ዘፀኣት 22 FHB Father's Heart Bible™

22 ¹“ሓደ ሰብ ብዕራይ ወይ በጊዕ ሰሪቑ እንተ ሓረዶ ወይ እንተ ሸጦ፥ ክንዲ እቲ ብዕራይ ሓሙሽተ ኣላሕም፥ ክንዲ እቲ በጊዕ ድማ ኣርባዕተ ኣባጊዕ ይኽሓስ። ²ሰራቒ ገዛ ክሰብር እንተ ተረኽበ እሞ ተወቒዑ እንተ ሞተ፥ ዕዳ ደም የብሉን። ³ፀሓይ ኣብ ልዕሊኡ እንተ ወፂኣ ግና፥ ዕዳ ደም ኣለዎ። ክኸሓስ ድማ ኣለዎ፤ ዝኸፍሎ እንተ ዘይብሉ ኸዓ፥ ስለ እቲ ዝሰረቖ ይሽጥ። ⁴እቲ ዝተሰርቐ እንስሳ፥ ብዕራይ ኮነ ኣድጊ ወይ በጊዕ፥ ብህይወቱ ኣብ ኢዱ እንተ ተረኺቡ፥ ዕፅፊ ይኽሓስ።

⁵“ሓደ ሰብ እንስሳኡ ለቒቑ ኣብ ግራት ወይ ኣብ ወይኒ ካልእ ሰብ እንተ ኣብለዐ፥ ካብ ብሉፅ ግራቱ፥ ከምኡ ኸዓ ካብ ብሉፅ ወይኑ ይኽሓስ።

⁶“ሓዊ ተላቢዑ ኣብ እሾዅ እንተ ለኸፈ እሞ፥ ኵልሳሳት ወይ ዘይዕፁድ እኽሊ ወይ እታ ግራት እንተ ነደደ፥ እቲ ነቲ ሓዊ ዘንደዶ ምሉእ ብምሉእ ይኽሓስ።

⁷“ሓደ ሰብ ንብፃዩ ብሩር ወይ ኣቑሑ ክሕልዎ እንተ ሃቦ እሞ፥ ካብ ቤት እቲ ሰብ እንተ ተሰርቀ፥ እቲ ሰራቒ እንተ ተረኺቡ ዕፅፊ ይኽሓስ። ⁸እቲ ሰራቒ እንተ ዘይተረኺቡ ግና፥ እቲ በዓል ቤት ኣቑሑ ብፃዩ ወሲዱ እንተ ኾይኑ ንምፍላጥ፥ ናብ ኣቦና ይቕረብ። ⁹ብዛዕባ ዝኾነ ክርክር፥ ብዛዕባ ብዕራይ ወይ ኣድጊ ወይ በጊዕ ወይ ክዳን ወይ ዝጠፍአ ነገር፥ ‘ናተይ እዩ’ እንተ ተባሂሉ፥ ነገር ክልቲኦም ናብ ኣቦና ይቕረብ፤ እቲ ኣቦና ዝዅንኖ ኸዓ ንብፃዩ ዕፅፊ ይኽሓስ።

¹⁰“ሓደ ሰብ ንብፃዩ ብዕራይ፥ ኣድጊ፥ በጊዕ ወይ ካልእ ዝኾነ እንስሳ ክሕሉ እንተ ሃቦ እሞ፥ እቲ እንስሳ እንተ ሞተ ወይ እንተ ተጐድአ ወይ ሰብ እንተይረአየ እንተ ተወሰደ፥ ¹¹ኣብ መንጎ ክልቲኦም ብቕድመይ ይምሕሉ፦ እቲ ሓላዊ ኣብ ኣቑሑ ብፃዩ ኢዱ ኣይዘርግሐን። እቲ ዋና ድማ ይቀበሎ፤ ካሕሳ ኸዓ የብሉን። ¹²ካብኡ ብሓቂ እንተ ተሰርቐ ግና፥ ንዋናኡ ይኽሓሶ። ¹³ኣራዊት ዝሰላልዖ እንተ ኾይኑ ግና፥ ንምስክር ኣምፂኡ የርእዮ፤ ነቲ ኣራዊት ዝሰላልዖ እንስሳ ኸዓ ኣይኽሓስን።

¹⁴“ሓደ ሰብ ካብ ብፃዩ እንስሳ እንተ ተለቅሐ እሞ፥ ዋናኡ ኣብ ዘይብሉ እንተ ተጐድአ ወይ እንተ ሞተ፥ ምሉእ ካሕሳ ይኽሓስ። ¹⁵ዋናኡ ምስኡ እንተ ነይሩ ግና፥ ኣይኽሓስን፤ እቲ እንስሳ ብክራይ እንተ ተወሲዱ ነይሩ፥ እቲ ክራዩ ካሕሳኡ ይኸውን።

ክብሪ ሓንቲ መንእሰይ ጓል

¹⁶“ሓደ ሰብ ዘይተሓፅየት ድንግል ኣታሊሉ ምስኣ እንተ ደቀሰ፥ ገዝሚ ኸፊሉ ይምርዓዋ። ^a a v16 ገዝሚ፥ በቲ መርዓ ዝግበረሉ ጊዜ ንኣቦ መርዓት ዝኽፈል ልሙድ ክፍሊት እዩ። ¹⁷ኣቦኣ ንእኡ ኽህባ ፈፂሙ እንተ ኣበየ ግና፥ ክንዲ ገዝሚ ደናግል ዝኣክል ብሩር ይምዘን።

¹⁸“ንጠንቋሊት ብህይወት ኣይተትርፋ።

¹⁹“ምስ እንስሳ ዝድቅስ ኵሉ ብርግፅ ይቀተል።

²⁰“ብዘይ ንኣይ በይነይ፥ ንኻልእ ኣምላኽ ዝስውእ፥ ፈፂሙ ይጥፋእ።

²¹“ንስደተኛ ኣይትበድልዎ ወይ ኣይትግፍዕዎ፤ ንስኻትኩም ኣብ ምድሪ ግብፂ ስደተኛታት ኔርኩም ኢኹም እሞ።

²²“ንዝኾነት መበለት ወይ ንዝኾነ ደኽታም ኣይትግፍዑ። ²³እንተ ገፋዕኹሞም እሞ ናባይ እንተ ጠርዑ ግና፥ ኣውያቶም ብርግፅ ክሰምዕ እየ። ²⁴ቍጥዓይ ክነድድ እዩ፤ ብሰይፊ ኸዓ ክቐትለኩም እየ፤ ኣንስትኹም መበለታት፥ ደቅኹም ድማ ደኽታማት ክኾኑ እዮም።

²⁵“ነቲ ኣብ ማእኸልኩም ዘሎ ድኻ፥ ነቲ ህዝበይ ገንዘብ እንተ ኣለቃሕኹሞ፥ ከም መለቅሒ ኣይትኹኑ፤ ሃረፃ ኸዓ ኣይትውሰዱ። ²⁶ክዳን ብፃይኩም ብትሕጃ እንተ ወሰድኩም፥ ፀሓይ ከይዓረበት ናብኡ ምለስዎ፤ ²⁷ንሱ ንሰብነቱ ዝኸውን እንኮ ክዳኑ እዩ እሞ። ብምንታይ ደኣ ኽድቅስ እዩ? ናባይ ምስ ጠርዐ ኸዓ ክሰምዖ እየ፤ ኣነ መሓሪ እየ እሞ።

²⁸“ንኣቦና ኣይትፅርፍዎ፤ ንሹም ህዝብኻ ድማ ኣይትረግሞ።

²⁹“ምልኣት እኽልኻ፥ ከምኡ ኸዓ ፅሟቕካ ንምሃብ ኣይትደናጐ፤ በዅሪ ኣወዳትካ ንኣይ ሃበኒ። ³⁰ከምኡ ኸዓ ንብዕራይካን ንበጊዕካን ግበር፦ ሸውዓተ መዓልቲ ምስ ኣዲኡ ይፀንሕ፤ በታ ሻሙነይቲ መዓልቲ ኸዓ ንኣይ ሃበኒ።

³¹“ንኣይ ቅዱሳት ህዝቢ ኹኑ። ኣብ መሮር ኣራዊት ዝሰላልዖ ስጋ ኣይትብልዑ፤ ነኽላባት ደርቢይዎ።”