ଆପଣା ସନ୍ତାନଗଣ ପ୍ରତି ପିତାଙ୍କ ପ୍ରତିଜ୍ଞା

ଆଶୀର୍ବାଦ କେଇଟି ପଦରେ ବର୍ଣ୍ଣିତ, ଏବଂ ଅଭିଶାପ ବିଧ୍ୱଂସକାରୀ ବିସ୍ତାରରେ: ରୋଗ, ମରୁଡ଼ି, ଏପରି ଭୟଙ୍କର ଅବରୋଧ ଯେ ପିତାମାତା ନିଜ ସନ୍ତାନକୁ ଖାଆନ୍ତି, ନିର୍ବାସନ, କମ୍ପମାନ ହୃଦୟ, ଏବଂ ଏପରି ସକାଳ ଯାହା ସନ୍ଧ୍ୟା ହେଉ ବୋଲି କାମନା କରେ। ସମସ୍ତ ଭାର ଗୋଟିଏ କଥା ଉପରେ ନିର୍ଭର କରେ — ଇସ୍ରାଏଲ ନିଜ ପିତାଙ୍କ ସ୍ୱର ଶୁଣେ କି ନାହିଁ।

ଅଧ୍ୟାୟ 28।

ଯଦି ତୁମ୍ଭେ ଆପଣା ପିତାଙ୍କ ରବ ବିଶ୍ଵସ୍ତ ଭାବରେ ଶୁଣି, ଆଜି ମୁଁ ତୁମ୍ଭକୁ ଦେଉଥିବା ତାହାଙ୍କ ସମସ୍ତ ଆଜ୍ଞା ଯତ୍ନପୂର୍ବକ ପାଳନ କର, ତେବେ ତୁମ୍ଭ ପିତା ତୁମ୍ଭକୁ ପୃଥିବୀର ସମସ୍ତ ଜାତି ଉପରେ ଉଚ୍ଚରେ ସ୍ଥାପନ କରିବେ। ଯଦି ତୁମ୍ଭେ ଆପଣା ପିତାଙ୍କ ରବ ଶୁଣ, ତେବେ ଏହିସବୁ ଆଶୀର୍ବାଦ ତୁମ୍ଭ ଉପରେ ବର୍ତ୍ତି ତୁମ୍ଭ ପ୍ରତି ଘଟିବ: ନଗରରେ ତୁମ୍ଭେ ଆଶୀର୍ବାଦପ୍ରାପ୍ତ ହେବ, ଓ କ୍ଷେତ୍ରରେ ତୁମ୍ଭେ ଆଶୀର୍ବାଦପ୍ରାପ୍ତ ହେବ। ତୁମ୍ଭ ଗର୍ଭର ଫଳ, ତୁମ୍ଭ ଭୂମିର ଫଳ, ତୁମ୍ଭ ପଶୁଧନର ଫଳ—ତୁମ୍ଭ ଗୋରୁ ଓ ମେଣ୍ଢାପଲର ବତ୍ସ ଆଶୀର୍ବାଦପ୍ରାପ୍ତ ହେବ। ତୁମ୍ଭ ଟୋକେଇ ଓ ତୁମ୍ଭ ଚକଟିବା ପାତ୍ର ଆଶୀର୍ବାଦପ୍ରାପ୍ତ ହେବ। ଭିତରକୁ ଆସିବା ସମୟରେ ତୁମ୍ଭେ ଆଶୀର୍ବାଦପ୍ରାପ୍ତ ହେବ, ଓ ବାହାରକୁ ଯିବା ସମୟରେ ତୁମ୍ଭେ ଆଶୀର୍ବାଦପ୍ରାପ୍ତ ହେବ। ତୁମ୍ଭ ବିରୁଦ୍ଧରେ ଉଠିବା ଶତ୍ରୁମାନଙ୍କୁ ତୁମ୍ଭ ପିତା ତୁମ୍ଭ ସମ୍ମୁଖରେ ପରାସ୍ତ କରିବେ। ସେମାନେ ଏକ ପଥରେ ତୁମ୍ଭ ବିରୁଦ୍ଧରେ ଆସି ସାତ ପଥରେ ତୁମ୍ଭ ସମ୍ମୁଖରୁ ପଳାୟନ କରିବେ। ତୁମ୍ଭ ଭଣ୍ଡାରସମୂହରେ ଓ ତୁମ୍ଭେ ଯାହା ହସ୍ତକ୍ଷେପ କର, ସେହିସବୁରେ ତୁମ୍ଭ ପିତା ଆଶୀର୍ବାଦ ଆଜ୍ଞା କରିବେ, ପୁଣି ତୁମ୍ଭ ପିତା ତୁମ୍ଭକୁ ଦେଉଥିବା ଦେଶରେ ତୁମ୍ଭକୁ ଆଶୀର୍ବାଦ କରିବେ। ଯଦି ତୁମ୍ଭେ ଆପଣା ପିତାଙ୍କ ଆଜ୍ଞା ପାଳନ କରି ତାହାଙ୍କ ପଥରେ ଗମନ କର, ତେବେ ଯେପରି ତୁମ୍ଭ ପିତା ତୁମ୍ଭ ନିକଟରେ ଶପଥ କରିଅଛନ୍ତି, ସେପରି ସେ ତୁମ୍ଭକୁ ଆପଣାର ପବିତ୍ର ଲୋକ ରୂପେ ସ୍ଥାପନ କରିବେ। ସେତେବେଳେ ତୁମ୍ଭେ ଆମ୍ଭମାନଙ୍କ ପିତାଙ୍କ ନାମରେ ଖ୍ୟାତ ଅଟ ବୋଲି ପୃଥିବୀର ସମସ୍ତ ଗୋଷ୍ଠୀ ଦେଖିବେ, ଆଉ ସେମାନେ ତୁମ୍ଭକୁ ଭୟ କରିବେ। ତୁମ୍ଭ ପିତା ତୁମ୍ଭ ପିତୃପୁରୁଷଙ୍କ ନିକଟରେ ଯେଉଁ ଦେଶ ଦେବା ପାଇଁ ଶପଥ କଲେ, ସେହି ଦେଶରେ ତୁମ୍ଭ ପିତା ତୁମ୍ଭକୁ ତୁମ୍ଭ ଗର୍ଭର ଫଳ, ତୁମ୍ଭ ପଶୁଧନର ଫଳ ଓ ତୁମ୍ଭ ଭୂମିର ଫଳରେ ସମୃଦ୍ଧିରେ ଉଛୁଳାଇ ଦେବେ। ତୁମ୍ଭ ଦେଶର ବୃଷ୍ଟି ଉପଯୁକ୍ତ ସମୟରେ ଦେବା ପାଇଁ ଓ ତୁମ୍ଭ ହସ୍ତକୃତ ସମସ୍ତ କାର୍ଯ୍ୟ ଆଶୀର୍ବାଦ କରିବା ପାଇଁ ତୁମ୍ଭ ପିତା ତୁମ୍ଭ ନିମନ୍ତେ ଆପଣାର ଉତ୍ତମ ଭଣ୍ଡାର, ଆକାଶମଣ୍ଡଳ ଉନ୍ମୁକ୍ତ କରିବେ। ତୁମ୍ଭେ ଅନେକ ଜାତିଙ୍କୁ ଋଣ ଦେବ, ମାତ୍ର ଋଣ ନେବ ନାହିଁ। ଯଦି ତୁମ୍ଭେ ଆଜି ମୁଁ ତୁମ୍ଭକୁ ଆଜ୍ଞା କରୁଥିବା ତୁମ୍ଭ ପିତାଙ୍କ ଆଜ୍ଞା ଶୁଣି, ତାହା ଯତ୍ନପୂର୍ବକ ପାଳନ କର, ତେବେ ତୁମ୍ଭ ପିତା ତୁମ୍ଭକୁ ଲାଙ୍ଗୁଳ ନୁହେଁ, ମସ୍ତକ କରିବେ, ତୁମ୍ଭେ ସର୍ବଦା ଉପରକୁ ଉଠିବ, କେବେ ତଳକୁ ପଡ଼ିବ ନାହିଁ। ଅନ୍ୟ ଦେବତାଗଣର ଅନୁଗମନ ଓ ସେମାନଙ୍କ ସେବା କରିବା ପାଇଁ ଆଜି ମୁଁ ତୁମ୍ଭକୁ ଆଜ୍ଞା କରୁଥିବା କୌଣସି ବାକ୍ୟରୁ ଦକ୍ଷିଣ କି ବାମ ବିମୁଖ ହୁଅ ନାହିଁ।

ଯେତେବେଳେ ସେମାନେ ବିମୁଖ ହୁଅନ୍ତି

ମାତ୍ର ଯଦି ତୁମ୍ଭେ ଆପଣା ପିତାଙ୍କ ରବ ନ ଶୁଣି, ଆଜି ମୁଁ ତୁମ୍ଭକୁ ଆଜ୍ଞା କରୁଥିବା ତାହାଙ୍କ ସମସ୍ତ ଆଜ୍ଞା ଓ ବିଧି ଯତ୍ନପୂର୍ବକ ପାଳନ ନ କର, ତେବେ ଏହିସବୁ ଅଭିଶାପ ତୁମ୍ଭ ଉପରେ ବର୍ତ୍ତି ତୁମ୍ଭ ପ୍ରତି ଘଟିବ: ^a ନଗରରେ ତୁମ୍ଭେ ଅଭିଶପ୍ତ ହେବ, ଓ କ୍ଷେତ୍ରରେ ତୁମ୍ଭେ ଅଭିଶପ୍ତ ହେବ। ତୁମ୍ଭ ଟୋକେଇ ଓ ତୁମ୍ଭ ଚକଟିବା ପାତ୍ର ଅଭିଶପ୍ତ ହେବ। ତୁମ୍ଭ ଗର୍ଭର ଫଳ ଓ ତୁମ୍ଭ ଭୂମିର ଫଳ, ତୁମ୍ଭ ଗୋରୁର ବୃଦ୍ଧି ଓ ତୁମ୍ଭ ମେଣ୍ଢାପଲର ବତ୍ସ ଅଭିଶପ୍ତ ହେଉ। ଭିତରକୁ ଆସିବା ସମୟରେ ତୁମ୍ଭେ ଅଭିଶପ୍ତ ହେବ, ଓ ବାହାରକୁ ଯିବା ସମୟରେ ତୁମ୍ଭେ ଅଭିଶପ୍ତ ହେବ। ତୁମ୍ଭେ ଯାହା ହସ୍ତକ୍ଷେପ କର, ସେହିସବୁରେ ତୁମ୍ଭ ପିତା ତୁମ୍ଭ ଉପରକୁ ଅଭିଶାପ, ବିଶୃଙ୍ଖଳା ଓ ଅନୁଯୋଗ ପ୍ରେରଣ କରିବେ, ଯେପର୍ଯ୍ୟନ୍ତ ତୁମ୍ଭେ ବିନଷ୍ଟ ହୋଇ ଶୀଘ୍ର ବିନାଶ ପ୍ରାପ୍ତ ନ ହୁଅ; ଏହା ମୋତେ ପରିତ୍ୟାଗ କରିବାର ତୁମ୍ଭ କ୍ରିୟାର ଦୁଷ୍ଟତା ହେତୁ ଘଟିବ। ତୁମ୍ଭେ ଯେଉଁ ଦେଶ ଅଧିକାର କରିବାକୁ ପ୍ରବେଶ କରୁଅଛ, ତହିଁରୁ ତୁମ୍ଭକୁ ବିନଷ୍ଟ କରିବା ପର୍ଯ୍ୟନ୍ତ ତୁମ୍ଭ ପିତା ତୁମ୍ଭଠାରେ ମହାମାରୀ ଲାଗି ରହିବାକୁ ଦେବେ। ତୁମ୍ଭ ପିତା ତୁମ୍ଭକୁ ଯକ୍ଷ୍ମା, ଜ୍ଵର, ପ୍ରଦାହ, ପ୍ରଜ୍ଵଳିତ ତାପ, ଅନାବୃଷ୍ଟି, ଶସ୍ୟର ଝଲସା ଓ ମ୍ଳାନିରେ ଆଘାତ କରିବେ; ତୁମ୍ଭେ ବିନାଶ ପ୍ରାପ୍ତ ନ ହେବା ପର୍ଯ୍ୟନ୍ତ ସେସବୁ ତୁମ୍ଭ ପଛେ ଗୋଡ଼ାଇବ। ତୁମ୍ଭ ମସ୍ତକ ଉପରିସ୍ଥ ଆକାଶ ପିତ୍ତଳ, ଓ ତୁମ୍ଭ ତଳସ୍ଥ ଭୂମି ଲୌହ ହେବ। ତୁମ୍ଭ ପିତା ତୁମ୍ଭ ଦେଶର ବୃଷ୍ଟିକୁ ଧୂଳି ଓ ବାଲିରେ ପରିଣତ କରିବେ; ତୁମ୍ଭେ ବିନଷ୍ଟ ନ ହେବା ପର୍ଯ୍ୟନ୍ତ ତାହା ଆକାଶରୁ ତୁମ୍ଭ ଉପରକୁ ପଡ଼ିବ। ତୁମ୍ଭ ପିତା ତୁମ୍ଭକୁ ତୁମ୍ଭ ଶତ୍ରୁମାନଙ୍କ ସମ୍ମୁଖରେ ପରାସ୍ତ କରାଇବେ। ତୁମ୍ଭେ ଏକ ପଥରେ ସେମାନଙ୍କ ବିରୁଦ୍ଧରେ ବାହାରକୁ ଯିବ, ମାତ୍ର ସାତ ପଥରେ ପଳାୟନ କରିବ, ଆଉ ପୃଥିବୀର ସମସ୍ତ ରାଜ୍ୟ ପ୍ରତି ଭୟଙ୍କର ବିଷୟ ହେବ। ତୁମ୍ଭ ଶବ ଆକାଶର ସମସ୍ତ ପକ୍ଷୀ ଓ ପୃଥିବୀର ପଶୁଗଣର ଆହାର ହେବ, ପୁଣି ସେମାନଙ୍କୁ ଘଉଡ଼ାଇବାକୁ କେହି ନ ଥିବ। ତୁମ୍ଭ ପିତା ତୁମ୍ଭକୁ ମିସରର ବଥ, ଅର୍ଶ, କ୍ଷତ ଓ କଣ୍ଡୁରେ ଆଘାତ କରିବେ, ଯହିଁରୁ କୌଣସିଟି ଆରୋଗ୍ୟ ହୋଇ ପାରିବ ନାହିଁ। ତୁମ୍ଭ ପିତା ତୁମ୍ଭକୁ ପାଗଳାମି, ଅନ୍ଧତା ଓ ମନର ବିଭ୍ରାନ୍ତିରେ ଆଘାତ କରିବେ। ଅନ୍ଧ ଯେପରି ଅନ୍ଧକାରରେ ହାତ ଘୋଷାରି ଚାଲେ, ତୁମ୍ଭେ ସେପରି ମଧ୍ୟାହ୍ନ ସମୟରେ ହାତ ଘୋଷାରି ଚାଲିବ, ପୁଣି ତୁମ୍ଭ ପଥରେ କୃତକାର୍ଯ୍ୟ ହେବ ନାହିଁ। ତୁମ୍ଭେ କେବଳ ନିତ୍ୟ ଉପଦ୍ରବ ଓ ଲୁଟିତ ହେବ, ପୁଣି ତୁମ୍ଭକୁ ଉଦ୍ଧାର କରିବାକୁ କେହି ନ ଥିବ। ତୁମ୍ଭେ ଜଣେ ସ୍ତ୍ରୀ ସହିତ ବାଗ୍‌ଦତ୍ତ ହେବ, ମାତ୍ର ଅନ୍ୟ ପୁରୁଷ ତାହା ସଙ୍ଗେ ଶୟନ କରିବ। ତୁମ୍ଭେ ଗୋଟିଏ ଗୃହ ନିର୍ମାଣ କରିବ, ମାତ୍ର ତହିଁରେ ବାସ କରିବ ନାହିଁ। ତୁମ୍ଭେ ଦ୍ରାକ୍ଷାକ୍ଷେତ୍ର ରୋପଣ କରିବ, ମାତ୍ର ତହିଁର ଫଳ ଭୋଗ କରିବ ନାହିଁ। ତୁମ୍ଭ ବଳଦ ତୁମ୍ଭ ଚକ୍ଷୁ ଆଗରେ ହତ ହେବ, ମାତ୍ର ତୁମ୍ଭେ ତହିଁରୁ ଭୋଜନ କରିବ ନାହିଁ। ତୁମ୍ଭ ଗଧ ତୁମ୍ଭ ସମ୍ମୁଖରୁ ବଳପୂର୍ବକ ନିଆଯିବ ଓ ଫେରାଇ ଦିଆଯିବ ନାହିଁ। ତୁମ୍ଭ ମେଣ୍ଢାପଲ ତୁମ୍ଭ ଶତ୍ରୁମାନଙ୍କୁ ଦିଆଯିବ, ପୁଣି ତୁମ୍ଭକୁ ଉଦ୍ଧାର କରିବାକୁ କେହି ନ ଥିବ। ତୁମ୍ଭ ପୁତ୍ର ଓ କନ୍ୟାମାନେ ଅନ୍ୟ ଲୋକଙ୍କୁ ଦିଆଯିବେ, ପୁଣି ତୁମ୍ଭ ଚକ୍ଷୁ ତାହା ଦେଖୁ ଦେଖୁ ସମସ୍ତ ଦିନ ସେମାନଙ୍କ ପାଇଁ ଉତ୍କଣ୍ଠିତ ହୋଇ କ୍ଷୀଣ ହେବ, ମାତ୍ର ତୁମ୍ଭ ହସ୍ତ ଶକ୍ତିହୀନ ହେବ। ତୁମ୍ଭର ଅଜ୍ଞାତ ଏକ ଗୋଷ୍ଠୀ ତୁମ୍ଭ ଦେଶର ଉତ୍ପନ୍ନ ଦ୍ରବ୍ୟ ଓ ତୁମ୍ଭ ସମସ୍ତ ଶ୍ରମଫଳ ଭୋଜନ କରିବେ; ତୁମ୍ଭେ କେବଳ ନିତ୍ୟ ଉପଦ୍ରବ ଓ ପିଷ୍ଟ ହେବ। ପୁଣି ତୁମ୍ଭ ଚକ୍ଷୁ ଯାହା ଦେଖିବ, ତଦ୍ଦ୍ଵାରା ତୁମ୍ଭେ ଉନ୍ମତ୍ତ ହେବ। ତୁମ୍ଭ ପିତା ତୁମ୍ଭ ପାଦତଳୁ ମସ୍ତକର ଶିଖର ପର୍ଯ୍ୟନ୍ତ ତୁମ୍ଭ ଆଣ୍ଠୁ ଓ ଗୋଡ଼ରେ ଦୁଃସାଧ୍ୟ ଅଚିକିତ୍ସ୍ୟ ବଥରେ ଆଘାତ କରିବେ। ତୁମ୍ଭ ପିତା ତୁମ୍ଭକୁ ଓ ତୁମ୍ଭ ଉପରେ ସ୍ଥାପିତ ରାଜାଙ୍କୁ ତୁମ୍ଭର କିମ୍ବା ତୁମ୍ଭ ପିତୃପୁରୁଷଙ୍କ ଅଜ୍ଞାତ ଏକ ଜାତି ନିକଟକୁ ତଡ଼ି ଦେବେ, ଆଉ ସେଠାରେ ତୁମ୍ଭେ କାଷ୍ଠ ଓ ପ୍ରସ୍ତରର ଅନ୍ୟ ଦେବତାଗଣର ସେବା କରିବ। ତୁମ୍ଭ ପିତା ତୁମ୍ଭକୁ ଯେଉଁ ସମସ୍ତ ଗୋଷ୍ଠୀ ମଧ୍ୟକୁ ତଡ଼ି ଦେବେ, ସେମାନଙ୍କ ମଧ୍ୟରେ ତୁମ୍ଭେ ଭୟଙ୍କର ବିଷୟ, ପ୍ରବାଦ ଓ ଉପହାସର ପାତ୍ର ହେବ। ତୁମ୍ଭେ କ୍ଷେତ୍ରକୁ ଅନେକ ବୀଜ ନେଇଯିବ, ମାତ୍ର ଅଳ୍ପ ସଂଗ୍ରହ କରିବ, କାରଣ ପଙ୍ଗପାଳ ତାହା ଗ୍ରାସ କରିବ। ତୁମ୍ଭେ ଦ୍ରାକ୍ଷାକ୍ଷେତ୍ର ରୋପଣ କରି ତହିଁର ଯତ୍ନ ନେବ, ମାତ୍ର ଦ୍ରାକ୍ଷାରସ ପାନ କରିବ ନାହିଁ କି ଦ୍ରାକ୍ଷାଫଳ ସଂଗ୍ରହ କରିବ ନାହିଁ—ପୋକ ତାହା ଖାଇ ପକାଇବ। ତୁମ୍ଭ ସମସ୍ତ ସୀମା ମଧ୍ୟରେ ତୁମ୍ଭର ଜୀତବୃକ୍ଷ ଥିବ, ମାତ୍ର ତୁମ୍ଭେ ଆପଣାକୁ ତୈଳରେ ମର୍ଦ୍ଦନ କରିବ ନାହିଁ, କାରଣ ତୁମ୍ଭର ଜୀତଫଳ ଝଡ଼ି ପଡ଼ିବ। ତୁମ୍ଭେ ପୁତ୍ର ଓ କନ୍ୟାମାନଙ୍କୁ ଜନ୍ମ ଦେବ, ମାତ୍ର ସେମାନେ ତୁମ୍ଭର ହୋଇ ରହିବେ ନାହିଁ, କାରଣ ସେମାନେ ବନ୍ଦୀତ୍ଵକୁ ଯିବେ। ଗୁଞ୍ଜନକାରୀ ପଙ୍ଗପାଳ ତୁମ୍ଭ ସମସ୍ତ ବୃକ୍ଷ ଓ ତୁମ୍ଭ ଭୂମିର ଫଳ ଅଧିକାର କରିବ। ତୁମ୍ଭ ମଧ୍ୟରେ ଥିବା ବିଦେଶୀ ତୁମ୍ଭଠାରୁ କ୍ରମଶଃ ଅଧିକ ଅଧିକ ଉଚ୍ଚରେ ଉଠିବ; ତୁମ୍ଭେ କ୍ରମଶଃ ଅଧିକ ଅଧିକ ତଳକୁ ବସିଯିବ। ସେ ତୁମ୍ଭକୁ ଋଣ ଦେବ, ମାତ୍ର ତୁମ୍ଭେ ତାକୁ ଋଣ ଦେବ ନାହିଁ। ସେ ମସ୍ତକ ହେବ; ତୁମ୍ଭେ ଲାଙ୍ଗୁଳ ହେବ।

ଏହିସବୁ ଅଭିଶାପ ତୁମ୍ଭ ଉପରକୁ ଆସିବ, ପୁଣି ତୁମ୍ଭେ ବିନଷ୍ଟ ନ ହେବା ପର୍ଯ୍ୟନ୍ତ ତୁମ୍ଭ ପଛେ ଗୋଡ଼ାଇ ତୁମ୍ଭ ପ୍ରତି ଘଟିବ, କାରଣ ତୁମ୍ଭ ପିତା ତୁମ୍ଭକୁ ଆଜ୍ଞା ଦେଇଥିବା ତାହାଙ୍କ ଆଜ୍ଞା ଓ ବିଧି ପାଳନ କରିବା ପାଇଁ ତୁମ୍ଭେ ତାହାଙ୍କ ରବ ଶୁଣିଲ ନାହିଁ। ସେସବୁ ଯୁଗେ ଯୁଗେ ତୁମ୍ଭ ଓ ତୁମ୍ଭ ବଂଶ ବିରୁଦ୍ଧରେ ଚିହ୍ନ ଓ ଅଦ୍ଭୁତ ବିଷୟ ସ୍ଵରୂପ ହେବ। ତୁମ୍ଭର ସମସ୍ତ ବିଷୟ ପ୍ରଚୁର ଥିବା ବେଳେ ତୁମ୍ଭେ ଆନନ୍ଦ ଓ ଆହ୍ଲାଦିତ ହୃଦୟରେ ଆପଣା ପିତାଙ୍କ ସେବା କଲ ନାହିଁ, ଏହେତୁ ତୁମ୍ଭ ପିତା ତୁମ୍ଭ ବିରୁଦ୍ଧରେ ଯେଉଁ ଶତ୍ରୁମାନଙ୍କୁ ପ୍ରେରଣ କରିବେ, ସେମାନଙ୍କ ସେବା ତୁମ୍ଭେ କ୍ଷୁଧା, ତୃଷ୍ଣା, ଉଲଙ୍ଗତା ଓ ଘୋର ଅଭାବରେ କରିବ। ସେ ତୁମ୍ଭକୁ ବିନଷ୍ଟ ନ କରିବା ପର୍ଯ୍ୟନ୍ତ ତୁମ୍ଭ ଗ୍ରୀବା ଉପରେ ଲୌହ ଯୁଆଳି ଦେବେ। ତୁମ୍ଭ ପିତା ଦୂରରୁ, ପୃଥିବୀର ପ୍ରାନ୍ତରୁ, ଉତ୍କ୍ରୋଶ ପକ୍ଷୀ ତୁଲ୍ୟ ଉଡ଼ି ଆସି ତୁମ୍ଭ ବିରୁଦ୍ଧରେ ଏକ ଜାତି ଆଣିବେ—ଯେଉଁ ଜାତିର ଭାଷା ତୁମ୍ଭେ ବୁଝିବ ନାହିଁ, ଏପରି ଏକ ଉଗ୍ରବଦନ ଜାତି, ଯେ ବୃଦ୍ଧ ପ୍ରତି ସମ୍ମାନ କି ଯୁବ ପ୍ରତି କୃପା ଦେଖାଇବ ନାହିଁ। ତୁମ୍ଭେ ବିନଷ୍ଟ ନ ହେବା ପର୍ଯ୍ୟନ୍ତ ସେମାନେ ତୁମ୍ଭ ପଶୁଧନର ବତ୍ସ ଓ ତୁମ୍ଭ ଭୂମିର ଫଳ ଗ୍ରାସ କରିବେ, ପୁଣି ତୁମ୍ଭ ପାଇଁ ଶସ୍ୟ, ନୂତନ ଦ୍ରାକ୍ଷାରସ କି ତୈଳ, ତୁମ୍ଭ ଗୋରୁର ବତ୍ସ କି ତୁମ୍ଭ ମେଣ୍ଢାପଲର ବତ୍ସ କିଛି ହିଁ ଅବଶିଷ୍ଟ ରଖିବେ ନାହିଁ, ଯେପର୍ଯ୍ୟନ୍ତ ସେମାନେ ତୁମ୍ଭକୁ ବିନାଶ ନ କରନ୍ତି। ତୁମ୍ଭ ସମଗ୍ର ଦେଶ ମଧ୍ୟରେ ତୁମ୍ଭର ଯେଉଁ ଉଚ୍ଚ, ଦୃଢ଼ ପ୍ରାଚୀର ଉପରେ ତୁମ୍ଭେ ବିଶ୍ଵାସ ରଖୁଅଛ, ତାହା ଭୂମିସାତ୍‌ ନ ହେବା ପର୍ଯ୍ୟନ୍ତ ସେମାନେ ତୁମ୍ଭ ସମସ୍ତ ନଗରରେ ତୁମ୍ଭକୁ ଅବରୋଧ କରିବେ। ତୁମ୍ଭ ପିତା ତୁମ୍ଭକୁ ଦେଇଥିବା ସମଗ୍ର ଦେଶ ମଧ୍ୟରେ ସମସ୍ତ ନଗର ଭିତରେ ସେମାନେ ତୁମ୍ଭକୁ ଅବରୋଧ କରିବେ। ସେତେବେଳେ ତୁମ୍ଭ ଶତ୍ରୁ ତୁମ୍ଭ ଉପରେ ଆଣିବା ଅବରୋଧ ଓ ସଙ୍କଟରେ ତୁମ୍ଭେ ଆପଣା ଗର୍ଭର ଫଳ, ତୁମ୍ଭ ପିତା ତୁମ୍ଭକୁ ଦେଇଥିବା ପୁତ୍ର ଓ କନ୍ୟାମାନଙ୍କ ମାଂସ ଭୋଜନ କରିବ। ତୁମ୍ଭ ମଧ୍ୟରେ ଅତି କୋମଳ ଓ ସୁକୁମାର ପୁରୁଷ ଆପଣା ଭ୍ରାତା, ଆପଣା କୋଳର ଭାର୍ଯ୍ୟା ଓ ଆପଣାର ଅବଶିଷ୍ଟ ସନ୍ତାନଗଣ ପ୍ରତି ଈର୍ଷାଦୃଷ୍ଟି କରିବ, ସେ ଯେଉଁ ଆପଣା ସନ୍ତାନଗଣର ମାଂସ ଖାଉଅଛି, ତହିଁରୁ ସେମାନଙ୍କ ମଧ୍ୟରୁ କାହାକୁ ଦେବାକୁ ଅସମ୍ମତ ହେବ, କାରଣ ତୁମ୍ଭ ଶତ୍ରୁ ତୁମ୍ଭ ସମସ୍ତ ନଗର ଭିତରେ ତୁମ୍ଭ ଉପରେ ଆଣିବା ଅବରୋଧ ଓ ସଙ୍କଟରେ ତାହା ପାଇଁ ଅନ୍ୟ କିଛି ହିଁ ଅବଶିଷ୍ଟ ନ ଥିବ। ତୁମ୍ଭ ମଧ୍ୟରେ ଯେଉଁ ଅତି କୋମଳ ଓ ସୁକୁମାରୀ ସ୍ତ୍ରୀ ସୁକୁମାରତା ହେତୁ ଭୂମି ଉପରେ ଆପଣା ପାଦ ତଳିଆ ରଖିବାକୁ ସାହସ କରି ନ ଥିବ, ସେ ଆପଣା କୋଳର ସ୍ଵାମୀ ଓ ଆପଣାର ପୁତ୍ର ଓ କନ୍ୟା ପ୍ରତି ଈର୍ଷାଦୃଷ୍ଟି କରିବ, ହଁ, ଆପଣା ଚରଣ ମଧ୍ୟରୁ ନିର୍ଗତ ଗର୍ଭସ୍ରାବ ଓ ଆପଣାର ପ୍ରସୂତ ସନ୍ତାନଗଣ ପ୍ରତି ହିଁ, କାରଣ ତୁମ୍ଭ ଶତ୍ରୁ ତୁମ୍ଭ ନଗରସମୂହ ଭିତରେ ତୁମ୍ଭ ଉପରେ ଆଣିବା ଅବରୋଧ ଓ ସଙ୍କଟ ସମୟରେ ଅନ୍ୟ କିଛି ହିଁ ନ ଥିବାରୁ ସେ ସେମାନଙ୍କୁ ଗୋପନରେ ଭୋଜନ କରିବ। ଯଦି ତୁମ୍ଭେ ଏହି ପୁସ୍ତକରେ ଲିଖିତ ଏହି ବ୍ୟବସ୍ଥାର ସମସ୍ତ ବାକ୍ୟ ଯତ୍ନପୂର୍ବକ ପାଳନ କରିବାକୁ, ଏହି ମହିମାନ୍ଵିତ ଓ ଭୟାବହ ନାମ—ପିତାଙ୍କୁ ଭୟ କରିବାକୁ ସାବଧାନ ନ ହୁଅ, ତେବେ ତୁମ୍ଭ ପିତା ତୁମ୍ଭ ଓ ତୁମ୍ଭ ବଂଶ ଉପରେ ଅଦ୍ଭୁତ ମହାମାରୀ, ଅର୍ଥାତ୍‌ ଦୁଃସାଧ୍ୟ ଓ ଦୀର୍ଘସ୍ଥାୟୀ ମହାମାରୀ, ଦୁଃସାଧ୍ୟ ଓ ଦୀର୍ଘସ୍ଥାୟୀ ବ୍ୟାଧି ଆଣିବେ। ତୁମ୍ଭେ ମିସରର ଯେଉଁ ସମସ୍ତ ରୋଗରେ ଭୀତ ଥିଲ, ସେ ତାହା ତୁମ୍ଭ ଉପରକୁ ପୁନର୍ବାର ଆଣିବେ, ଆଉ ସେସବୁ ତୁମ୍ଭଠାରେ ଲାଗି ରହିବ। ଏହି ବ୍ୟବସ୍ଥା ପୁସ୍ତକରେ ଅଲିଖିତ ପ୍ରତ୍ୟେକ ବ୍ୟାଧି ଓ ମହାମାରୀ ମଧ୍ୟ ତୁମ୍ଭ ପିତା ତୁମ୍ଭେ ବିନଷ୍ଟ ନ ହେବା ପର୍ଯ୍ୟନ୍ତ ତୁମ୍ଭ ଉପରକୁ ଆଣିବେ। ତୁମ୍ଭେ ଯେଉଁମାନେ ଆକାଶର ତାରାଗଣ ତୁଲ୍ୟ ଅସଂଖ୍ୟ ଥିଲ, ତୁମ୍ଭେ ଅଳ୍ପସଂଖ୍ୟକ ହୋଇ ଅବଶିଷ୍ଟ ରହିବ, କାରଣ ତୁମ୍ଭେ ଆପଣା ପିତାଙ୍କ ରବ ଶୁଣିଲ ନାହିଁ। ତୁମ୍ଭ ପିତା ଯେପରି ତୁମ୍ଭର ମଙ୍ଗଳ କରିବାକୁ ଓ ତୁମ୍ଭକୁ ବହୁବଂଶ କରିବାକୁ ଆନନ୍ଦ କଲେ, ସେପରି ତୁମ୍ଭ ପିତା ତୁମ୍ଭକୁ ବିନଷ୍ଟ ଓ ବିନାଶ କରିବାକୁ ଆନନ୍ଦ କରିବେ, ଆଉ ତୁମ୍ଭେ ଯେଉଁ ଦେଶ ଅଧିକାର କରିବାକୁ ପ୍ରବେଶ କରୁଅଛ, ତହିଁରୁ ତୁମ୍ଭେ ଉତ୍ପାଟିତ ହେବ। ତୁମ୍ଭ ପିତା ତୁମ୍ଭକୁ ପୃଥିବୀର ଏକ ପ୍ରାନ୍ତରୁ ଅନ୍ୟ ପ୍ରାନ୍ତ ପର୍ଯ୍ୟନ୍ତ ସମସ୍ତ ଗୋଷ୍ଠୀ ମଧ୍ୟରେ ଛିନ୍ନଭିନ୍ନ କରିବେ, ଆଉ ସେଠାରେ ତୁମ୍ଭେ ଓ ତୁମ୍ଭ ପିତୃପୁରୁଷଙ୍କ ଅଜ୍ଞାତ କାଷ୍ଠ ଓ ପ୍ରସ୍ତରର ଅନ୍ୟ ଦେବତାଗଣର ସେବା କରିବ। ସେହି ଜାତିସମୂହ ମଧ୍ୟରେ ତୁମ୍ଭେ କିଛି ବିଶ୍ରାମ ପାଇବ ନାହିଁ, ତୁମ୍ଭ ପାଦ ତଳିଆ ପାଇଁ କିଛି ବିଶ୍ରାମ ସ୍ଥାନ ନ ଥିବ। ସେଠାରେ ତୁମ୍ଭ ପିତା ତୁମ୍ଭକୁ କମ୍ପିତ ହୃଦୟ, କ୍ଷୀଣ ଚକ୍ଷୁ ଓ ନିରାଶ ପ୍ରାଣ ଦେବେ। ତୁମ୍ଭ ଜୀବନ ତୁମ୍ଭ ସମ୍ମୁଖରେ ସନ୍ଦେହରେ ଝୁଲୁ ଥିବ। ଦିବାରାତ୍ର ତୁମ୍ଭେ ଭୀତ ହେବ, ଆପଣା ଜୀବନ ବିଷୟରେ କଦାପି ନିଶ୍ଚିତ ହେବ ନାହିଁ। ପ୍ରଭାତରେ ତୁମ୍ଭେ କହିବ, “ଆଃ, ସନ୍ଧ୍ୟା ହୁଅନ୍ତା କି!” ପୁଣି ସନ୍ଧ୍ୟାରେ କହିବ, “ଆଃ, ପ୍ରଭାତ ହୁଅନ୍ତା କି!”—ତୁମ୍ଭ ହୃଦୟ ପୂର୍ଣ୍ଣ କରିବା ଭୟ ହେତୁ ଓ ତୁମ୍ଭ ଚକ୍ଷୁ ଦେଖିବା ଦୃଶ୍ୟ ହେତୁ। ତୁମ୍ଭେ ଏହି ପଥ ଆଉ କେବେ ଦେଖିବ ନାହିଁ ବୋଲି ମୁଁ ଯାହା କହିଥିଲି, ସେହି ପଥରେ ତୁମ୍ଭ ପିତା ଜାହାଜରେ ତୁମ୍ଭକୁ ପୁନର୍ବାର ମିସରକୁ ଫେରାଇ ଆଣିବେ। ସେଠାରେ ତୁମ୍ଭେମାନେ ଆପଣାମାନଙ୍କୁ ଦାସ ଓ ଦାସୀ ରୂପେ ଆପଣା ଶତ୍ରୁମାନଙ୍କ ନିକଟରେ ବିକ୍ରୟ ନିମନ୍ତେ ଉପସ୍ଥାପିତ କରିବ, ମାତ୍ର କେହି ତୁମ୍ଭକୁ କିଣିବ ନାହିଁ।