詩篇 90

90 ¹至高無上嘅父啊, 你世世代代都做咗我哋嘅居所。 ²喺群山未誕生之前, 喺你造出大地同世界之前, 從亙古 到永遠,你都係我哋嘅父。

³你使人歸回塵土, 話:「世人啊,返轉頭嚟啦。」

⁴因為喺你眼中, 一千年好似已經過去嘅一日,又好似夜間嘅一更。 ⁵你好似洪水咁將佢哋沖走; 佢哋好似一場夢,又好似朝早生長嘅草, ⁶朝早發芽生長,到夜晚就凋謝枯乾。

⁷因為我哋被你嘅怒氣消滅, 又因你嘅忿怒而驚惶。 ⁸你將我哋嘅罪孽擺喺 你面前,將我哋隱藏嘅罪擺喺你面光之中。 ⁹我哋一生嘅日子都喺你嘅忿怒之下消逝;我哋度過嘅年歲好似一聲嘆息。 ¹⁰我哋一生嘅年日有七十年, 若果強壯就有八十年;但當中所有嘅不過係勞苦愁煩——轉眼就過去,我哋就好似飛走咗一樣。 ¹¹邊個曉得你怒氣嘅威力呢? 你嘅忿怒,同你應得嘅敬畏一樣咁大。 ¹²求你教我哋數算自己嘅日子, 使我哋得着智慧嘅心。

¹³我哋嘅父啊,返轉頭嚟啦!要到幾時呢? 求你憐憫你嘅僕人。 ¹⁴求你喺朝早用你立約嘅慈愛使我哋飽足, 使我哋一生一世都歡呼喜樂。 ¹⁵求你使我哋歡喜嘅日子,同你叫我哋受苦 嘅日子一樣咁多,同我哋見過患難嘅年歲一樣咁多。 ¹⁶願你嘅僕人 得見你嘅作為,願佢哋嘅子孫得見你嘅榮美。

¹⁷願至高無 上嘅父嘅恩寵臨到 我哋身上;又願你為我哋堅立我哋雙手所作嘅工——係呀,求你堅立我哋雙手所作嘅工。