Mozesi Aphembera Baba Wakukhonda Kumala

Phembero ya Mozesi, munthu wa Baba wathu.

Mozesi asaikha umaso wa munthu pambali pa Baba wace wakukhonda kumala: magole cikwi asapita ninga ndzidzi wakulinda usiku wa dzulo, mbanthu asakukulwa ninga udzu wa macibese. Iye nkhaphemba ntsiku zizinji, mbwenye nzeru toera kuzilengesa, pabodzi na kukomerwa kunalingana na magole a nyatwa.

Kapitulu 90.

Baba Wankulu, Imwe ndimwe mbuto yathu yakukhala m'mibadwo yonsene. Mapiri mbadzati kubalwa, peno mudzati kucita mataka na dziko, kutomera muyaya mpaka muyaya, Imwe ndimwe Baba wathu.

Imwe musabweza anthu ku pfumbi, mbalonga kuti: “Bwererani, ana a anthu.”

Thangwi pyaka 1.000 pamaso panu piri ninga ntsiku yadapita kale, ninga n'dzidzi wakulindira wa usiku. Imwe musaakukuta ninga na cigumula; iwo ali ninga cirota, ninga uswa unamera namacibese, namacibese usaphukira mbukula; namadzulo usauma mbubvunda.

Thangwi tisamala na ukali wanu; na kuipirwa kwanu tisadzudzumika. Imwe mwaikha madawo athu pamaso panu, pyakudawa pyathu pyakubisika m'ceza ca kuoneka kwanu. Thangwi ntsiku zathu zonsene zisapita pa ntsi pa kuipirwa kwanu; tisamalisa pyaka pyathu ninga kututa moyo. Tisakhala pyaka makumanomwe, peno makumasere mphambvu zathu zingawanga; mbwenye pisabweresa basi nyatwa na kutsukwala—pisapita mwakucimbiza, ife tisauluka. Mbani asadziwa mphambvu ya ukali wanu? Kuipirwa kwanu ndi kukulu ninga momwe musafunika kugopwa. Tipfundziseni kulengesa ntsiku zathu, toera tikhale na ntima wa udziwisi.

Bwererani, Baba wathu! Mpaka lini? Citirani ntsisi atumiki anu. Tikhutiseni namacibese na kufuna kwanu kwa cibverano, toera tiimbe mwakutsandzaya mbatikomerwa ntsiku zathu zonsene. Tikomereseni mwakulingana na ntsiku zidatithabusa Imwe, na pyaka ninga pidaona ife nyatwa. Atumiki anu mbaone basa yanu, ana awo mbaone mbiri yanu.

Kukoma ntima kwa Baba Wankulu mbikhale pa ife; limbisirani basa ya manja athu—inde, limbisani basa ya manja athu.