Shongzā 20

20 ¹Chiwui thili ithumwui Avāna hi tui saikora chi hānga:

²"Egypt ngaleiwui eina, narkahai shimwui eina thānkashoka nathumwui Avā chi ina.

³"I maningla vare katei maleimana.

⁴"Nathumna khalattawui vang atungshong kazingramli, azingshong okathuili, lah ngaleizingwui tara̱li khalei ot akhawui ngaraikachā ama̱la marukkhuipaimana. ⁵Athumli makhorumpaimana lah otram mangatha̱paimana; khikhalajila nawui Avā iya mikpaishikatha Avāna, ili ningkachai mibingwui naothot kathum mati vāshungda avāva̱ ngarāwui khayonkhamāng ina tandi mira, ⁶kha ili leishida iwui ningkhami khamayonabing thingthingli makhangachei leikashi chitheimira.

⁷"Nathumwui Avāwui ming arema eina makhuipaimana, kaja awui ming arema eina khuikahai chili ithumwui Avāna morei maleimana da mahangmana.

⁸"Kathar eina mayon khavai, sabbaththang chi phaningunglu. ⁹Nathumna tharukthang ot sāda, nathumwui ot saikora sākhuira, ¹⁰kha kashinethang chi nathumwui Avāwui Sabbathna; chithang nala, nanaomayarala, nanaongalāva̱la, nawui rao mayarnaola lah rao sha̱naola, nawui sha̱keila, lah nathumwui ngaveili khalei kha̱mi saikorala ot masāpaimana. ¹¹Kaja tharukthangwui alungli ithumwui Avāna kazingram, okathui, shamadru, kala achibingwui alungli khalei saikora sai, kala kashinethang ngasāmkhui; chiwui vang eina ithumwui Avāna sabbaththang chi somida tharngasaka.

¹²"Nathumwui Avāna nathumli khami ngalei chili nawui zimiksho sāngmei khavai, nava̱ navāli khayāshilu.

¹³"Mi mashaothatpaimana.

¹⁴"Maphophāpaimana.

¹⁵"Maleepaimana.

¹⁶"Nawui khongnainaoli masatkharatpaimana.

¹⁷"Nawui khongnainaowui shim makahaopaimana. Nawui khongnai preiva̱li, awui rao mayarnao lah rao sha̱nao, awui mukkā lah gadhā, lah awui khongnainaowui khalalei saikora maningchāngpaimana."

¹⁸Mibing saikorana kazing ngashum, rikhān ngashei, talla̱khon, kala phungrei meikhut kashoka chi thei. Chi kathei eina, athum kathirhaowa kala khalāda nganinga.

¹⁹Athumna Mosesli hānga, "Nana ithumli hānglu, kala ithumna nganāra. Kha ithumwui Avāna ithumli mahānglakalu, maningakha ithum thihaora."

²⁰Mosesna mibingli hānga, "Mangacheealu; ithumwui Avā nathumli chāng yang khavai kharāhaira, chithakha awui khangachee nathumli ngasoda leira, kala nathumna morei masāmara." ²¹Mibing chi khalāda pamsanga, kha Mosesna ithumwui Avā khalei tangkhamang kashāli nganaimeida vai.

Mosesna Rānganaia

²²Chieina ithumwui Avāna Mosesli hānga, "Israelwui mibingli hānglu: Ina kazingramwui eina nathumli hānghai chi nathum khalattana theihaira. ²³Ili ngasoda leikhavai lupāsā eina varebing masākhuipaimana, kala nathum khalattawui vang sinā eina varebing masākhuipaimana. ²⁴Iwui vang ngalei eina hanphut akha sākhuilu, kala chiwuitungli nathumwui rikkatā kachigat kala ningyatchigat, nathumwui yao kala sha̱kei chi pha̱phayālu. Iwui ming phaningung khavai apam kachida, ina nathumli rāda somira. ²⁵Nathumna iwui vang ngalung eina hanphut akha sakhuiakha, chi shānkakhui lunggui eina masākhuipaimana; kaja chili nathumwui khutlai sāda chi makhao ngasakra. ²⁶Iwui hanphutli kadhui eina makāpaimara, chithakha chili nathumwui khamahong maphongshokmara."