Shongzā 19

19 ¹Israelwui mibingna Egypt ngaleiwui eina shokta kachāng kakathumali, chithang zimiksho ngalāngda, athumna Sinai lamhāngli vāshunga. ²Kala athumna Rephidimwui eina zatphokta Sinai lamhāngli vāshunglaga chili rāmrah vasāpama; Israelna phungrei mangāvāk rāmrah vasāpama.

³Mosesna ithumwui Avāli kāhaowa, kala ithumwui Avāna phungreiwui eina ali hokhuida hānga, "Jacobwui shimkhurli hithāda hānglu, Israelwui mibingli hānglu: ⁴Egyptli ina kasā chi, kathada ina lengwui angachāngtungli nathumli phurkhuilaga iwui khalattali thānmi chi, nathumna theihaira. ⁵Ara, nathumna kachangkhat eina iwui tui khuisanglaga iwui tuingashit mayonakha, nathum miyur saikorawui alungli iwui vang sākhangasak ngasāra, kaja okathui katonga iwuina. ^a a v5 Ithumwui Avāna awui mibingli awui "sākhangasak vang" da hoi—hi kachangkha leishiwui tui, avāna leikashe nao akhali kayā leishihaira thāda. ⁶Nathum iwui pāngmon wungram, kathara yur akha ngasāra. Hi tuibing chi nana Israelwui mibingli hāngphalungra."

⁷Chieina Mosesna rāda mibingwui khararnaobingli ahokhuilaga, ithumwui Avāna ali kasohai tui saikora chi athumwui mangāli khuipama. ⁸Mibing saikorana khokkha sāda ngahānkai, "Ithumwui Avāna hāngkahai saikora chi ithumna sāra." Mosesna athumwui tui chi ithumwui Avāli unghāngsera.

⁹Ithumwui Avāna Mosesli hānga, "Ina muiyā kashā alungli nathumli rāra, chithāda ina nali ngazek tharan mibingna shāra, kala katang mavaila nali shitsangra." Chieina Mosesna mibingwui tui chi ithumwui Avāli hāngsera. ¹⁰Ithumwui Avāna Mosesli hānga, "Mibingli vālu, aja kala akhama athumli tharchigatlu; kala athumwui kachon ngasa̱serngasaklu. ¹¹Zimiksho kakathumali ngaraikasā leilu, kaja chithang zimikshola ina mibing saikorawui miktāli Sinai Kaphungtungli katāra. ¹²Mibingwui vang kuimareida thari sālaga hānglu, 'Phungreili kālala chiwui ayarli singalala makhavai ningngasharlu. Phungrei chili sākaza̱ mi chi kachangkhat eina shaothatra.' ¹³Ali pāng eina masāza̱paimara; ali lunggui eina horthatra lah malā eina kapthatra. Sā ngasaklala mi ngasaklala, a thiphalungra. Yaovāngajiwui talla̱ kasāngkha kakhong tharan, athumna phungreili kaira."

¹⁴Mosesna phungreiwui eina mibingli katāda, athumli tharchigata, kala athumna athumwui kachon ngasa̱sera. ¹⁵Kala ana mibingli hānga, "Zimiksho kakathumawui vang ngaraikasā leilu; preiva̱li mangasopipaimana."

¹⁶Zimiksho kakathumawui ngathor, kazing khangashum kala rikhān shoka, muiyā kashāna phungrei chi khaluiphinhaowa, kala talla̱khon panglāk eina khong kashā eina rāmrahwui mi saikora ngacheehaida kathirhaowa. ¹⁷Mosesna ithumwui Avāli samphang khavai mibingli rāmrahwui eina thānshok, kala athum phungreiwui pheizingli nganinga. ¹⁸Sinai Kaphung chi meikhutna pemtinghaowa, kaja ithumwui Avāna mei eina chiwuitungli tāhaowa. Meikhut chi sharkha̱wui meikhut thāda shoka, kala phungrei katonga khanuk khayāngserhaowa. ¹⁹Talla̱khon chi pangmei khangai pangmeihaoda, Mosesna hānga, kala ithumwui Avāna khangashumkhon eina ali ngahānkāmi. ²⁰Ithumwui Avāna Sinai Kaphungli phungreitonli tāhaowa, kala ithumwui Avāna Mosesli phungreiton kā khavai hoi; kala Mosesna kai.

²¹Kala ithumwui Avāna Mosesli hānga, "Taulu, kala mibingli hāngmathinlu, ili yangkhavai athumna angarit lāngda maruivāpaimana, maningakha mi kachungkha thiphalungra. ²²Ili rākhanganai pāngmonbingna athum khalattala tharchigatphalungra, maningakha ina athumwuitungli shokpaishina."

²³Mosesna ithumwui Avāli hānga, "Mibingna Sinai Kaphungli makāhaipaimana, kaja nana khalattana ithumli hithāda hāngmathina, 'Phungrei kuimareida angarit sālu, kala chi tharchigatlu.'"

²⁴Kala ithumwui Avāna ali hānga, "Taulu, chiwui thili Aaron eina rākālu. Pāngmonbing eina mibingna ili rākākhavai angarit maruivā ngasakalu, maningakha ina athumwuitungli shokra."

²⁵Chieina Mosesna mibing ngalemli tāhaowa, kala athumli hānga.