Nna Anyị Na-ekwu Okwu
Nna anyị nʼonwe ya kwuru okwu iri ahụ, ọ malitere ọ bụghị site nʼihe ọ chọrọ, kama site nʼonye ọ bụ: onye ahụ kpọpụtara ha site nʼịbụ ohu. Iguzosi ike, aha, Ụbọchị Izuike, ndị mụrụ, ndụ, alụmdi na nwunye, ihe onwunwe, eziokwu, ọchịchọ. Ndị mmadụ rịọrọ Mosis ka ọ gee ntị nʼọnọdụ ha, ọ banyekwa nʼọchịchịrị gbara oke.
20 1Mgbe ahụ, Nna anyị kwuru okwu ndị a niile:
2“Mụ onwe m bụ Nna gị, onye kpọpụtara gị site nʼala Ijipt, site nʼụlọ ịgba ohu.
3“Enwela chi ndị ọzọ ọbụla nʼihu m.
4“Emerela onwe gị arụsị a pịrị apị, maọbụ oyiyi ọbụla nke ihe dị nʼeluigwe elu, maọbụ nke dị nʼụwa ala, maọbụ nke dị na mmiri nʼokpuru ụwa. 5Akpọrọla ha isiala, maọbụ fee ha ofufe; Mụ onwe m, bụ Nna gị, bụ Nna na-ekwo ekworo, onye na-ata ụmụ ahụhụ nʼihi mmehie ndị mụrụ ha, ruo nʼọgbọ nke atọ na nke anọ nke ndị kpọrọ m asị, 6ma na-egosi ịhụnanya na-adịgide nye ọtụtụ puku ndị hụrụ m nʼanya ma na-edebe iwu m.
7“Akpọla aha Nna gị nʼefu, nʼihi na Nna anyị agaghị agụ onye ọbụla na-akpọ aha ya nʼefu dịka onye ikpe na-amaghị.
8“Cheta ụbọchị izuike, idobe ya nsọ. 9Ụbọchị isii ka ị ga-arụsi ọrụ ike ma rụchaa ọrụ gị niile, 10ma ụbọchị nke asaa bụ ụbọchị izuike nye Nna gị. Arụla ọrụ ọbụla nʼime ya—gị onwe gị, nwa gị nwoke, nwa gị nwanyị, odibo gị nwoke maọbụ nwanyị, anụ ụlọ gị, maọbụ ọbịa nọ nʼime ọnụ ụzọ ama gị. 11Nʼihi na nʼime ụbọchị isii ka Nna anyị kere eluigwe, ụwa, oke osimiri, na ihe niile dị nʼime ha, ma zuo ike nʼụbọchị nke asaa; ya mere Nna anyị gọziri ụbọchị izuike ahụ ma doo ya nsọ.
12“Sọpụrụ nna gị na nne gị, ka ụbọchị gị dị ogologo nʼala ahụ Nna gị na-enye gị.
13“Egbula mmadụ.
14“Akwala iko.
15“Ezula ohi.
16“Agbala ama ụgha megide onye agbata obi gị.
17“Enwela anyaukwu nʼebe ụlọ onye agbata obi gị dị. Enwela anyaukwu nʼebe nwunye onye agbata obi gị nọ, odibo ya nwoke maọbụ nwanyị, ehi ya maọbụ ịnyịnya ibu ya, maọbụ ihe ọbụla bụ nke onye agbata obi gị.”
18Ndị niile hụrụ égbè eluigwe, àmụmà na-egbuke egbuke, ụda opi ike, na ugwu ahụ nke na-ekupụ anwụrụ ọkụ. Mgbe ha hụrụ ya, ha mara jijiji ma guzo nʼebe dị anya.
19Ha gwara Mosis sị, “Gị onwe gị na anyị kwuo okwu, anyị ga-egekwa ntị. Ma ekwela ka Nna anyị na anyị kwuo okwu, ka anyị ghara ịnwụ.”
20Mosis gwara ndị ahụ sị, “Atụla egwu; Nna anyị abịala ịnwale unu, ka egwu ya dịgide nʼime unu, ka unu gharakwa ime mmehie.” 21Ndị ahụ nọgidere nʼebe dị anya, ebe Mosis bịarutere nso nʼoké ọchịchịrị ahụ ebe Nna anyị nọ.
Mosis Bịaruru Nso
22Mgbe ahụ, Nna anyị gwara Mosis sị, “Gwa ụmụ Izrel: Unu onwe unu ahụla na mụ na unu ekwuola okwu site nʼeluigwe. 23Emerela chi ndị ọzọ nke ọlaọcha ka ha soro m, emerela kwa onwe unu chi ndị nke ọlaedo. 24Wuoro m ebe ịchụ àjà nke aja, chụọkwa nʼelu ya àjà nsure ọkụ gị na àjà udo gị, ìgwè atụrụ gị na ìgwè ehi gị. Nʼebe ọbụla m mere ka e cheta aha m, aga m abịakwute gị gọzie gị. 25Ọ bụrụ na ị wuoro m ebe ịchụ àjà nke nkume, ewula ya site na nkume a wàrà awà, nʼihi na iwelite ngwá ọrụ gị nʼelu ya na-emerụ ya. 26Arịgola nzọ ukwu ịrịgo nʼebe ịchụ àjà m, ka a ghara ikpughe ọtọ gị nʼelu ya.”
