زبور 90

90 ¹اے حاکمِ اعلیٰ باپ، تُو پُشت در پُشت ہماری پناہ گاہ رہا ہے۔ ²اِس سے پہلے کہ پہاڑ پیدا ہوئے، یا تُو نے زمین اور دنیا کو وجود بخشا، ازل سے ابد تک تُو ہی ہمارا باپ ہے۔

³تُو اِنسان کو خاک میں لَوٹا دیتا ہے، اور کہتا ہے، ”اے بنی آدم، لَوٹ آؤ۔“

⁴کیونکہ تیری نظر میں ہزار برس اَیسے ہیں جَیسے گزرا ہوا کل، یا رات کا ایک پہر۔ ⁵تُو اُنہیں سَیلاب کی طرح بہا لے جاتا ہے؛ وہ خواب کی مانند ہیں، اُس گھاس کی مانند جو صبح کو اُگتی ہے، ⁶صبح کو وہ پھلتی اور اُگتی ہے؛ شام تک وہ مُرجھا کر سوکھ جاتی ہے۔

⁷کیونکہ ہم تیرے غضب سے فنا ہو جاتے ہیں؛ تیرے قہر سے ہم پریشان ہیں۔ ⁸تُو نے ہماری بدکرداری اپنے سامنے رکھی ہے، اور ہمارے پوشیدہ گناہ اپنے چہرے کے نُور میں۔ ⁹کیونکہ ہمارے سب دن تیرے قہر میں گزر جاتے ہیں؛ ہم اپنے برس ایک آہ کی طرح تمام کرتے ہیں۔ ¹⁰ہماری عمر ستّر برس کی ہے، یا اگر توانائی ہو تو اَسّی برس کی؛ تَو بھی اُن میں محنت اور رنج کے سوا کچھ نہیں—وہ جلد گزر جاتے ہیں، اور ہم اُڑ جاتے ہیں۔ ¹¹تیرے غضب کی قُدرت کو کون جانتا ہے؟ تیرا قہر اُتنا ہی عظیم ہے جتنا تیرا خوف واجب ہے۔ ¹²ہمیں اپنے دنوں کو گِننا سِکھا، تاکہ ہم دانائی کا دل حاصل کریں۔

¹³اے ہمارے باپ، لَوٹ آ! کب تک؟ اپنے بندوں پر رحم کر۔ ¹⁴صبح کو ہمیں اپنی عہد کی محبت سے آسودہ کر، تاکہ ہم عمر بھر خوشی سے گائیں اور شادمان رہیں۔ ¹⁵ہمیں اُتنے ہی دن شادمان کر جتنے دن تُو نے ہمیں دُکھ دیا، اور اُتنے برس جتنے ہم نے مصیبت دیکھی۔ ¹⁶تیرے بندے تیرا کام دیکھیں، اور اُن کی اولاد تیرا جلال دیکھے۔

¹⁷حاکمِ اعلیٰ باپ کا فضل ہم پر ہو؛ ہمارے ہاتھوں کے کام کو ہمارے لیے قائم کر—ہاں، ہمارے ہاتھوں کے کام کو قائم کر۔