Mkpu Akwa Heman Site nʼEbe Dị Omimi

Abụ. Abụ Ọma nke ụmụ Kora. Nye onyeisi ndị ọbụ abụ, dịka Mahalat Leannot. Abụ amamihe nke Heman onye Ezra.

Abụ ọma kacha gbaa ọchịchịrị. Heman na-eti mkpu ehihie na abalị, a gụkọtara ya na ndị nwụrụ anwụ, iwe pịrị ya nʼala, Nna ahụ ọ na-ekpere ekpere wepụrụ ndị enyi ya. Ọ jụrụ ma ili ọ̀ pụrụ ito, ọ dịghị azịza ọ natara, abụ ọma ahụ wee kwụsị nʼọchịchịrị na-enweghị ntụgharị.

Isi 88.

Nna nke nzọpụta m, nʼehihie, ana m eti mkpu, nʼabalị, ana m akwa ákwá nʼihu gị. Ka ekpere m bịaruo nʼihu gị; chee ntị gị nʼebe mkpu akwa m dị. Nʼihi na mkpụrụobi m jupụtara na nsogbu, ndụ m na-abịarukwa ili nso. A gụnyere m nʼetiti ndị na-arịda nʼolulu; adịla m ka nwoke na-enweghị ike. A hapụrụ m ka m nọrọ nʼetiti ndị nwụrụ anwụ, dịka ndị e gburu egbu ndị dina nʼili, bụ ndị ị naghịkwa echeta, nʼihi na ebipụla ha site nʼaka gị. I debela m nʼime olulu kachasị omimi, nʼebe gbara ọchịchịrị, nʼebe miri gbara ọgbụ. Oke iwe gị dakwasịrị m arọ nʼahụ; i werela ebili mmiri gị niile kpuchie m.

I meela ka ndị enyi m si nʼebe m nọ pụọ nnọọ anya; i meela m ka m bụrụ ihe na-atụ ha oke egwu. E mechibidola m, apụghị m ịgbapụ; anya m na-ada mba nʼihi mwute. Ụbọchị niile ka m na-akpọku gị, Nna m; ana m agbasapụ aka m abụọ nye gị. Ị ga-arụrụ ndị nwụrụ anwụ ọrụ ebube? Ndị nwụrụ anwụ ọ ga-ebili too gị?

A na-ekwupụta ịhụnanya ọgbụgba ndụ gị nʼime ili, ikwesị ntụkwasị obi gị nʼime Mbibi? ^a A na-amata ọrụ ebube gị nʼime ọchịchịrị, ka a na-amatakwa ezi omume gị nʼala nchefu? Ma mụ onwe m na-etiku gị mkpu maka enyemaka, Nna m; nʼụtụtụ ka ekpere m na-abịa nʼihu gị. Nna m, gịnị mere i ji ajụ mkpụrụobi m? Gịnị mere i ji ezonarị m ihu gị? Enwere m nhụjuanya, nọrọkwa ọnwụ nso site na mgbe m bụ nwata; ebuola m egwu gị dị egwu; adaala m mbà nʼobi kpamkpam. Oke iwe gị na-ere ọkụ agabigala nʼelu m; mbuso agha gị na-eyi egwu na-ala m nʼiyi. Ha na-agba m gburugburu dịka idei mmiri ogologo ụbọchị niile; ha na-ezukọta gbaa m gburugburu. I meela ka onye m hụrụ nʼanya na enyi m si nʼebe m nọ pụọ nnọọ anya; ndị enyi m nọ nʼime ọchịchịrị.