Abụ maka Ido Nsọ

Abụ ọma. Abụ maka ido ụlọ ahụ nsọ. Nke Devid.

E dere ya maka nraranye mgbe a gwọchara ya. Devid kwetara na mgbe ihe na-agara ya nke ọma, o chere na a gaghị eme ka o mega mgbe ọ bụla, mgbe ahụ ka e zoro ihu Nna ya. Ọ na-arụ ụka na ájá apụghị ito, ọ na-ejedebekwa n'ịgbanwe uwe iru újú ya ka ọ bụrụ obi ụtọ.

Isi 30.

Aga m ebuli gị elu, Nna m, nʼihi na i weliri m elu ma ekweghị ka ndị iro m ṅụrịa ọṅụ megide m.

Nna m, akpọkuru m gị maka enyemaka, ị gwọkwara m. Nna m, i mere ka mkpụrụobi m si nʼili rigota; i debere m ndụ ma ekweghị ka m rịda nʼolulu.

Bụkuoranụ Nna anyị abụ, unu ndị kwesịrị ntụkwasị obi nke ya, nyekwanụ aha nsọ ya ekele. Nʼihi na iwe ya na-adị naanị nwa oge nta, ma ihuọma ya na-adịgide ogologo ndụ niile; ịkwa ákwá pụrụ ịnọ ruo nʼabalị niile, ma ọṅụ na-abịa nʼụtụtụ.

Mgbe m nwere ntụkwasị obi, asịrị m, “Agaghị m ama jijiji ma ọlị.” Nna m, site nʼihuọma gị, i mere ka ugwu m guzosie ike; ma mgbe i zoro ihu gị, obi lọrọ m mmiri.

Ọ bụ gị, Nna m, ka m kpọkuru; ọ bụ Nna, Onye na-achị achị, ka m rịọrọ ebere: “Gịnị bụ uru ọ ga-abara ma mee ka m gbachie nkịtị, ma m rịda nʼolulu? Aja ọ ga-eto gị? Ọ ga-ekwupụta ikwesị ntụkwasị obi gị? Nụrụ olu m, Nna m, mekwaa m ebere; Nna m, bụrụ onye na-enyere m aka.”

I mere ka iru újú m ghọọ ịgba egwu; i yipụrụ m uwe iru újú m ma jiri ọṅụ yikwasị m, ka obi m wee bụọ abụ otuto gị ma ghara ịgbachi nkịtị. Nna m, aga m ekele gị ekele ruo mgbe ebighị ebi.