia lauashi, kan haoeibü saopobü shuong, hoba haoeibü saopobü nyen la nyensang kuashi. 5Aishanga haoeibü khau longche ong kida, lausikei haoeibü maangshikbü salang sünga kida; mang haapbü khüyou sünga kilabü, lausikei ngeyang kho olinbü loulabü.
6Ngo alamleko kijinei, ngei laukei, “Ngo ladangkei anyaakeitilabü.” 7Kü Bou, kaibü maangshikbüei nyi ngeibü shongh kaangkhühtham phokukei; lausikei nyi kaibü thenyek huajinei, ngo hatyomokyoko kikei.
8Kü Bou, ka to ngei ngakei; Bunyubou Mühghaü to ngei onou shanga sukeijakei: 9“Ngo ngüh üanglaje, püngkhün to yanlaje, ai hapda? Thamngueikei ka nyen sanglabü lo? Khoei kaibü maanglemenbü phinthonlabü lo? 10Kü Bou, ngo ditashi, hoba kü to onoushi; kü Bou, ngeibü thuibou kishi.”
11Nyi ngeibü mang haap jeila tombü yeitikei; nyi ngeibü senou nei hangletan olinbüei ngo yukkukei, 12Ngeibü maangponei ka nyensang chia lauan hoba asemele kila shanga. Kü Bou, ngei ka la ponpen nyensang kulabü.
