Ng'alaali Kwandanyo
Ki ng'alaal Kwandanyo ng'aleek taman eng' ineegei, kochakte ma eng' soet ago eng' ineendet ko ng'oo: ineendet ne ki imutwek eng' otwoknateet. Kong'etunetap Kwanda agenge, kainennyi, sabato, pareet, saboondo, kaatunet, chepkondok, imanda, ak magutyet. Ki sosoomei piik Musa kogasaa, ak kochuut koimen ne oo.
Ng'alaali Kwandanyo eng' mustarisyek 2–17, 22–26
20 1Ki ng'alaal Kwandanyo ng'aleechu tugul, koleenji:
2“Aa Kwandang'ung', ne ki among'un inyee eng' emetap Misiri, eng' koot ne po otwoknateet.
3“Amat itinye kamuktaik alak age tugul eng' tainnyu.
4“Amat iyachigei kanamwet ne kiwai, anan itoondap kiy age tugul ne mi kipsengwet eng' parak, anan ne mi ng'wony eng' keel, anan ne mi peek che mi ng'wony oriit. 5Amat among'urukyi icheek, anan oot icheek; amu anee Kwandang'ung', aa Kwanda ne tinyei ng'etkong', ne aipchini lagok tengektap pareet, agoi ibinda ne po somok ak ne po ang'wan eng' icheek che wechanee, 6ago aboorchini rireenet eliphuusyek che chama ak che riipei ng'atuutikyuk.
7“Amat iboisyee kainetap Kwandang'ung' eng' lembech, amu ma iiti Kwandanyo kole ma tinyei tengek chii age tugul ne iboisyee kainennyi eng' lembech.
8“Ibwaat peetuutap sabato, si itabaan. 9Iboisyei eng' peetuusyek lo, ak iyai poisyoniguk tugul, 10ago peetuutap tisap ko sabato ne po Kwandang'ung'. Amat iyai poisyet age tugul eng' peetuunooto—inyee, ak weeriing'ung', ak cheptong'ung', ak otwogeng'ung' ne muren anan ne tye, ak tuukwok, anan toondet ne menyei ormariichoguk. 11Amu eng' peetuusyek lo ko ki yai Kwandanyo kipsengwet, ak ng'wony, ak nyanjet, ak tuguuk tugul che mi icheek, komuuny anyun eng' peetuutap tisap; nooto ki beruure Kwandanyo peetuutap sabato, ak koitabaanat.
12“Teegis kwandang'ung' ak kamenng'ung', si koek peetuusyeguk che chang eng' emet ne igoochini Kwandang'ung' inyee.
13“Amerumisye.
14“Amegesesen.
15“Amechoor.
16“Amebaoryanji chiitap kokweng'ung' eng' lembech.
17“Amemakyigei kootap chiitap kokweng'ung'. Amegase myat osotyotap chiitap kokweng'ung', anan otwogennyi ne muren anan ne tye, anan eitonyi anan sigiryennyi, anan kiy age tugul ne po chiitap kokweng'ung'.”
18Ki keer piik tugul tuloosyek, ak kalyelosyek, ak cheetap iryageet, ak tulweet ne iyeni. Ye kingo keer, kobotanso, ak kitonon ole loo.
19Ki mwachi Musa, koleenji, “Ng'alaal inyee kobootech, ak keges. Ago mat king'alaal Kwandanyo kobootech, amu kibek.”
20Ki leenji Musa piik, koleenji, “Amoiywei; amu kanyo Kwandanyo si kotyemin, si kotebi iywetanyi eng' okweek, si matya tengekto.” 21Kitonon piik ole loo, ago ki riik Musa ole mi mesundeito ne oo, ole mi Kwandanyo.
Riikta Musa
22Ki leenji Kwandanyo Musa, koleenji, “Mwachi piigap Israel, leenjin: Kagogeer okweegei kole kang'alaal anee kobootok kobun kipsengwet. 23Amat oyai kamuktaik che po fedha kobooto anee, ak amat oyachigei kamuktaik che po thahabu. 24Iteekyi anee kaptisisyet ne po ng'wony, ak ieny eng' yooto kagoochinoiguk che eenyotin ak che po kaalyeet, keechiirekwok ak tuukwok. Olooto tugul ne abwaati kainennyu, ko anyoonjinin ak aberuurin. 25Ngot iteekyi anee kaptisisyet ne po koik, amat iteech eng' koik che kagechop; amu ngo iyae karnennyi eng' yooto, ko imurwon. 26Amat ilany mitainik che po kaptisisyennyu, si ma ng'ang'agis aach ngoring'ung' eng' yooto.”