Hemaneibü haübou ka ngekbü
Chia che. Koraeibü shousi shuongeibü chia che. Chia songdakbü shanga, Mahalat Leannot tegü. Ezrahitbü Hemaneibü songsihon chia che.
Chia shuong jenyua aeibou nangnakbü che. Hemanei chalou hoba nangnak ngekda, haibü shuong yoa jinkuan, maangshat lemaa yongko senetan kia, haoei welaubü Boueikei haoeibü maanglembü shuong hoba lepbü shuong apyoanan. Haoei hee ka sanglabü lo dogo phekda, lausikei jongaibü ai aditlep, hoba chia kho nangnaka thonda, longeibü ai akiko.
88 1Kü khümenbü Bou, chaloua ngei ngekda, hoba nangnak nyi thedanga ngei ngekda. 2Kü welaubü nyi thedanga loutishima; kü ngekbü to kaibü nou haangashi. 3Aishanga kü soushou khonsak weko jaka, hoba kü langkei hee nyangko loua. 4Püngkhün to yanbü shuong yoa ngo weabü ki; hau akibü müt che tegü ngo yeikei. 5Haibü shuong yoa apyoakei, hee ka yepbü haitibü shuong tegü, aoyou to nyi touje adamenlabü, aishanga haoen kaibü ik ka wapan aplabü. 6Nyi ngo püngkhün haüboua phokukei, nakthühbü jung ka, yungnyu haüboua. 7Kaibü maangshat ngo thüka yongko ki, hoba nyi kaibü deishou pendouei ngo küplepkei.
8Nyi kü himshuong ngo ka lounyu sungbangkei; nyi ngo haoen la konga jimbü kukei. Ngo khinkua, hibü ngo satenla athük; 9Kü nyek maangmaubüei yuian loenda. Chale weko ngei ka to ngekda, O kü Bou; nyi thedanga ngei kü ik shingda. 10Nyi haibü shuong shanga seikümseilei kümla lo? Haibü shuongei ka sangla loenlabü lo?
11Hee ka kaibü üeisanou ngetilabü lo, mautilabü lemshang ka kaibü maanglembü ngetilabü lo? a a v11 Abaddon: Hebru ngüha 'mautilabü,' haibü shuongeibü aeibou haübou lemshang shanga nyen che ki. 12Kaibü seikümseilei nakthüh ka ngelabü lo, ayingsi kaibü saopobü maan apbü kaonyek ka ngelabü lo? 13Lausikei thuibü shanga ngei ka to ngekda, O kü Bou; ngeyang kü welaubü nyi thedanga loulabü. 14O kü Bou, aila nyi kü soushou mangsenda? Aila nyi kü ka kaibü thenyek huda? 15Khonkua hoba hailabü nyangko kibü, kü nashoudangka jaüan, ngei kaibü hatlamoklabü natenkei; ngo semthetan kia. 16Kaibü hatlamoklabü khauangei ngo thük ka dankei; kaibü hatlabü shibüei ngo mautida. 17Haoenei yungsen tegü chale weko ngo kaileppa; haoenei liko ngo kaijembo shenlepbei. 18Nyi sanoubü hoba thangbou ngo ka lounyu sungbangkei; kü himshuong nakthüha ki.
