Laa 90

90 ¹Proho Avā, na thot saikorali ithumwui pamkhavai ngasāhaira. ²Kaphungbing mapharāranglakha, lah nana ngalei kala okathui masākhuiranglakha, katang makhavaiwui eina katang mavaila, na ithumwui Avāna.

³Nana mibingli chifali latung ngasaka, "Miwui naongarā, latunghaolu," da hānga.

⁴Kaja zingkum thingkha chi nawui miktāli thuihairasai zimiksho akha thāda, ngayāwui khamayon akha kathāna. ⁵Nana athumli tara̱ kaphong thāda khuithuimihaira; athum mang thāda, ngathor phorkhavai khawo kathāna, ⁶Ngathor chi phorda shokra; ngazin ngahuida thenghaowa.

⁷Kaja nawui malungkhavātna ithumli kānmihaira; nawui malung kasāna ithum khakshingakhaira. ⁸Nana ithumwui khayonkhamāng nawui mangāli, ithumwui ngathum morei nawui mangāwui kahorli haihaira. ⁹Kaja ithumwui zimiksho saikora nawui malungkhavāt azingli lānhaira; ithumwui zingkum khāsut akha thāda kupmihaira. ¹⁰Ithumwui mirin zingkum hangshinina, lah yāng kalei jisi zingkum hangchishatna; chithālala ngalangkazār kala kakhanang lāngra kajina; ngalāngda thuihaira, kala ithum yongthuihaira. ¹¹Nawui malungkhavātwui pangshap chi khipāna thei? Nawui malung kasā chi nali khayākashi khangayi athishurda reikhamataina. ¹²Ithumwui zimiksho shān khavai ithumli tamchitheimilu, chithākha ithumna thangkhamei ning samphangra.

¹³Latunghaolu, ithumwui Avā! Karankharakhala? Nawui raobingli lumashanmilu. ¹⁴Ngathor nawui makhangachei leikashi eina ithumli ningyāng ungngasakmilu, chithākha ithumwui mirin peida mathānda laa sāda ringphāra. ¹⁵Ithumna kakhanang theihairasai zingkum athishurda, nana ithumli khanang ngasakkahai zimiksho athishurda ithumli mathān ngasakmilu. ¹⁶Nawui raobingna nawui otsak theiranu, kala athumwui naongarāna nawui tekhamatei theiranu.

¹⁷Proho Avāwui mayākhami ithumwuitungli leiranu; ithumwui pāng eina kasā ithumwui vang sakāmilu—mha, ithumwui pāng eina kasā sakāmilu.