Pāngmonshi 14

14 ¹Ithumwui Avāna Mosesli hānga:

²"Phārrei kazāt kalei kachikathāwui atharkahai zimiksholi khalei ain chi hina. Ali pāngmonwuili khuirāra. ³Pāngmon china rāmrahwui ayarli shokta ali munlak eina yangra; awui phārrei kazāt raihaiakha, ⁴pāngmonna tharkhavai chiwui vang kharinga kathara vānao khani, cedarthing, hungshi kahai kazaira̱, kala maharnā khuikhavai hāngra. ^a a v4 Maharnā hi angahong kachā nao akhana, awui apāngbing chi tharkhangasak otramli tara̱ kasirror khavai apongkasā brush thāda khangachāna. ⁵Pāngmon china tara̱ longkazata kalei ngaleiham akhawui atungli vānao akha taithat khavai hāngra. ⁶Ana kharinga vānao, cedarthing, hungshi kahai kazaira̱, kala maharnā khuilaga, kharinga vānao eina ngasoda tara̱ longkazata atungli taithat kahai vānaowui asheeli chumkhuira. ⁷Phārrei kazāt eina tharkhavai chiwuitungli ashee chi shini shida kasirrorlaga, thara da chishātra, chiwui thili kharinga vānao chi ngalemli chihora. ^b b v7 Vānao akha thingasakhaowa, kala khangatei akha chi awui asheeli chumkhuilaga ring kapaida chihoserhaowa — hi kathi kala kathiwui eina kharing luishitwui azakna, chi eina Jishuna zimik akhali awui miyurbing pheomira.

⁸"Tharkhavai china awui kashankachon ngasa̱ra, awui kuisam katonga simiserra, kala tara̱li ra̱vaira; chieina ana tharhaora. Chiwui thili ana rāmrahli zangpaira, kha awui shimwui ayarli zimiksho shini pamra. ⁹Kashinethang ana akui, morhā, kala mikwui sam, awui sam katonga simiserra. Chiwui thili ana awui kashankachon ngasa̱ra kala aphasā tara̱li ra̱vaira, chieina tharhaora.

¹⁰"Kachishatathang ana achuk kapei yaovānao khani, achuk kapei kumkha kākahai yaova̱ akha, tharāzātchigatwui vang thao eina khamanāt manaktak kahai mathir khum kathum, kala thao tengkot akha khuira. ¹¹Tharkhame pāngmon china tharkhavai chi kachigatbing eina ngasoda kazip khavai kachonshimwui khāmongli ithumwui Avāwui mangāli khuirāra.

¹²Pāngmon china yaovānao akha khuilaga thao eina ngasoda khayonchigatwui vang chigatra, kala ithumwui Avāwui mangāli khayitchigat sāda khayitra. ¹³Ana suihamchigat kala rikkatā kachigat taithat khavaipamli, katharapamli, yaonao chi taithatra; kaja khayonchigat china suihamchigat thāda pāngmonwui sāna; hi tharmathengmeikap kajena. ¹⁴Pāngmon china khayonchigatwui ashee ngayarda khuilaga tharkhavai chiwui yāshongwui khanātonli, yapāngwui pangva̱li, kala yāpheiwui pheiva̱li neomira. ¹⁵Pāngmon china thao ngayarda khuida apāng vaishongli heirorra. ¹⁶Ana apāng yāshongwui pāngmareng chi apāng vaishongli khalei thaoli chumkhuilaga, pāngmareng eina ithumwui Avāwui mangāli shini shida kasirrorra. ¹⁷Apāngli taikahai thao eina, pāngmon china tharkhavai chiwui yāshongwui khanātonli, yapāngwui pangva̱li, kala yāpheiwui pheiva̱li, khayonchigatwui ashee atungli neomira. ¹⁸Kala pāngmonna apāngli thao katai chi tharkahaiwui akuili neora, chieina ithumwui Avāwui mangāli awui vang pheomira. ¹⁹Kala pāngmonna suihamchigat chi pha̱ra, kala tharkahaiwui makathar chiwui vang pheomira; chiwui thili rikkatā kachigat chi taithatra. ²⁰Kala pāngmonna rikkatā kachigat eina tharāzāt kachigat chi hanphuttungli pha̱ra, kala awui vang pheomira, chieina a tharhaora.

²¹Kha a kachāma miakha kala mashokrarakha, ana awui vang pheomi khavai khayitchigat sākhavai khayonchigat kahai yaovānao akha, kala tharāzāt kachigatwui vang thao manāt kahai manaktak kahai mathir khuilui akhawui akhum katharā, kala thao lengkhor akha khuira, ²²kala ana kashap eina nāsha̱ khani lah kha̱na̱ khani khuira; akhana suihamchigat sākhavai, kala akhapā china rikkatā kachigat sākhavaina.

²³Kachishatathang ana awui tharkhangasakwui vang chibing pāngmonli kazip khavai kachonshimwui khāmongli ithumwui Avāwui mangāli khuirāra. ²⁴Kala pāngmonna khayonchigat kahai yaonao eina thao lengkhor akha chi khuida, ithumwui Avāwui mangāli khayitta khayitchigat sāra. ²⁵Kala ana khayonchigat kahai yaonao chi taithatra, kala ashee ngayarda khuilaga, tharkahaiwui yāshongwui khanātonli, yapāngwui pangva̱li, kala yāpheiwui pheiva̱li neomira. ²⁶Kala pāngmonna thao chi awui pāng veishongli heirorra, ²⁷kala awui yāpangwui mareng eina awui pāng veishongli khalei thao chi ithumwui Avāwui mangāli shini shida kasirrorra. ²⁸Kala pāngmonna apāngli khalei thao chi tharkahaiwui yāshongwui khanātonli, yapāngwui pangva̱li, kala yāpheiwui pheiva̱li, khayonchigatwui ashee apambingli neomira. ²⁹Kala ithumwui Avāwui mangāli awui vang pheomi khavai, pāngmonna apāngli thao katai chi tharkahaiwui akuili neora. ³⁰Chiwui thili ana kashap eina, nāsha̱ lah kha̱na̱ chiwui akha chigatra. ³¹Ana kashap eina, akhana suihamchigatwui vang, kala akhapā china rikkatā kachigatwui vang, tharāzāt kachigat eina ngasoda pha̱ra. Kala pāngmonna ithumwui Avāwui mangāli tharkahaiwui vang pheomira.

³²Hi phasā kazāt kakā, kala awui tharkhangasakwui kachigat mashokmara mi chiwui vang ainna."

Shimli Kazāt Kakā

³³Ithumwui Avāna Moses eina Aaronli hānga,

³⁴"Nathumna Canaan ngaleili, ina nathumli shimlui sākhavai mikahai chili zang tharan, kala ina nathumna shimlui khuikahai ngalei chiwui alungli shim akhali mataisang kahai kazāt kakā sāngakha, ³⁵shimwui akhavā china pāngmonli rāhāngra: 'Iwui shimli kazāt kathā khikha shoka.' ³⁶Pāngmon china kazāt chi yangkhavai mazangranglakha eina shim chi khuishokhaolu da hāngra, chieina shimlungli khikhala matharmana da machishātpaimara; chiwui thili ana shim chi yangkhavai zangra. ³⁷Ana kazāt chi yangra, kala kazāt chi shimwui phākholi matekrisi lah hungrisi da worshoklaga phākho eina thukmeida worshoksakha, ³⁸pāngmon china shimwui khāmong eina shokta, shim chi shinithang shungnarhaora. ³⁹Kala kashinethang pāngmonna yangluishitra. Kala kazāt chi shimwui phākholi manvāhaiakha, ⁴⁰ana kazāt leikahai lunggui chi khuishoklaga keinung ayarli makathar apamli horsanglu da hāngra. ⁴¹Ana shimwui alung kuimareida seoshokmira, kala seoshok kahai nāp chi keinung ayarli makathar apamli horsangra. ⁴²Lunggui khangateibing chi achālakhawui pamli raira, kala shim chi nāp khadhar eina teira.

⁴³"Kalikhada lunggui khuishokta, shim seoshokta, kala nāpkahaiwui thili kazāt chi shimli latluishitakha, ⁴⁴pāngmon china zangda yangra; kala kazāt chi shimli manvāhaiakha, chi shimlungli manpailak kahai phārrei kazātna; chi makatharana. ⁴⁵Ana lungguibing, thingbing kala awui nāp saikora ngasoda shim chi sakhaimida, keinung ayarli makathar apamli khuitāra. ⁴⁶Shim chi shunghailaga zangakha mi kachiva̱ china ngazin eina tangda ngarangra. ⁴⁷Kala shimli kapia lah kashaia mi kachiva̱ china awui kashankachon ngasa̱ra.

⁴⁸"Kha kalikhada pāngmon china rāyanglaga nāpkahaiwui thili kazāt chi shimli mamanvāsakha, thara da chishātra, khikhalajila kazāt chi raihaira. ⁴⁹Shim chi tharkhavai ana vānao khani, cedarthing, hungshi kahai kazaira̱, kala maharnā khuira, ⁵⁰kala ana vānao chiwui akha chi longkazata tara̱ khalei ngaleihamli taithatra. ⁵¹Ana cedarthing, maharnā, hungshi kahai kazaira̱, kala kharing leikahai vānao chi khuilaga, taithatkahai vānaowui ashee kala longkazata tara̱li chumkhuilaga, shim chi shini shida kasirrorra. ⁵²Chieina ana vānaowui ashee, longkazat tara̱, vānao kharing, cedarthing, maharnā kala hungshi kahai kazaira̱ eina shim chi tharngasakra. ⁵³Kala ana vānao kharing chi keinungwui ayar lam khamasaili chihohaora, kala shimwui vang pheomira, chieina chi tharhaora."

⁵⁴Hi phārrei kazāt saikorawui vang, khamuiwui vang ainna, ⁵⁵kachonli kala shimli khalei phārrei kazāt kakāwui vang, ⁵⁶kala khawor, khavāt, lah chukkhara̱wui vang, ⁵⁷kathar makathar theikhui khavai tamchitheiki kajina. Hi phārrei kazāt kala phārrei kazāt kakāwui ainna.