Laa 89

89 ¹Ina ithumwui Avāwui makhangachei leikashi katang mavaila laa sāra; nawui ningkatong thot saikorali vaomalānra. ²Kaja ina hānga, “Makhangachei leikashi katang mavaila leichingra khavai sākā kahaina; kazingramli nana nawui ningkatong semkāmira.

³Ina iwui kapang kahaili tuingashit akha sai; iwui rao Davidli khangashit sāhaira: ⁴'Ina nawui ara̱-azā katang mavaila semkāmira, kala nawui wungpamkhong thot saikorali sākāra.'"

⁵Kazingramna nawui matakhak kahai ot sochikatra, O ithumwui Avā, kala katharabingwui kazipli nawui ningkatongla sochikatra. ⁶Kaja kazingramli khipāna ithumwui Avāli ngaraichashapra? Kazingli khaleibingwui alungli khipāna ithumwui Avā kathā leira, ⁷matakhak eina ngacheera Avā akha, katharabingwui kazipli, kala ali kuinam kahai saikorawuitungli khangachee khangachāna? ⁸O saikorawui Avā, khipāna na kathā pangshapa leikhala? Nawui ningkatongna nali kuinammi.

⁹Nana shamadruwui khangaphaotungli munga; chiwui tara̱ khangaphao tharan, nana chi va̱rihai ngasakmi. ¹⁰Nana shamadruwui sārei Rahabli kathi kahai kathingun kathāda ngaphita; nawui kapanga pāngthei eina nana nawui yangkashebingli yaovāserhaira. ¹¹Kazingram nawuina; okathui chila nawuina; okathui kala chiwui alungli khalei saikora—nana chi phāshok kahaina. ¹²Atungshong kala azingshong—nana chi sākahaina; Tabor kala Harmonna nawui ming eina mathānda vaora. ¹³Nawui pāngthei yāng kālaka; nawui pāng kapangana; nawui yāpang khāngkāhaira.

¹⁴Khamashung khangarong kala mashunna nawui wungpamkhong rungkhavaina; makhangachei leikashi kala ningkatong nawui mangāli rida vāra. ¹⁵O ithumwui Avā, nawui maiwui kahorli kazatabing, khamathānkhon kathei mibing chi sokhamina. ¹⁶Nawui ming eina athumna zimiksho katonga mathānra, kala nawui khamashung khangarong eina athum reisang ngasakra. ¹⁷Kaja nava athumwui yāngwui tekhamateina, kala nawui ngahānkhangai eina ithumwui pangshap reisang ngasakra. ¹⁸Kaja ithumwui chāngvei ithumwui Avāwuina, kala ithumwui awunga Israelwui Katharapā, ithumwui Avāwuina.

¹⁹Chiwui thili nana khamahāli nawui katharabingli hānga: "Ina kapinga akhali khangachon mihaira; Ina mibingwui eina kapang kahai akha khāngmathothaira. ²⁰Ina iwui rao Davidli samphanghaira; iwui kathara thao eina ina ali neomihaira, ²¹chiwui vang eina iwui pāngna ali singtitmira; iwui pāngtheinala ali pangngasakra. ²²Yangkashe khipānakha ali masuikhuimara, kala makhayā khipānakha ali maishi mangasāmara. ²³Ina awui mangāli awui yangkashebingli ngataikachupra, kala ali yangkakharingbingli sāthatra. ²⁴Iwui ningkatong kala iwui makhangachei leikashi awuili leira, kala iwui ming eina awui pangshap masot chikatra. ²⁵Ina awui pāng yireitungli haira, kala awui yāpang kongbingtungli haira. ²⁶Ana ili ngakaora, 'Na iwui Avāna, iwui Vare, kala iwui huikhamiwui Lunghārna.' ^a a v26 Ithumwui Avāli "iwui Avā" da kahohai Davidwui naomayara chi Jishuli ungshungmihaira, ana shimshong khuirālak saikorali hi tui chi sakrummikhame reimei Naomayara chi. ²⁷Kala Ina ali naochizai, okathuiwui awungabingwui lungli reimeikap sāra. ²⁸Iwui makhangachei leikashi awui vang katang mavaila mayonra, kala iwui tuingashit awui vang mangacheila leira. ²⁹Ina awui ara̱-azāli katang mavaila sakāmira, kala awui wungpamkhong kazingram leichingda leira.

³⁰Awui naongarāna iwui ainli horhaiakha, kala iwui shiyan-chikanli makhanganāakha, ³¹athumna iwui ainli kaiakha, kala iwui ningkhami mamayonakha, ³²chithāda Ina athumwui salāng lijei eina, kala athumwui moreili kashao eina shaora, ³³kha Ina Davidwui eina iwui makhangachei leikashi makhuithuimara, kala iwui ningkatong mayangmimara. ³⁴Ina iwui tuingashitli makaimara, kala imorchaina hānghai tui chi mangalanmara. ³⁵Akhashida ina iwui kathar eina khangashit sāhaira; Davidli ina makapikmara. ³⁶Awui ara̱-azā katang mavaila nganingchingra, awui wungpamkhong iwui mangāli zimik thāda leira. ³⁷Kachāng thāda chi katang mavaila sakāmira, kazingramli ningkatonga shākhina.”

³⁸Kha ara nana ali chinserda khalanhaira; nawui thao neomi kahaiwuitungli nana malungkhavātna pemtinghaira. ³⁹Nawui raoli sākahai tuingashit chi nana horhaira; awui kuihon chifali nana sākhamānghaira. ⁴⁰Awui phākho saikora nana sākhaihaira; awui raipanbing nana ramcho sāngasakhaira. ⁴¹Kānung kānkhavābing saikorana ali ngaponkakhuihaira; awui khongnainaobingwui mana̱kashi ngasāhaira. ⁴²Awui yangkashebingwui yāpang nana khangkakā ngasakhaira; awui yangkashe saikorali nana ringphā sāngasakhaira. ⁴³Awui raighai ayar nana ngalatmihaora, kala raili ali nganingshing khavai nana machonmimana. ⁴⁴Awui tekhamatei nana sāshimithaira, kala awui wungpamkhong nana ngaleili horsanghaira. ⁴⁵Awui nganuilakhawui atam nana sha̱sang ngasakhaira; maikashi eina nana ali shaksāmihaira.

⁴⁶Karankha, ithumwui Avā? Nakhalatta mashimānla ngathumfarala? Karankha nawui malungkhavāt mei thāda chuirala? ⁴⁷Iwui mirin kayākha aremakhala kaji chi phaningunglu! Kayākha khamasai vang eina nana mi saikora sākhuihaokhala! ⁴⁸Khipā mina ringchingda kathi matheira̱khala? Khipāna Kathewui pāng eina akhalatta huikhuishaprakhala?

⁴⁹O Avā, nana nawui ningkatong eina Davidli ngashit kahai, nawui achālakhawui makhangachei leikashi karāli leikhala? ⁵⁰O Avā, nawui raobingtungli horkahai mana̱kashi chi phaningunglu, kayākha ina miyur kachungkhawui zeikakharui iwui ningli phungkhavai, ⁵¹chi eina nawui yangkashebingna mana̱shihaira, ithumwui Avā, chi eina athumna nawui thao neomi kahaia awui pheikār saikorali mana̱shihaira.

⁵²Ithumwui Avāli katang mavaila sochingranu! Amen kala Amen.