Shongzā 22

22 ¹"Kachikathāna mukkā lah yao akha khalelaga, chi shaothat maningakha yorhaiakha, mukkā akhawui vang sei phangā, yao akhawui vang yao mati runra. ²Khale akha shimli kāhaida haisalaga shaoda thihaiakha, chiwui vang asheewui khayon maleimana. ³Kha zimik awuitungli kashokhaiakha, asheewui khayon awuina. Ana runra; kha ana khikha maleisaakha, awui khaleekasa̱wui vang ali yorra. ⁴Khale kahai mukkā, gadhā lah yao chi awui pāngli kharing eina theishingkhuihaiakha, ana khum khani shida runra.

⁵"Kachikathāna awui sha̱kei chiphunhailaga, chi kateiwui lui lah drakhā yāmguili phāzaiakha, ana awui luiwui mathāmeikap kala awui drakhā yāmguiwui mathāmeikap eina runra.

⁶"Meina phanlaga ka̱shātli chuikhuphaiakha, hātphui kahai mā, mahātrang kaji mā, lah lui chuikhup tāmihaiakha, mei chihokhami china katonga runra.

⁷"Kachikathāna khongnainaoli lupāsā lah ot chisinhailaga, chi awui shimwui eina khale kahaiakha, khale chi haisahaiakha, ana khum khani shida runra. ⁸Khale chi matheishingkhuisiakha, shimva̱ china awui khongnainaowui ot ana khuikahaila da theikhavai ithumwui Avāwui mangāli rāra. ⁹Tuingaphun khalei mukkā, gadhā, yao, kachon, lah shimān kahai samkaphang, 'iwuina' da hāngkahaiwui vang, khanini ithumwui Avāwui mangāli rāra; ithumwui Avāna khayon mia china akhongnainaoli khum khani shida runra.

¹⁰"Kachikathāna awui khongnainaoli gadhā, mukkā, yao, lah sā khikha khamayon khavai mihaida, chi thihaiakha, za̱khuihaiakha, lah mi matheila khuikahaiakha, ¹¹khamayonapā china akhongnainaowui otli pāng masāza̱mana da iwui mangāli khangashit eina ani angachaili kupngasakra. Akhavā china khuisangra; runkā maphalungmana. ¹²Kha china awui eina kachangkhata khale kahaiakha, ana akhavāli runra. ¹³Chi shaihaihaiakha, ana shākhiwui vang chi khuirāra; shaihai kahai sāwui vang ana khikha marunmara.

¹⁴"Kachikathāna khongnainaowui eina sā akha shukkhuihailaga, akhavā masosila za̱khuihaiakha lah thihaiakha, katonga runphalungra. ¹⁵Akhavā ngasolakha, ana khikha marunmara; sā chi masākhui kahaisiakha, chiwui aman kashimān chi runra.

Ngalānao Akhawui Khayā

¹⁶"Mipa akhana khām makahai kachingva̱ akhali suikhuida ngasopiakha, ana manho khamila ali apreiva̱ sāra. ^a a v16 Manho chi hi ngakum atamli khām kahaiva̱wui avāli shairan eina khami aman china. ¹⁷Kha avāva̱na ali mihai khavai kachangkhat eina mamayāhaiakha, ana kachingva̱bingwui manho eina ngaraichā lupāsā ngatamra.

¹⁸"Laivā kathema akhali ring makhangasakpaimara.

¹⁹"Kachikathāna sāyurli ngasopiakha, ali shaothatra.

²⁰"Kachikathāna I maningla vare kateili pha̱kaphayā chigatakha, chi khavātla shimānphalungra.

²¹"Nathumna kha̱mili khayon masāla marekharekla masāpaimara, kaja nathumla Egypt ngaleili kha̱mi sāsai.

²²"Nathumna ra̱meinao lah avāva̱ makhalei naoli marekharekpaimara. ²³Nathumna athumli marekharekakha, kala athumna ili khangakaoakha, ina athumwui khangakao shāmphalungra. ²⁴Iwui malungkhavāt ngathunghaora; ina nathumli raighai eina shaothatra; kala nathumwui preiva̱ ngarā ra̱meipamda, nathumwui naoshinao avāva̱ makhalei ngasāra.

²⁵"Nathumna nathumli ngasokazata iwui mi kachāma akhali lupā chishutakha, ali kachishuta thāda masāla, atār makhuipaimara. ²⁶Nathumna nakhongnaiwui kachon khangashit thāda khuiakha, zimik katun eina ali hanmira, ²⁷chi awui faror khavai khalatta otna; awui phasāwui vang kachon china. Ana khili pira? Ana ili khangakaoakha, ina shāmphalungra, kaja I lukhamashan leikashina.

²⁸"Nathumna ithumwui Avāli khanguila maphenpaimara, lah nathumwui mibingwui khamungali makhonshipaimara.

²⁹"Nathumwui māhāwui khangachā kala nathumwui ahor chi khami khavai makapan hailu. Nathumwui naomayarabingwui naochizai chi ilila khamilu. ³⁰Nathumwui mukkā kala yaowui vang chithāda sāra: chi ava̱va̱li ngasoda shinithang haida, kachishatathang chi ilila khamilu.

³¹"Nathum ili kathara mi da leira. Luili sāna sāthat kahai sā chi mashaipaimara; chi fali hormihaolu."