Kat Thangnu om Laa
Kalum Laa. In kat thangnu om laa. David om.
Pi sa thangnu nung bi kat thangnu kaan lang hiak thangnuwe. Baom chwan sa ong kaan bi, 'Ei khatchale katop laye' diga baningnu, khatle habei ga Bapa om bamai inkam thangnu ding David na pamme. Kaphut na swanka ngamlaye diga maan twei nge, khatle lio pon ding karonu lang chan thangnu lang hweiniga taanne.
30 1Apa, Eina Nating pi basaang ka thanglune, Balangbe Nangna ating kai thou thangluga ating munanu nun ding ating lang karo lozaang sa pi thang mak rwe.
2Apa, Eina paang thang lang Nating khou kakou ngaake, atiga Nangna ating pi sa thang rwe. 3Apa, Nangna akatha ding kathi ram bina kai thou thang rwe; Nangna ating ring pi thangluga ating khun bi ta pi thang mak rwe.
4Ani Pa lang laa too, nani Baom balumsa lang khopnu mi bing, khatle Baom bathiangnu meng khou swanka thang too. 5Balangbe Baom balung pwannu ga kahan khatcha tang amme, atiyeda Baphaangkriang ga ringnu sangwan khangsung am rwe; chapnu ga zingpha khangsung am lu rwe, atiyeda karonu ga louthwan hungne.
6Eina ating ngaak chuiga thei ong bi, Eina rinne, “Ei khatchale katop laye.” 7Apa, Naom phaangkriang paan bina Nangna ating rammwan ding han tipka to thang rwe; atiyeda Nangna Namai inkam thang ong bi, ei sung riangre tak ngaake.
8Apa, Nating khou Eina kou ngaake; Pukraangba Apa khou Eina phaangkriang lang hweini ngaake: 9“Ei chong katak ong tabe, Ei khun bi ta tabe, pa-aam tongnu ambo? Kaphut na Nating swanne gabo? Hagana Naom balumsaza ding pao swakne gabo? 10Apa, ating ngaisuwo, khatle ating khou phaangkriang thang ngo; Apa, ating paangthangnupa towo.”
11Nangna ating chunto lo sianu ding laamnu bi pi gon thang rwe; Nangna ating bora pwan ga lwak sat thangluga karonu na ating pwan sin thang rwe, 12asung na Nating swanga laa toluga thiap thiap ong mak lang nge. Apa, Eina Nating khou khwa seiga swanka thanglune.