Laa 88

88 ¹Iwui huikhamiwui Avā, ngashunna ina ngakaowa, kala ngayā ina nawui mangāli ngakaowa. ²Iwui seihā kasā nawui mangāli rāshungranu; iwui khavaoli nakhanā ngareirālu. ³Kaja iwui manglā kakhanangna pemhaira, kala iwui mirinna Kathewui ramli vānganaiya. ⁴Chomli tāzang kahaibingwui ngachaili ili mashithaira; yāng maleila mi akha thāda ina ngasāhaira. ⁵Kathibingwui ngachaili chihokahaina, chikhurli kapi sāthat kahaibing thāda, nana mangaphaningunglui kahaibing, kaja athum nawui pāngwui eina katathai kahaina. ⁶Nana ili chomwui kathukali haimihaira, tangkhamang pambingli, kathukalungli. ⁷Nawui malungkhavātna iwuitungli kharita parza̱da lei, kala nawui khangaphao saikora eina nana ili khuithuihaira.

⁸Nana iwui ngasotnaobingli iwui eina tālak eina khuithuimihaira; athumli khangachee khavai ili sāmihaira. Ili mayāmshok khavai shunghaira; ⁹Wukkakhanangna imik mamachāhaira. Zimiksho kachiva̱li ina nali ngakaowa, iwui Avā; ipāng nawui vang hāshokhaira. ¹⁰Kathibingwui vang nana matakhak kahai ot sārala? Achā thikahaibingna nali sochikat khavai ngakarthuira?

¹¹Nawui makhangachei leikashi chikhurli phongmira, nawui ning katong Sākashimānli phongmira? ^a a v11 Abaddon: 'sāshimān' da khangartuiwui Hibru tui, kathinaobingwui apam kathukameikapwui aming akha. ¹²Nawui matakhak kahai ot tangkhamangli theisera, lah nawui khamashung khangarong malaihaiwui ngaleili theisera? ¹³Kha ina nali ngachonmi khavai ngakaowa, iwui Avā; ngathor iwui seihā kasā nawui mangāli rāhaira. ¹⁴Khisāda, iwui Avā, iwui manglā mayāchinghaokhala? Khisāda namai iwui eina ngathumhaikhala? ¹⁵I nganuilakha eina thuida chotchāng eina kathili nganaihaira, nawui khangachee ina khāngmihaira; ina khāsuthaira. ¹⁶Nawui sākashi malungkhavāt iwuitungli tāshunghaira; nawui ngacheenā ngararra ili sāshimānhaira. ¹⁷Tara̱ kaphong thāda athumna ili zimiksho hupta kuinama; athum katonga eina ili kuinamhaira. ¹⁸Nana leikashe kala khavaknaoli iwui eina tālak eina khuithuimihaira; iwui ngasotnaobing tangkhamangli lei.