Eksodho 22 FHB Father's Heart Bible™

22 ¹“Ule anaba ng'ombe peno bira, buluka mbaipha peno mbaigulisa, abwezere ng'ombe zishanu thangwi ya ng'ombe ibodzi, na mabira manai thangwi ya bira ibodzi. ²Mbava angagwatwa mukuswa nyumba mbamenyewa mpaka kufa, nkhabe mulandu wa ciropa thangwi ya iye. ³Mbwenye dzuwa lingammana, mulandu wa ciropa ndi wace. Asafunika kubwezera; angakhonda kukhala na cinthu, iye aguliswe thangwi ya kuba kwace. ⁴Cinyama cidabiwa cingagumanika cili na moyo m'manja mwace—ng'ombe, buru, peno bira—asafunika kubwezera kawiri.

⁵“Munthu angalekerera pifuyo pyace mbipidya m'munda mwa ndzace peno m'munda wa mphesa, abwezere na pyadidi kakamwe pya m'munda mwace na pyadidi kakamwe pya munda wace wa mphesa.

⁶“Moto ungamwazika mbugwata minga, mbupisa tirigu wakuunganizwa, peno tirigu wakuimirira, peno munda, ule adautomesa asafunika kubwezera mwakukwana.

⁷“Munthu angasiyira ndzace parata peno pinthu toera apikoye, mbipibiwa n'nyumba mwace, mbava—angagwatwa—abwezere kawiri. ⁸Mbava angakhonda kugumanika, mwanaciro nyumba asafunika kubwera pamaso pa Baba wathu toera kuona khala iye akwata pinthu pya ndzace. ⁹Thangwi ya ng'ombe, buru, bira, nguwo, peno cinthu cidataika cinalongwa kuti ndi cace, onsene awiri abwere pamaso pa Baba wathu; ule anatongwa na Baba wathu abwezere kawiri kuna ndzace.

¹⁰“Munthu angapasa ndzace buru, ng'ombe, bira, peno cinyama consene toera kucikoya, mbicifa, peno mbicipweza, peno mbicikwatwa mwakukhonda kuonwa, ¹¹dumbiro pamaso panga linamalisa nkhani pakati pawo: kuti nyakukoya hadaphata tayu pinthu pya ndzace na manja ace. Mwanaciro atawire; nkhabe kubwezera. ¹²Mbwenye khala cinyama cabiwa kwenekene kwa iye, iye asafunika kubwezera kuna mwanaciro. ¹³Cingakhala cakung'anyurwa, abwerese toera kupangiza umboni; nkhabe cinthu cinafunika iye kubwezera thangwi ya cinyama cidang'anyurwa.

¹⁴“Munthu angabwereka cinyama kuna ndzace mbicipweza peno mbicifa mwanaciro mwakukhonda kukhalapo, asafunika kubwezera mwakukwana. ¹⁵Mwanaciro angakhala pabodzi naco, nkhabe kubwezera; cinyama cingakhala cakuhayirwa, kobiri ya kuhayira ndiyo isalipira kuluza kwace.

Mbiri ya Ntsikana

¹⁶“Mamuna anganyengerera ntsikana wa cirombo adakhonda kuphatwa, mbagona naye, asafunika kulipa malowolo mban'lowola. ^a a v16 Malowolo akhali malipo a n'khaliro akhapaswa baba wa ntsikana pa n'dzidzi wa kumanga banja. ¹⁷Baba wace angakhonda kwenekene kumpasa iye, mamuna asafunika kuyeza parata yakulingana na malowolo a atsikana a cirombo.

¹⁸“Lekani kutawirisa mulozi wankazi kukhala na moyo.

¹⁹“Ule anagonana na cinyama, asafunika kuphiwa kwenekene.

²⁰“Ule anapereka ntsembe kuna mulungu unango, kusiyapo Ine ekha, asafunika kufudzwa mwakukwana.

²¹“Lekani kucitira pyakuipa peno kutcinyusa mulendo, thangwi imwe mukhali alendo m'dziko ya Ejitu.

²²“Lekani kuthabusa nzice peno nkhalamwana onsene. ²³Mungaathabusa, mbacemera kuna Ine, Ine ndinabva kwenekene kulira kwawo. ²⁴Ukali wanga unadzapsa; Ine ndinakuphani na supada—akazi anu anadzakhala azice, anwana anu anadzakhala akhalamwana.

²⁵“Mungabwereketsa kobiri kuna atu anga, anyakutcerenga ali pakati panu, lekani kukhala ninga nyakubweresa kuna iye peno kumphemba phindu. ²⁶Mungatenga nguwo ya ndzanu ninga cikole, musafunika kuibweza kuna iye dzuwa mbidzati kudoka, ²⁷iyo ndiyo nguwo yace ibodzi basi yakubvimbira, nguwo yace ya pakhanda pace. Iye anadzagona na ninji? Iye angacemera kuna Ine, Ine ndinabva, thangwi Ine ndine wantsisi.

²⁸“Lekani kulonga pyakuipa pya Baba wathu, nee kutemberera ntongi wa mbumba yanu.

²⁹“Lekani kudembuka kupereka kudzala kwa mabvuno anu na maji anu a mphesa. Ndipaseni mwana wanu wakutoma kubalwa wacimuna. ³⁰Citani pibodzi-bodzi na ng'ombe yanu na bira yanu: koyani naco pabodzi na mai wace ntsiku zinomwe, buluka penepo mundipase pa ntsiku yacisere.

³¹“Khalani atu akucena kuna Ine. Lekani kudya nyama idang'anyurwa na pinyama m'munda—iponyeni kuna ambwa.”