زبور 30 FHB Father's Heart Bible™

30 ¹زۀ به ستا لوئى بيانوم، اے پلاره، ځکه چې تا زۀ اوچت کړم او زما دښمنانو ته دې اِجازت ورنۀ کړو چې پر ما خوشحالى وکړى.

²اے پلاره، ما د مدد دپاره تا ته فرياد وکړو، او تا زۀ روغ کړم. ³اے پلاره، تا زما روح د قبر نه راپورته کړو؛ تا زۀ ژوندے وساتلم او پرېنښودم چې کندې ته ښکته شم.

⁴زمونږ پلار ته سندرې ووايئ، اے د هغۀ وفادارانو، او د هغۀ د پاک نوم شکر اَدا کړئ. ⁵ځکه چې د هغۀ غضب يوازې يو شېبه دپاره وى، خو د هغۀ فضل د ټول عُمر دپاره وى؛ ژړا کېدے شى ټوله شپه وى، خو خوشحالى سحر راځى.

⁶کله چې زۀ بې فکره وم، نو ما ووئيل چې، ”زۀ به کله هم ونۀ خوځول شم.“ ⁷اے پلاره، په خپل فضل سره دې زما غر مضبوط ودروو؛ خو کله چې تا خپل مخ پټ کړو، نو زۀ پرېشانه شوم.

⁸تا ته، اے پلاره، ما اواز وکړو؛ د رحم دپاره مې مالِک پلار ته زارى وکړله: ⁹”څۀ فائده ده کۀ زۀ چوپ کړے شم، کۀ زۀ کندې ته ښکته شم؟ آيا خاوره به ستا ثناء وائى؟ آيا هغه به ستا وفادارى بيانوى؟ ¹⁰زما فرياد واوره، اے پلاره، او په ما مهربانى وکړه؛ اے پلاره، زما مددګار شه.“

¹¹تا زما ماتم په ګډا بدل کړو؛ تا زما د ماتم جامې راوويستلې او په خوشحالۍ دې زۀ وپوښلم، ¹²دې دپاره چې زما زړۀ ستا ثناء ووائى او چوپ پاتې نۀ شى. اے پلاره، زۀ به تل ستا شکر اَدا کوم.