Shongzā 18

18 ¹Midianwui pāngmon, Moseswui awova̱ Jethrona, ithumwui Avāna Moses eina awui mibing Israelli kasāsā saikora, kala Israelli Egyptwui eina thānshokkhami chi shāhaowa. ²Chitharan, Mosesna awui preiva̱ Zipporahli shimli shiunhai thili, Moseswui awova̱ Jethrona ali khuiya, ³awui naomayara khani ngasoda, akha aming Gershom, kaja Mosesna hānga, "I ngalei kateili kapāna kha̱mi ngasāsai," ⁴khangatei aming Eliezer, kaja ana hānga, "ivāva̱wui Vare ili ngachonmi, kala ili Pharaohwui raighai eina kanmi." ^a a v4 Eliezer kaho hi "iwui Vare iwui ngachonmiva̱na" da kakhalatna—Pharaohwui eina kanmikasāwui vang ningshi khavai Mosesna awui naomayarali khami amingna. ⁵Moseswui awova̱ Jethrona, Moseswui naomayarabing eina awui preiva̱ ngasoda, ithumwui Avāwui phungreili khalei awui lamhāng rāmrahli awui ngalemli rā. ⁶Ana Mosesli hānga, "I, nawova̱ Jethrona, nawui preiva̱ eina awui naomayara khani ngasoda rārādalei."

⁷Mosesna awova̱li samphang khavai shokvai, mashunzangda amaya̱ya. Athum akha eina akha shālam sāngaroka, kala ringkaphā ngahānngaroka; chieina kachonshimli zanghaowa. ⁸Mosesna awova̱li, ithumwui Avāna Israelwui vang Pharaoh eina Egyptli kasāsā saikora, apongli athumli rāshokkasā kachotkachāng saikora, kala ana athumli kathāda kanmihaikasā chi unghānga. ⁹ithumwui Avāna Israelli kasā khamathā saikorawui vang, athumli Egyptwui pāng eina kanmihaira chiwui vang, Jethrona ringphāhaowa. ¹⁰Jethrona hānga, ithumwui Avāli soranu, ana nathumli Egyptwui pāng eina kala Pharaohwui pāng eina kanmi, mibingli Egyptwui pāng azingwui eina kanmi. ¹¹Ara ina thei, ithumwui Avā hi varebing saikorawuitungli reikhamatai, kaja athumna nganukasā chiwui pongli ana athumli yuihaira. ¹²Moseswui awova̱ Jethrona ithumwui Avāwui vang rikkatā kachigat eina pha̱kaphayā khuiya; Aaron eina Israelwui khararnao saikorana Moseswui awova̱ ngasoda ithumwui Avāwui mangāli khamui shai khavai rā.

¹³Akhama kathā Mosesna mibingli bichar sā khavai pama, kala mibing china ngathor eina thuida ngazin vāshungda awui kuimareida nganinga. ¹⁴Awova̱na ana mibingli kasāsā saikora chi theilaga, hānga, "Nana mibingli sākasā hi khikhala? Khisāda na kachiphun pamda, mi saikorana ngathor eina thuida ngazin vāshungda nawui kuimareida nganingkhala?"

¹⁵Mosesna awova̱li hānga, "Kaja mibing china ithumwui Avāli phā khavai iwuili rā; ¹⁶athumna khanganang leiakha, iwuili rā; iya akha eina awui khongnainaowui ngachaili bichar sai, kala ithumwui Avāwui shiyan kala ainbing meichitheiya." ¹⁷Moseswui awova̱na ali hānga, "Nana sākasā hi kaphā maningmana. ¹⁸Na kala mibing hina khanang ngasakhaora; ot hi nawui vang ritnai; namāngna masārarmara. ¹⁹Ara ili nganālu: ina nali hāngchitheira; ithumwui Avā nala leiranu. Mibingwui vang awui mangāli nganinglu, kala athumwui tui chi awuili khuirālu. ²⁰Shiyan kala ainbingwui vang athumli hāngmathinlu, kala zatkhavai apong kala sākhavai ot theingasakmilu. ²¹Mi saikorawui alungli, ithumwui Avāli khangachee, khamashunga kala makhangaronga tongkazāli yangkharing sākashap mibing kapangkhuilu; athumli thingthingwui, shāshāwui, hangphangāngāwui, kala tharārāwui kathāna phāsanglu. ²²Athumna atam saikorali mibingli bichar sāranu, kharei tui saikora chi nawuili khuirāda, kha kateo tui saikora chi athum khalattana bichar sāranu; chithāda athumna nala otphun chi phungruma nawui otphun ngaveng ngasakra. ²³Nana hi sāda ithumwui Avāna nali kasoakha, na nganingchingra, kala mibing saikora hina chingri eina athumwui apamli ungra."

²⁴Chieina Mosesna awova̱li nganāda, ana hāngkahai saikora chi sai. ²⁵Mosesna Israel saikorawui eina sākashap mibing kapangkhuida, athumli mibingwuitungli akhavā, thingthingwui, shāshāwui, hangphangāngāwui, kala tharārāwui kathāna sāngasaka. ²⁶Athumna atam saikorali mibingli bichar sāmi, tuingaphun chi Mosesli khuirāda, kha kateo tui chi athum khalattana bichar sāmi. ²⁷Chieina Mosesna awova̱li chihovā, kala ana kachichā khalattawui ngaleili latunga.